மேட்டூர் அணை நீர்மட்டம் 5 நாளில் 5 அடி சரிவு

மேட்டூர்:

காவிரி நீர்பிடிப்பு பகுதிகளில் மழை குறைந்ததால் மேட்டூர் அணைக்கு நீர்வரத்து படிப்படியாக சரிந்து வருகிறது.

கடந்த 26-ந்தேதி 4,406 கன அடியாக இருந்த நீர்வரத்து நேற்று 2,538 கன அடியாக சரிந்தது. இன்று நீர்வரத்து சற்று அதிகரித்து 3,012 கன அடியாக வந்து கொண்டிருக்கிறது.

அணையில் இருந்து பாசனத்திற்காக காவிரி ஆற்றில் 17 ஆயிரம் கன அடி தண்ணீரும், கால்வாயில் 850 கன அடி தண்ணீரும் திறந்து விடப்பட்டுள்ளது.

அணைக்கு வரும் தண்ணீரை விட அணையில் இருந்து கூடுதல் தண்ணீர் திறந்து விடப்படுவதால் அணையின் நீர்மட்டம் ஒரு நாளைக்கு ஒரு அடிக்கு மேல் சரிந்து வருகிறது.

கடந்த 26-ந் தேதி 103.7 அடியாக இருந்த மேட்டூர் அணையின் நீர்மட்டம் படிப்படியாக சரிந்து நேற்று 99.88 அடியாக இருந்தது. இன்று நீர்மட்டம் மேலும் ஒரு அடி சரிந்து 98.87 அடியாக இருந்தது. இனி வரும் நாட்களில் மேட்டூர் அணை நீர்மட்டம் மேலும் வேகமாக சரிய வாய்ப்புள்ளது. #MetturDam