நெல்லை:
பேட்டை ரூரல் பஞ்சாயத்துக்குட்பட்ட கோடீஸ்வரன் நகர் பகுதியில் 500-க்கும் மேற்பட்ட வீடுகள் உள்ளன.
இந்த வீடுகளில் தினமும் தேங்கும் குப்பைகளை பஞ்சாயத்து தூய்மைப் பணியாளர்கள் மூலம் சேகரித்து அப்புறப்படுத்தி வந்துள்ளனர்.
ஆனால் கடந்த சில நாட்களாக குப்பைகளை எடுக்க யாரும் வரவில்லை. இதுகுறித்து அப்பகுதி பொதுமக்கள் புகார் கூறியும் எந்த நடவடிக்கையும் எடுக்கப்பட வில்லை என கூறப்படுகிறது.
இதைத்தொடர்ந்து அப்பகுதி பொதுமக்கள் இன்று குப்பைகளை தாங்களே அகற்றினர். இதுகுறித்து அப்பகுதி பொதுமக்கள் கூறியதாவது:-
இங்கு கடந்த ஒரு மாத காலமாக குப்பைகள் மலைபோல் தேங்கி உள்ளது.இதனால் தொற்று நோய் பரவும் அபாயம் உள்ளது. இந்த குப்பைகளை பஞ்சாயத்து மூலம் அகற்றுவதற்கு எந்தவித நடவடிக்கையும் எடுக்கவில்லை.
எனவே இன்று நாங்களே குப்பைகளை அகற்றும் பணியில் களமிறங்கி உள்ளோம். மாவட்ட நிர்வாகம் இது குறித்து உடனடியாக தக்க நடவடிக்கை எடுக்க வேண்டும்.
அவ்வாறு நடவடிக்கை எடுக்காவிட்டால் பொதுமக்களை திரட்டி சாலை மறியல் போராட்டம் நடத்துவோம்.
இவ்வாறு அவர்கள் கூறினர்.
