புதிய ஐபோன்களின் முன்பதிவு விரைவில் ஏர்டெல் தளத்தில்

ஆப்பிள் நிறுவனம் சில தினங்களுக்கு முன் அறிமுகம் செய்த ஐபோன் XS, ஐபோன் XS மேக்ஸ் மற்றும் ஐபோன் XR உள்ளிட்ட மாடல்களை ஏர்டெல் ஆன்லைன் வலைத்தளத்தில் விரைவில் முன்பதிவு செய்யலாம்.

அதன்படி ஐபோன் ஐபோன் XS மற்றும் ஐபோன் XS மேக்ஸ் மாடல்களை செப்டம்பர் 21-ம் தேதி முதல் ஏர்டெல் ஆன்லைன் தளத்தில் முன்பதிவு செய்ய முடியும். ஐபோன் XR மாடலின் முன்பதிவு அக்டோபர் 19-ம் தேதி துவங்குகிறது. புதிய ஐபோன் மாடல்களை முன்பதிவு செய்வோருக்கு இதுவரை எவ்வித சலுகையும் அறிவிக்கப்படவில்லை. 

இந்தியாவில் ஐபோன் XS 64 ஜிபி வேரியன்ட் விலை ரூ.99,900 முதல் துவங்குகிறது. ஐபோன் XS மேக்ஸ் 64 ஜிபி வேரியன்ட் விலை ரூ.1,.09,900 என்றும் ஐபோன் XR 64 ஜிபி வேரியன்ட் விலை ரூ.76,900 முதல் துவங்குகிறது. 

ஏர்டெல் வலைத்தளத்தில் முன்பதிவு துவங்க இன்னும் சில தினங்கள் இருக்கும் நிலையில், முன்பதிவு செய்வோருக்கு சிறப்பு சலுகைகள் விரைவில் அறிவிக்கப்படலாம் என எதிர்பார்க்கப்படுகிறது.

ஏற்கனவே ஏர்டெல் ஆன்லைன் வலைத்தளத்தில் பல்வேறு நிறுவன ஸ்மார்ட்போன்கள் எளிமையான மாத தவணை முறை வசதியில் விற்பனை செய்யப்படுகிறது. இவ்வாறு மாத தவணையில் ஸ்மார்ட்போன் வாங்குவோருக்கு மாத தவணையுடன், ஏர்டெல் போஸ்ட்பெயிட் சலுகையும் வழங்கப்படுகிறது.