ஆத்தூர்:
தூத்துக்குடி மாவட்டம் ஆத்தூரில் பிரசித்தி பெற்ற சுமார் 2 ஆயிரம் ஆண்டுகள் பழமையான சோமசுந்தரி அம்பாள் சமேத சோமநாத சுவாமி கோவில் உள்ளது. கற்கோவிலான இக்கோவில் மன்னர் காலத்தில் மிகப்பிரமாண்டமாக கட்டப்பட்டுள்ளது.
கோவிலில் பழம் பெருமையை பறைசாற்றும் பல்வேறு கல்வெட்டுகளும் உள்ளது. தாமிரபரணி ஆற்றுக் கரையோரம் அமைந்துள்ள இக்கோவில் தாமிரபரணியின் குறுக்கே பாலம் இல்லாத காலத்தில் கட்டப்பட்டிருப்பதை பலரும் வியப்புடன் பார்க்கின்றனர். 24 வருடங்களுக்குப் பிறகு இன்று கும்பாபிஷேகம் நடந்தது.
அதிகாலையிலேயே கோவில் வளாகம் முழுவதும் உள்ளூர் மற்றும் வெளியூர் பக்தர்களால் நிரம்பி வழிந்தது. கோபுர தரிசனம் செய்வதற்கு வசதியாக கோவில் நிர்வாகம் சார்பில் இரண்டு இடங்களில் படி வசதி ஏற்பாடு செய்யப்பட்டிருந்ததால் அனைத்து பொதுமக்களும் எளிதாக சென்று கோபுரங்கள் அருகில் சென்று தரிசனம் செய்தனர்.
கோவிலில் கூட்டம் அலை மோதியதால் நீண்ட வரிசையில் நின்று பக்தர்கள் சாமி தரிசனம் செய்தனர். ஆயிரக்கணக்கான பக்தர்களுக்கு கோவில் வளாகத்தில் அன்னதானம் வழங்கப்பட்டு வருகிறது. காவல்துறை சார்பில் பலத்த பாதுகாப்பு ஏற்பாடு செய்யப்பட்டிருந்தது.
விழாவில் அமைச்சர் அனிதா ராதாகிருஷ்ணன், பெருங்குளம் 103-வது செங்கோல் ஆதீனம் ஸ்ரீலஸ்ரீ சிவப்பிரகாச தேசிக சத்தியஞான பிரம்மச்சாரி சுவாமிகள், டி.சி.டபிள்யூ. நிறுவன மூத்த தலைவர் ஸ்ரீனிவாசன், தி.மு.க. மாணவரணி செயலாளர் உமரி சங்கர், ஆழ்வை கிழக்கு ஒன்றிய சதீஷ்குமார், ஆத்தூர் பேரூராட்சி மன்றத் தலைவர்கமால்தீன்,
புன்னைக்காயல் ஊராட்சி மன்ற தலைவர் சோபியா, ஆத்தூர் பேரூராட்சி தி.மு.க. செயலாளர் முருகானந்தம், இந்து அறநிலையத்துறை இணை ஆணையர் அன்புமணி, திருச்செந்தூர் சரக ஆய்வாளர் செந்தில்நாயகி, ஆத்தூர் சோமசுந்தரி அம்பாள் சமேத சோமநாத சுவாமி தேவஸ்தான செயல் அலுவலர் ஜெயந்தி, ஆத்தூர் இன்ஸ்பெக்டர் அய்யப்பன்,
ஆத்தூர் அ.தி.மு.க. அவைத் தலைவர் அண்ணாமலை சுப்பிரமணியன், ஆத்தூர் பேரூராட்சி முன்னாள் துணை தலைவர் ஆண்டிப்பட்டி என்ற கண்ணன், மற்றும் மண்டகப்படிதாரர்கள், கும்பாபிஷேக திருப்பணிகள் உபயதாரர்கள் மற்றும் திரளான பக்தர்கள் கலந்து கொண்டனர்.
