சென்னை:
பல ஆண்டுகளாக அரசியலுக்கு வருவார் என எதிர்ப்பார்க்கப்பட்ட நடிகர் ரஜினிகாந்த் சமீபத்தில் தாம் அரசியலுக்கு வருவதாக அறிவித்து இருந்தார். இதையடுத்து அவரது ரசிகர்கள் உற்சாகமடைந்தனர். மேலும், மாநிலம் முழுவதும் தனது ரசிகர் மன்றங்கள் ரஜினி மக்கள் மன்றங்களாக மாற்றப்பட்டது.
மேலும், அடுத்தடுத்து அதிரடியாக அவரது அரசியல் வரவு இருக்கும் என எதிர்ப்பார்க்கப்பட்ட நிலையில், அவர் திரைப்படங்களிலேயே ஓய்வின்றி இருந்தார். அவ்வப்போது செய்தியாளர்களை சந்திப்பதும், மாவட்ட நிர்வாகிகளுடன் ஆலோசனை செய்வதுமாய் இருந்துவந்தார்.
இதையடுத்து, சமீபத்தில் அவரது ராகவேந்திரா திருமண மண்டபத்தில் மாவட்ட நிர்வாகிகளுடனான கூட்டம் தொடர்ந்து நடைபெற்றது. மேலும் அவர் பேட்ட படத்தின் படப்பிடிப்பு முடிந்ததும் கட்சி பணிகளில் தீவிரமாக இறங்குவார் எனவும், தனது பிறந்தநாளான டிசம்பர் 12-ம் தேதி கட்சி குறித்து அறிவிப்பு வெளியிடுவார் எனவும் எதிர்ப்பார்க்கப்பட்டது.
இந்நிலையில், பேட்ட படத்தின் படப்பிடிப்பு முடிவடைந்து இன்று சென்னை திரும்பிய நடிகர் ரஜினிகாந்த், சென்னை விமான நிலையத்தில் செய்தியாளர்களை சந்தித்தார். அப்போது பேசிய அவர், கட்சிப்பணிகள் 90 சதவிகிதம் நிறைவடைந்ததாக தெரிவித்தார்.
ஆனால், டிசம்பர் 12 அன்று கட்சி குறித்த அறிவிப்புகள் இல்லை என நடிகர் ரஜினிகாந்த் திட்டவட்டமாக தெரிவித்தார். #Rajini
