கள்ளக்குறிச்சியில் பா.ஜ.க.-விடுதலை சிறுத்தைகள் கட்சியினர் வாக்குவாதம்

கள்ளக்குறிச்சி:

கள்ளக்குறிச்சி கச்சேரி சாலையில் பா.ஜ.க. சார்பில் மாவட்ட தலைவர் பாலசுந்தரம் தலைமையில் பெண்களை இழிவு படுத்தி பேசியதாக விடுதலை சிறுத்தைகள் கட்சி தலைவர் திருமாவளவனை கண்டித்து ஆர்ப்பாட்டம் செய்தனர். அப்போது பா.ஜ.க.வினர் திருமாவளவனை கண்டித்து கோஷம் எழுப்பினர். 

இதை அறிந்து அங்கு வந்த விடுதலை சிறுத்தைகள் கட்சியினர் பா.ஜ.க.வினரை கண்டித்து கோஷம் எழுப்பினர். இதனால் பா.ஜ.க.வினருக்கும், விடுதலை சிறுத்தைகள் கட்சியினருக்கும் இடையே கடும் வாக்குவாதம் ஏற்பட்டது. இதைப்பார்த்து அங்கே பாதுகாப்பு பணியில் இருந்த போலீசார் இருதரப்பினரையும் தடுத்து நிறுத்தினர். 

பின்னர் அனுமதி இல்லாமல் ஆர்ப்பாட்டத்தில் ஈடுபட்டதாக பா.ஜ.க. மாவட்டத் தலைவர் பாலசுந்தரம் உள்பட 36 பேரை கைது செய்து தனியார் மண்டபத்தில் அடைத்து வைத்து பின்னர் விடுவித்தனர். பா.ஜ.க., விடுதலை சிறுத்தைகள் கட்சியினரிடையே ஏற்பட்ட வாக்குவாதத்தால் கள்ளக்குறிச்சியில் சிறிது நேரம் பரபரப்பு ஏற்பட்டது.