வரும் 7ந் தேதி பிரதமர் மோடி வாரணாசி பயணம்- வளர்ச்சித் திட்டங்களுக்கு அடிக்கல்

பிரதமர் மோடி ஜூலை 7-ஆம் தேதி உத்தரப் பிரதேச மாநிலம் வாரணாசி செல்கிறார். பிற்பகல் 2 மணி அளவில், வாரணாசியின் எல்.டி. கல்லூரியில் சுமார் ஒரு லட்சம் மாணவர்களுக்கு மதிய உணவு வழங்கும் திறன் உள்ள அக்சய பாத்திர மதிய உணவு சமையல் கூடத்தை பிரதமர் திறந்து வைக்கிறார்.

தொடர்ந்து சர்வதேச ஒத்துழைப்பு மற்றும் மாநாட்டு மையத்தில் தேசியக் கல்விக் கொள்கை அமலாக்கம் குறித்து விவாதிக்கப்பட உள்ள அகில இந்திய கல்வி கூட்டத்தைத் பிரதமர் தொடங்கி வைக்கிறார்.

மாலை 4 மணிக்கு சிக்ராவில் உள்ள டாக்டர் சம்பூர்ணானந்த் விளையாட்டு மைதானத்தில் ரூ. 590 கோடி மதிப்பிலான வளர்ச்சித் திட்டங்களைப் பிரதமர் தொடங்கி வைப்பார். மேலும் ரூ. 1800 கோடி மதிப்பிலான பல்வேறு வளர்ச்சித் திட்டங்களுக்கு அவர் அடிக்கல் நாட்டவுள்ளார்.