சண்டிகர்:
நாட்டில்
கொரோனா-வைரஸ் தொற்று இரண்டாவது அலை வேகம் தணிந்து வந்தாலும், முழுமையாக கட்டுக்குள் வராத நிலையில் அதுதொடர்பான ஊரடங்கை மாநில அரசுகள் நீட்டித்து வருகின்றன.
இந்நிலையில், பஞ்சாப் மாநிலத்தில்
ஊரடங்கு வரும் 15-ம் தேதி வரை நீட்டிக்கப்படுவதாகவும், கடைகளை மாலை 6 மணி வரை திறந்திருக்க அனுமதிப்பது உள்ளிட்ட தளர்வுகள் அளிக்கப்படுவதாகவும் முதல் மந்திரி அமரீந்தர் சிங் அறிவித்தார்.
சனிக்கிழமை உள்ளிட்ட வார நாட்களில் இரவு நேர ஊரடங்கு இரவு 7 மணி முதல் காலை 6 மணி வரை தொடர்ந்து அமலில் இருக்கும் எனவும், ஞாயிற்றுக்கிழமைகளில் முழுநேர ஊரடங்கு அமல்படுத்தப்படும் எனவும் அவர் தெரிவித்தார்.
இதேபோல், உத்தரகாண்ட் மாநிலத்தில் தற்போதைய ஊரடங்கு இன்று (ஜூன் 8-ந் தேதி) காலை 6 மணிக்கு முடிவுக்கு வரும் நிலையில், அம்மாநிலத்தில் மேலும் ஒரு வாரத்துக்கு ஊரடங்கை நீட்டித்து உத்தரவிடப்பட்டுள்ளது. வரும் 15-ம் தேதி காலை 6 மணி வரை சில தளர்வுகளுடன் ஊரடங்கு அமலில் இருக்கும் என மாநில தலைமைச் செயலாளர் ஓம் பிரகாஷ் வெளியிட்ட உத்தரவில் தெரிவித்தார்.
