புவனேஸ்வர்:
மேலாதிக்கவாதிகளின் அடக்குமுறைகளால் பாதிக்கப்படும் கீழ்த்தட்டு மக்களில் சிலர் இருவர்க்கத்துக்கும் இடையிலான இடைவெளியை குறைப்பதற்கு ஆயுத வன்முறையே சிறந்த தீர்வென கருதுகின்றனர்.
பல்லாண்டு காலமாக அரசிடம் போராடி பெறமுடியாத சில சலுகைகளையும் ஆயுதப் புரட்சியின்மூலம் அடைந்துவிட முடியும் என கருதும் இவர்கள் சத்தீஸ்கர், ஒடிசா, ஆந்திரா, ஜார்கண்ட், மணிப்பூர் உள்ளிட்ட சில மாநிலங்களில் நக்சலைட்களாகவும், மாவோயிஸ்ட்களாகவும், நாடெங்கிலும் உள்ள காடு, மலைகளில் பதுங்கி வாழ்ந்து வருகின்றனர்.
தொழிலதிபர்களை கடத்திச் சென்று பணம் பறிப்பது, பிணைத்தொகை கிடைக்காவிட்டால் சுட்டுக் கொல்வது, போலீஸ் உளவாளி என்று சந்தேகிக்கும் அப்பாவி மக்களை கொல்வது போன்ற கொடுஞ்செயல்களில் மாவோயிஸ்ட்டுகளும் நக்சலைட்டுகளும் ஈடுபடுகின்றனர்.
இவர்களை வேட்டையாட தனிப்படை பிரிவினர் தொடர்ந்து தேடுதல் வேட்டையில் ஈடுபட்டு வருகின்றனர். இந்த படையினருக்கு துணையாக மத்திய ரிசர்வ் போலீஸ் படையினரும் உடன் செல்வதுண்டு.
இந்நிலையில், ஒடிசா மாநிலத்தின் கலஹன்டி மாவட்டம், கோட்பன்டெல் கிராமத்தை ஒட்டியுள்ள காட்டுப் பகுதியில் சில மாவோயிஸ்ட்டுகள் பதுங்கி இருப்பதாக அம்மாவட்ட சிறப்பு படையினருக்கு ரகசிய தகவல் வந்தது. இதையடுத்து, நேற்று பின்னிரவு அப்பகுதியை சிறப்பு படையினர் சுற்றி வளைத்தனர்.
அங்கு மறைந்திருந்த மாவோயிஸ்ட்டுகள் சிறப்பு படையினர் மீது துப்பாக்கிகளால் சுட்டு தாக்குதல் நடத்தினர். இருதரப்பினருக்கும் இடையில் வெடித்த துப்பாக்கிச் சண்டையில் மாவோயிஸ்ட்டுகளில் ஒருவன் கொல்லப்பட்டான். மற்றவர்கள் அங்கிருந்து தப்பியோடி விட்டனர்.
