ஹனோய்:
தென்கிழக்கு ஆசிய கண்டத்தில் தெற்கு சீனக் கடல் பகுதியின் அருகாமையில் அமைந்துள்ள அழகிய நாடு வியட்நாம். இந்த நாட்டின் ஆட்சி முறையில் ஒருநபர் அதிகாரம் என்பது கிடையாது.
அதிபர், பிரதமர், கம்யூனிஸ்ட் கட்சி செயலாளர் மற்றும் பாராளுமன்ற உறுப்பினர்கள் என இந்த நான்கு தரப்பினரின் கைகளிலும் அதிகாரம் பரவலாக்கப்பட்டுள்ளது.
வியட்நாம் நாட்டின் அதிபராக பதவி வகித்த டிரான் டாய் குவாங் உடல்நலக்குறைவால் கடந்த மாதம் காலமானார். இதைதொடர்ந்து அந்நாட்டு பாராளுமன்றத்தில் பெரும்பான்மையான உறுப்பினர்களால் இன்று தேர்வு செய்யப்பட்ட ந்குயேன் ஃபு டிராங்(74) வியட்நாம் புதிய அதிபராக பதவி ஏற்று கொண்டார்.
கம்யூனிச சித்தாந்தத்தில் அதிக பிடிப்புள்ள ந்குயேன் ஃபு டிராங், கடந்த 1997-ம் ஆண்டில் அக்கட்சியின் தேசிய பொதுக்குழு உறுப்பினரானார். 2011-ம் ஆண்டில் பொதுச் செயலாளராக தேர்வு செய்யப்பட்டார். பின்னர் 2016-ம் ஆண்டில் அவரது பதவிக்காலம் மேலும் ஐந்தாண்டுகளுக்கு நீட்டிக்கப்பட்டது.
வியட்நாம் கம்யூனிஸ்ட் கட்சியின் நிறுவனரும் முன்னாள் அதிபருமான ஹோ சி மின்ஹ் மறைவுக்குப் பிறகு கட்சியின் பொதுச் செயலாளர் பதவியையும், அதிபர் பதவியையும் ஒருசேர வகிப்பவர் ந்குயேன் ஃபு டிராங் மட்டுமே என்பது குறிப்பிடத்தக்கது. #NguyenPhuTrong #Vietnampresident
