அம்மாபேட்டை:
தஞ்சாவூர் மாவட்டம் அம்மாபேட்டை அருகே புளியக்குடியில் அமைந்துள்ள டாஸ்மாக் கடையை அகற்றக்கோரி கடந்த 14-ந் தேதி இந்திய மாதர் சங்க சம்மேளனம் சார்பில் டாஸ்மாக் கடையை முற்றுகையிட்டு பூட்டு போடும் போராட்டத்தில் அப்பகுதி பெண்கள் உட்பட ஏராளமானோர் பங்கேற்றனர்.
இதில் காவல்துறையினருக்கும் போராட்டக்காரர்களுக்கும் இடையே தள்ளுமுள்ளு ஏற்பட்டது.
இதில் 3 பேருக்கு காயம் ஏற்பட்டதாகவும் கூறப்படுகிறது.
இந்நிலையில் தடையை மீறி போராட்டத்தில் ஈடுபட்டதாக 49 பெண்கள் உட்பட 74 பேர் கைது செய்யப்பட்டனர்.
இதனை கண்டித்து, இந்திய கம்யூனிஸ்ட் கட்சியின் ஒன்றிய செயலாளர் வெங்கடேசன் தலைமையில், மாவட்ட துணை செயலாளர் செந்தில் குமார், மாநிலத் துணைச் செயலாளர் தில்லைவனம், மாதர் சங்க தலைவி தாமரைச்செல்வி அக்கட்சியினர் மற்றும் அப்பகுதியை சேர்ந்த பெண்கள் உட்பட பொதுமக்கள் ஏராளமானோர் அம்மாபேட்டை நால்ரோடு சாலையில் ஆர்ப்பாட்டத்தில் ஈடுபட்டனர்.
ஏடிஎஸ்பி முத்தமிழ்செல்வன் தலைமையில் போராட்டத்தில் ஈடுப்பட்டவர்களுடன் பேச்சு வார்த்தை நடத்தினர். இதைத் தொடர்ந்து போராட்டம் கைவிடப்பட்டது.
