இசையமைப்பாளர், ராப் பாடகர், நடிகர், இயக்குனர் என பன்முகத்தன்மை கொண்டவர் ஹிப்ஹாப் ஆதி. இவர் ஆம்பள, தனி ஒருவன், அரண்மனை-2, கதகளி, கத்தி சண்டை, இமைக்கா நொடிகள், கோமாளி, ஆக்ஷன் உள்பட பல படங்களுக்கு இசைமைத்துள்ளார். இதனிடையே மீசையை முறுக்கு என்ற படத்தை இயக்கி, கதாநாயகனாகவும் அறிமுகமானார். தொடர்ந்து நட்பே துணை, நான் சிரித்தால், அன்பறிவு ஆகிய படங்களிலும் கதாநாயகனாக நடித்தார்.
இந்நிலையில் நெஞ்சமுண்டு நேர்மையுண்டு படத்தை இயக்கி பிரபலமான கார்த்திக் வேணுகோபாலன் இயக்கும் புதிய படத்தில் நடிக்கவுள்ளார். இந்த படத்தை எல்.கே.ஜி, கோமாளி, மூக்குத்தி அம்மன், வெந்து தணிந்தது காடு உள்ளிட்ட படங்களை தயாரித்த வேல்ஸ் பிலிம் இண்டர்நேஷனல் பட நிறுவனம் சார்பில் ஐசரி கணேஷ் தயாரிக்கிறார்.
இப்படத்திற்கு மஹேஷ் மாணிக்கம் ஒளிப்பதிவு செய்ய, பிரசன்னா படத்தொகுப்பை மேற்கொள்கிறார். இப்படத்தின் அறிவிப்பு வீடியோவைப் படக்குழு வெளியிட்டுள்ளது. அனிமேஷன் வடிவில் உருவாகியுள்ள இந்த அறிவிப்பு வீடியோ பள்ளிக்கதையை அடிப்படையாக கொண்டு உருவாகுவது போன்று இடம்பெற்றுள்ளது. மேலும் இந்த வீடியோ இணையத்தில் வைரலாகி வருகிறது. பெயரிடப்படாத இந்த படத்தில் நடிக்கும் பிற நடிகர்கள், நடிகைகள் மற்றும் தொழில்நுட்ப கலைஞர்கள் குறித்த அறிவிப்பு விரைவில் வெளியாகும் என தெரிவிக்கப்பட்டுள்ளது.
