குழந்தைகளுக்குப் புற்றுநோய் வருவதற்கான காரணமென்பது, புரியாத புதிர்தான். பெரியவர்களுக்கு வருவதற்கு வாழ்வியல் மாற்றங்கள், அதிக உடல் எடை, மோசமான உணவு முறைகள், மது-புகை போன்ற பழக்கங்கள் காரணங்களாக இருக்கின்றன. இவற்றில் எதையுமே அறியாதவர்கள் குழந்தைகள். யூகத்தின் அடிப்படையில், சில காரணங்களை மருத்துவர்கள் குறிப்பிடுகிறார்கள்.
மேற்கூறிய பழக்கங்கள் பெற்றோருக்கு இருப்பது குழந்தையின் உடலில் மாற்றத்தை ஏற்படுத்தும். அந்த மாற்றங்கள் புற்றுநோய்க்கு வழிவகுக்கக்கூடும். குழந்தையை அதிகக் கதிர்வீச்சுக்கு உட்படுத்தும் சூழல் ஏற்பட்டாலும் புற்றுநோய் வரலாம். புதிதாக உருவாகும் டி.என்.ஏ என்பது, ஏதோவொரு டி.என்.ஏ-வின் நகலாகத்தான் இருக்கும். அப்படி நகல் எடுத்தலில் சிக்கல் ஏற்பட்டால், கேன்சர் உருவாகும். இதை, `Gene Mutation’ என்பார்கள்.
குழந்தைகளைத் தாக்கும் முக்கியமான புற்றுநோய்கள்:
* லுகேமியா (Leukemia) - எலும்பு மற்றும் ரத்தத்தில் வரும் புற்றுநோய் வகை.
* மூளைக்கட்டிகள்
* நியூரோப்ளாஸ்டோமா (Neuroblastoma)
* லிம்போமா (Lymphoma)
* தசை மற்றும் வயிற்றுப் பகுதியில் வருவது (Abdominal tumours, muscle and bone tumours).
சிகிச்சைகள் :
கீமோதெரபி (Chemotherapy)
அறுவைசிகிச்சை
ரேடியோதெரபி
மருத்துவ கவுன்சலிங் (பெற்றோருக்கும் குழந்தைக்கும்).
குழந்தைகளுக்கான புற்றுநோய்... சில உண்மைகள் :
* பாதிப்பின் நிலையைப் பொறுத்து, பூரண குணமடைதலுக்கான சதவிகிதம் அமையும். முதல் நிலையிலேயே புற்றுநோயைக் கண்டுபிடித்துவிட்டால், எளிதான சிகிச்சைகளிலேயே குணப்படுத்திவிடலாம்.
* புற்றுநோய், தொற்றுநோய் அல்ல என்கிற அடிப்படை விழிப்புஉணர்வு பெரும்பாலான பெற்றோரிடம் இல்லை.
* மரபணு வழியான புற்றுநோய் பாதிப்பு, சிலருக்கே ஏற்படும்.
