திருப்பதி கோவில் தெப்ப உற்சவம் 2-வது நாள்: ஸ்ரீகிருஷ்ணர், ருக்மணி 3 சுற்றுகள் பவனி

திருப்பதி ஏழுமலையான் கோவிலில் வருடாந்திர தெப்ப உற்சவம் தொடங்கி கோலாகலமாக நடந்து வருகிறது. 2-வது நாளான நேற்று மாலை 5 மணியளவில் கோவிலில் இருந்து உற்சவர்களான மலையப்பசாமி, ஸ்ரீகிருஷ்ணர், ருக்மணி ஆகியோர் சிறப்பு அலங்காரத்தில் எழுந்தருளி நான்கு மாடவீதிகளில் உலா வந்து பக்தர்களுக்கு அருள்பாலித்தனர்.

உற்சவ மூர்த்திகளில் ஸ்ரீகிருஷ்ணர், ருக்மணி ஆகியோர் மட்டும் தெப்பத்தில் எழுந்தருளி மாலை 6.30 மணியில் இருந்து இரவு 7 மணிவரை 3 சுற்றுகள் பவனி வந்து பக்தர்களுக்கு அருள் பாலித்தனர். தெப்ப உற்சவத்தின் 3-வது நாளான இன்று (செவ்வாய்க்கிழமை) இரவு 7 மணியில் இருந்து 8 மணிவரை உற்சவர்களான ஸ்ரீதேவி, பூதேவி சமேத மலையப்பசாமி கோவிலின் நான்கு மாடவீதிகளில் ஊர்வலமாக வந்து தெப்பத்தில் எழுந்தருளி 3 சுற்றுகள் பவனி வந்து பக்தர்களுக்கு அருள்பாலிக்கின்றனர்.