அலபாமா:
அமெரிக்காவின் தெற்கு பகுதியில் அலபாமா மாகாணம் அமைந்துள்ளது. அம்மாகாணத்தின் தலைநகரான மாட்கோமரி நகரில் அலபாமா மாநில பல்கலைக்கழகம் உள்ளது.
இன்று அப்பல்கலைக்கழகத்திற்கு அருகில் வந்த மர்ம நபர் ஒருவர் தான் மறைத்து வைத்திருந்த துப்பாக்கியைக்கொண்டு அப்பகுதியில் இருந்த மக்கள் மீது சரமாரியாக சுட்டார். இதை சற்றும் எதிர்பாராத மக்கள் அலறியடித்துக்கொண்டு ஒடினர்.
இந்த தாக்குதலில் 2 பேர் பரிதாபமாக உயிரிழந்தனர். மேலும் 3 நபர்கள் படுகாயங்களுடன் உயிருக்கு போராடிக்கொண்டிருந்தனர். இதுகுறித்து தகவல் அறிந்த போலீசார் சம்பவ இடத்துக்கு விரைந்து சென்று துப்பாக்கிச்சூட்டில் காயமடைந்த நபர்களை மீட்டு சிகிச்சைக்காக மருத்துவமனைக்கு அனுப்பிவைத்தனர்.
இதையடுத்து, துப்பாக்கிச்சூடு நடத்திவிட்டு தப்பி சென்ற மர்ம நபரை தீவிரமாக தேடிவருவதாக போலீசார் தெரிவித்துள்ளனர். அமெரிக்காவில் தொடர்ச்சியாக துப்பாக்கிச்சூடு சம்பவங்கள் நடைபெற்று வருவது குறிப்பிடத்தக்கது.
