லைவ் அப்டேட்ஸ்: ஒரு காமெடியன் திருப்பி அடிப்பான் என யாரும் நினைக்கவில்லை- உக்ரைன் அதிபர்

நடப்பாண்டில் எரிசக்தி ஏற்றுமதியில் பெரிய முன்னேற்றத்தை ரஷிய அடையும் என்று அந்நாட்டு வெளியுறவு மந்திரி செர்ஜி லாவ்ரோவ், தெரிவித்துள்ளார். செர்பியா தொலைக்காட்சிக்கு அவர் அளித்துள்ள பேட்டியில், ஐரோப்பிய யூனியன் விதித்துள்ள பொருளாதாரத் தடைகள் ரஷியாவின் எண்ணெய் ஏற்றுமதியில் எந்த விளைவையும் ஏற்படுத்தாது என்று கூறினார். அதற்கு மாறாக இந்த ஆண்டு எங்கள் எரிசக்தி வளங்களின் ஏற்றுமதியிலிருந்து லாபத்தை கணிசமாக அதிகரித்துள்ளோம் என்றும் அவர் குறிப்பிட்டுள்ளார்.

உக்ரைனுக்கு அமெரிக்கா வழங்கிய ஆயுதங்களை ரஷியா அழித்து விட்டதாக அந்நாட்டு அதிபர் புதின் தெரிவித்துள்ளார். ரஷிய தேசிய தொலைக்காட்சிக்கு புதின் அளித்த பேட்டியில் உக்ரைனுக்கு புதிய ஆயுதங்களை அனுப்பும் அமெரிக்காவின் நடவடிக்கையை ரஷியா எளிதாக சமாளித்து வருவதாக தெரிவித்துள்ளார். ஏற்கனவே அமெரிக்கா வழங்கிய ஆயுதங்களை டஜன் கணக்கில் ரஷியா அழித்து விட்டதாக அவர் குறிப்பிட்டுள்ளார்.

உக்ரைன் தலைநகர் கீவ்வில் இந்திய தூதரகத்தை மீண்டும் திறக்க மத்திய அரசு முடிவு செய்துள்ளது. இதையடுத்து உக்ரைனுக்கான புதிய இந்திய தூதர் ஹர்ஷ் ஜெயின், அதிபர் ஜெலென்ஸ்கியை சந்தித்து பேச உள்ளதாக தகவல்கள் வெளியாகி உள்ளன. இந்நிலையில், சுதந்திரம் மற்றும் சுதந்திரத்தின் மீதான நம்பிக்கையால் உக்ரைனும் இந்தியாவும் ஒன்றுபட்டுள்ளன என்று ஜெலன்ஸ்கி குறிப்பிட்டுள்ளார். பலம் என்பது பயம் இல்லாத நிலையில் உள்ளது என்றும், நம் உடலில் உள்ள தசைகளின் எண்ணிக்கையில் அல்ல என்றும் அவர் கூறியுள்ளார். முதலில் அவர்கள் உங்களைப் புறக்கணிக்கிறார்கள், பின்னர் அவர்கள் உங்களைப் பார்த்து சிரிக்கிறார்கள், பின்னர் அவர்கள் உங்களுடன் சண்டையிடுகிறார்கள், பின்னர் நீங்கள் வெற்றி பெறுவீர்கள் என்று மகாத்மா காந்தியின் வார்த்தைகளை ஜெலன்ஸ்கி மேற்கோள் காட்டியதாக அதிபர் மாளிகை தகவல்கள் தெரிவித்துள்ளன.

உக்ரைன் ராணுவ விமானத்தை சுட்டு வீழ்த்தியதாக ரஷியா தெரிவித்துள்ளது. கருங்கடல் துறைமுகமான ஒடேசா அருகே ஆயுதங்கள் மற்றும் வெடிமருந்துகளை ஏற்றிச் சென்ற உக்ரைன் ராணுவ போக்குவரத்து விமானத்தை ரஷ்யாவின் படைகள் சுட்டு வீழ்த்தியதாக ரஷிய பாதுகாப்பு அமைச்சகம் குறிப்பிட்டுள்ளது. மேலும் உக்ரைனின் சுமி பிராந்தியத்தில் வெளிநாட்டு ராணுவ பயிற்சியாளர்கள் பணியாற்றிய பீரங்கி பயிற்சி மையத்தையும் ரஷிய ஏவுகணைகள் தாக்கியதாகவும் கூறப்பட்டுள்ளது.