பெரும்பாறை:
கொடைக்கானல் அருகே உள்ள பி.எல்.செட்டு பகுதியை சேர்ந்தவர் சசிக்குமார் (வயது 37). கூலித்தொழிலாளி. இவருக்கும், நல்லூர் காட்டு வளவு பகுதியை சேர்ந்த செல்வராணி (25) என்பவருக்கும் கடந்த 2 ஆண்டுகளுக்கு முன்பு திருமணம் நடந்தது. குடிப்பழக்கத்துக்கு அடிமையான சசிக்குமார், தனது மனைவியுடன் அடிக்கடி தகராறில் ஈடுபட்டு வந்தார். இதனால் கோபித்து கொண்டு செல்வராணி தனது பெற்றோர் வீட்டுக்கு சென்றுவிட்டார்.
இந்த நிலையில் தனது மனைவியை அழைத்து செல்வதற்காக மாமனார் வீட்டுக்கு பஸ்சில் சென்று கொண்டிருந்தார். அப்போது, தனது செல்போனுக்கு வந்த முகநூல் (பேஸ்புக்) பதிவை பார்த்து கொண்டிருந்தார். அதில், தனது மனைவிக்கு அதே பகுதியை சேர்ந்த வாலிபர் ஒருவர் முத்தமிடும் புகைப்படம் இருப்பதை கண்டு அதிர்ச்சி அடைந்தார். இதனால் மனம் உடைந்த அவர், கே.சி.பட்டியில் பஸ்சை விட்டு கீழே இறங்கினார். பின்னர் அங்கு பூச்சிக்கொல்லி மருந்தை (விஷம்) வாங்கி குடித்தார்.
பின்னர் மாமனார் வீட்டுக்கு சென்ற அவர், தனது மனைவியிடம் இதுதொடர்பாக கேட்டார். அவரும், அந்த படத்தை உறுதி செய்வது போல பேசியதாக தெரிகிறது. சிறிதுநேரத்தில் சசிக்குமார் மயங்கி விழுந்தார். அக்கம்பக்கத்தினர் அவரை மீட்டு சிகிச்சைக்காக மதுரை அரசு மருத்துவமனையில் சேர்த்தனர். அங்கு சிகிச்சை பலனின்றி சசிக்குமார் பரிதாபமாக இறந்தார். இதுகுறித்து தாண்டிக்குடி போலீசார் வழக்குப்பதிவு செய்து விசாரணை நடத்தி வருகின்றனர்.
