ஈரோடு:
மறைந்த திமுக தலைவர் கருணாநிதி பெயரை ஈரோட்டில் உள்ள மேட்டூர் சாலைக்கு சூட்ட வேண்டும் என்று தெற்கு மாவட்ட தி.மு.க. செயற்குழுக் கூட்டத்தில் தீர்மானம் நிறைவேற்றப்பட்டது.
ஈரோடு தெற்கு மாவட்ட தி.மு.க. செயற்குழுக் கூட்டம் ஈரோடு மணல்மேட்டில் உள்ள கட்சி அலுவலகத்தில் நடந்தது. கூட்டத்திற்கு அவைத் தலைவர் குமார் முருகேஷ் தலைமை தாங்கினார். மாவட்ட செயலாளர் சு.முத்துசாமி வாழ்த்தி பேசி தீர்மானங்களை வாசித்தார்.
கூட்டத்தில் தலைவர் கருணாநிதி மறைந்தது நம்மை மீளா துயரில் ஆழ்த்தியுள்ளது. அவரின் மறைவிற்கு ஆழ்ந்த இரங்கலை தெரிவித்துக் கொள்வது. கருணாநிதி மறைவுக்குப் பிறகு கழகத்தைக் கட்டிக் காத்து வழிநடத்த 1½ கோடி தொண்டர்களின் ஒட்டுமொத்த முடிவு மற்றும் பொதுமக்களின் எதிர்பார்ப்பும் நிறைவேற்றிட செயல் தலைவர் மு.க.ஸ்டாலின் திமுகவின் தலைவராக பொறுப்பேற்க தெற்கு மாவட்ட திமுக செயற்குழு ஒருமனதாக முன்மொழிகிறது.
ஈரோடு தெற்கு மாவட்ட தி.மு.க சார்பில் கருணாநிதிக்கு சிலை அமைக்க வேண்டி மாநகராட்சி ஆணையாளருக்கு கடந்த 10-ம் தேதி கடிதம் கொடுக்கப்பட்டுள்ளது. அரசு சிலை நிறுவுவதற்கு அனுமதி கொடுக்க வேண்டும்.
கருணாநிதியை பெருமைப்படுத்தும் வகையில் ஈரோட்டில் உள்ள மேட்டூர் ரோடு அல்லது சக்தி ரோட்டிற்கு அவரது பெயரை சூட்ட வேண்டும் என்பன உள்பட பல்வேறு தீர்மானங்கள் நிறைவேற்றப்பட்டன.
