சென்னை மெரினா கடற்கரையில் தடையை மீறி குவிந்த மக்கள்

சென்னை:

தமிழகத்தில் கொரோனா 2-வது அலையின் தீவிரம் குறைந்துவரும் நிலையில் ஊரடங்கில் தொடர்ந்து தளர்வுகளை அரசு அறிவித்து வருகிறது. இதன் ஒரு கட்டமாக கொரோனா பாதிப்பு குறைந்த மாவட்டங்களில் உள்ள கடற்கரைகளில் நடைபயிற்சி மேற்கொள்ள மட்டும் அனுமதி வழங்கப்பட்டு இருக்கிறது. அதன்படி அதிகாலை 5 மணி முதல் காலை 9 மணி வரை நடைபயிற்சி மேற்கொள்ள பொதுமக்களுக்கு அனுமதி வழங்கப்பட்டுள்ளது.


இந்தநிலையில் ஞாயிற்றுக்கிழமை விடுமுறை நாளான நேற்று காலை முதலே மெரினா கடற்கரை நோக்கி மக்கள் படையெடுத்து வந்தனர். இதனால் சர்வீஸ் சாலை முழுவதும் மக்கள் நடமாட்டம் அதிகளவில் காணப்பட்டது. இந்தநிலையில் மாலை வேளையில் தடையை மீறி மணற்பரப்பில் மக்கள் குவியத் தொடங்கினர். நேரம் செல்லச் செல்ல வழக்கத்தைவிட மக்கள் கூட்டம் அதிகமானது.

இதனால் இது கொரோனா தாக்கம் நிலவும் காலமா அல்லது காணும் பொங்கல் தினமா என்று யோசிக்கும் அளவுக்கு தடையை மீறி பொதுமக்கள் மெரினாவில் உற்சாகமாக வலம் வரத் தொடங்கினர். கடல் அலையில் உற்சாகமாக நனைந்தும், குளித்தும் ஆர்ப்பரித்தனர். இத்தனை நாட்களாக மனித நடமாட்டமின்றி வெறிச்சோடி இருந்த கடற்கரை மணற்பரப்பு நேற்று ஒரே நாளில் வழக்கமான நிலைக்கு வந்துவிட்டதோ என்று எண்ணும் அளவுக்கு மக்கள் நடமாட்டம் மிகுந்து காணப்பட்டது.

அதையடுத்து போலீசார், மணற்பரப்பில் குவிந்திருந்த பொதுமக்களுக்கு எச்சரிக்கை விடுத்து அங்கிருந்து வெளியேற்றும் பணியில் ஈடுபட்டனர். சுமார் ஒரு மணி நேரத்துக்கு பிறகுதான் கடற்கரையில் ஓரளவு மக்கள் கூட்டத்தை கட்டுப்படுத்த முடிந்தது. தொடர்ந்து போலீசார் போராடி மக்களை அங்கிருந்து வெளியேறச் செய்தனர்.