நத்திங் போன் 2a புது எடிஷன் இந்தியாவில் அறிமுகம் - என்ன ஸ்பெஷல் தெரியுமா?

நத்திங் நிறுவனம் இந்திய சந்தையில் தனது நத்திங் போன் 2a மாடலின் புளூ எடிஷனை அறிமுகம் செய்துள்ளது. முன்னதாக நத்திங் போன் 2a மாடல் பிளாக் மற்றும் வைட் என இரண்டு நிறங்களில் அறிமுகம் செய்யப்பட்ட நிலையில், தற்போது புதிதாக புளூ நிற வேரியண்ட் அறிமுகமாகி இருக்கிறது.

புதிய நத்திங் போன் 2a புளூ எடிஷனில் நிறம் தவிர டிசைன் மற்றும் அம்சங்களில் எந்த விதமான மாற்றங்களும் மேற்கொள்ளப்படவில்லை. இந்தியாவில் மட்டுமே இந்த நிற வேரியண்ட் பிரத்யேகமாக அறிமுகம் செய்யப்பட்டு உள்ளது.

வருகிற மே 2 ஆம் தேதி மதியம் 12 மணிக்கு ப்ளிப்கார்ட் தளத்தில் நத்திங் போன் 2a விற்பனை நடைபெற உள்ளது. இந்த விற்பனையின் போது இந்த ஸ்மார்ட்போன் ரூ. 19 ஆயிரத்து 999 என்ற விலையில் விற்பனை செய்யப்பட உள்ளது. இத்துடன் "ஜீரோ ஹவர்" சிறப்பு விற்பனையின் கீழ் வாடிக்கையாளர்கள் சி.எம்.எஃப். ஆடியோ சாதனங்களை வெல்லும் வாய்ப்புகளும் உண்டு.

இதுதவிர இந்த ஸ்மார்ட்போனின் விலையில் வேறு எந்த மாற்றமும் மேற்கொள்ளப்படவில்லை. அதன்படி இந்த மாடலின் 8 ஜி.பி. ரேம், 128 ஜி.பி. விலை ரூ. 23 ஆயிரத்து 999 என்றும் 8 ஜி.பி. ரேம், 256 ஜி.பி. மெமரி மாடல் விலை ரூ. 25 ஆயிரத்து 999 என்றும் டாப் எண்ட் 12 ஜி.பி. ரேம், 256 ஜி.பி. மெமரி மாடல் விலை ரூ. 27 ஆயிரத்து 999 என்றும் நிர்ணயம் செய்யப்பட்டு உள்ளது.