புதுடெல்லி:
இங்கிலாந்து மற்றும் அயர்லாந்து ஆகிய நாடுகளுக்கு சுற்றுப்பயணம் மேற்கொள்ளும் இந்திய கிரிக்கெட் அணி, அயர்லாந்து அணிக்கு எதிராக 2 டி-20 போட்டியிலும், இங்கிலாந்து அணிக்கு எதிராக 3-டி-20, 3 ஒருநாள் மற்றும் 5 டெஸ்ட் போட்டிகள் கொண்ட தொடரில் விளையாடுகிறது.
இந்த போட்டிகளுக்காக தயாராகும் வகையில் இந்திய அணியின் கேப்டன் விராட் கோலி, கவுண்டி கிரிக்கெட்டில் சர்ரே அணிக்காக விளையாடுவதாக இருந்தது. ஆனால், ஐபிஎல் தொடரின் போது ஏற்பட்ட காயத்தில் இருந்து முழுமையாக குணமடைய கால அவகாசம் தேவைப்படுவதால் அவர் கவுண்டி போட்டியில் பங்கேற்கவில்லை. கோலி, தற்போது பெங்களுருவில் உள்ள தேசிய கிரிக்கெட் அகாடமியில் பயிற்சி மேற்கொண்டு வருகிறார்.
இந்நிலையில் இங்கிலாந்து நாட்டில் சாதிக்க, அங்குள்ள தன்மைக்கு ஏற்ப கோலி விரைவாக மாறுவது மிகவும் அவசியம் என முன்னாள் ஆஸ்திரேலிய வேகப்பந்துவீச்சாளர் கிளென் மெக்ராத் தெரிவித்துள்ளார்.
இதுகுறித்து அவர் கூறியதாவது:-
கோலி இப்போது மிகவும் அனுபவம் வாய்ந்த வீரராக உள்ளார். தரமான வீரர் என்பதில் எந்த சந்தேகமும் இல்லை. ஆனால் இங்கிலாந்து நிலைமைகள் மிகவும் கடினமானவை. ஆண்டர்சன் போன்ற ஒரு சிறந்த பந்துவீச்சாளர் இருக்கும் போது, அது எதிரணிக்கு கடினமான வேலை இருக்கும். நீங்கள் கடுமையாக உழைக்க தயாராக இருக்க வேண்டும். கோலி ஒரு தரம் வாய்ந்த வீரர், எனவே ஒரு நல்ல போட்டியை காண காத்திருக்கிறேன்.
எப்போதும் உங்கள் சிறந்த பேட்ஸ்மேன் சரியாக விளையாட வேண்டும். இது, மற்ற பேட்ஸ்மேன்கள் சரியாக விளையாடுவதற்கு ஒரு வாய்ப்பை அளிக்கும், இந்திய அணியில் சில தரமான பேட்ஸ்மேன்கள் உள்ளனர், இந்திய அணியில் சில தரமான வீரர்கள் இருக்கிறார்கள். இந்தியாவை பொறுத்தவரை ஒரு வீரரை நம்பி இருந்தால் அவர்கள் தவறு செய்கிறார்கள்.
நிறைய விசயங்கள் வீரர்கள் எப்படி தன்மைக்கு ஏற்ப மாறுகிறார்கள் என்பதை சார்ந்துள்ளது என நினைக்கிறேன். இந்த நாட்களில் நீங்கள் விரைவாக தன்மைக்கு ஏற்ப மாற வேண்டும். என் காலத்தில், இரண்டு அல்லது மூன்று வெளிநாட்டு போட்டிகள் தான் கிடைக்கும். எனவே நாங்கள் மிக விரைவாக தன்மைக்கு ஏற்ப மாற வேண்டும். வெளிப்படையாக, உண்மையில் நிலைமைகள் பயன்படுத்த போதுமான வெளிநாட்டு போட்டிகள் எங்களுக்கு கிடைப்பதில்லை. நாங்கள் கடந்த கால அனுபவத்தை மட்டுமே நம்பியிருக்க வேண்டும்.
இவ்வாறு அவர் கூறியுள்ளார். #GlennMcGrath ViratKohli #INDvENG
