நாகப்பட்டினம்

தலைஞாயிறு:

நாகை மாவட்டம் தலைஞாயிறை அடுத்த கரியாப்பட்டினம் அருகே உள்ள கீழகாடுவைச் சேர்ந்தவர் கருணாநிதி. இவரது மகள் மைதிலி (வயது 18). கரியாப்பட்டினத்தில் உள்ள தனியார் கல்லூரியில் பி.ஏ 2-ம் ஆண்டு படித்து வருகிறார்.

இவர் கடந்த மார்ச் 17-ந் தேதி கல்லூரி முடிந்து மாலை வீட்டிற்கு செல்ல கரியாப்பட்டினம் பஸ் நிலையத்தில் நின்று கொண்டிருந்தார். அப்போது அங்கு மோட்டார் சைக்கிளில் ஒரு நபர் மைதிலி அருகே வந்து ஒரு பெண்ணின் பெயரை கூறி அவரை தெரியுமா என்று கேட்டுள்ளார். அதற்கு மைதிலி பதில் கூறியபோது திடீரென மைதிலி கழுத்தில் கிடந்த 2 பவுன் செயினை பறித்து தப்பி விட்டு சென்றார்.

இதுகுறித்து கருணாநிதி கரியாப்பட்டினம் போலீசில் புகார் செய்தார். அதன்பேரில் போலீசார் வழக்கு பதிவு செய்து அந்த நபரை தேடி வந்தனர்.

இந்நிலையில் செம்போடை கடை தெருவில் சந்தேகப்படும்படி நின்ற ஒரு நபரை பிடித்து போலீசார் விசாரணை நடத்தினர். இதில் அந்த நபர் மைதிலிடம் செயினை பறித்தவர் என தெரியவந்தது. இதையடுத்து அந்த நபர் குறவகுளத்தை சேர்ந்த வேதையன் மகன் சவுந்தர்ராஜன் (35) என தெரியவந்தது. பின்னர் அவரிடம் இருந்த 2 பவுன் செயினை போலீசார் பறிமுதல் செய்தனர்.

வேதாரண்யம்:

வேதாரண்யம் இன்ஸ்பெக்டர் முருகவேலு மற்றும் போலீசார் இரவு வாகன சோதனையில் ஈடுபட்ட போது வேதாரண்யம் கரியாப்பட்டினம் சாலையில் வேகமாக வந்த ஒரு டிராக்டரை நிறுத்தி சோதனை செய்ததில் எந்தவித அனுமதியும் இல்லாமல் மணல் அள்ளி கடத்தியது தெரியவந்தது.

இதைத்தொடர்ந்து அந்த டிராக்டரை பறிமுதல் செய்து டிரைவர் மதியழகன் (39) என்பவரை கைது செய்து விசாரணை நடத்தினர்.

கீழ்வேளூர்:

நாகையை அடுத்த வேளாங்கண்ணியில் செயல்படும் டாஸ்மாக் மதுபான கடையில் நேற்று இரவு 9.30 மணியளவில், சூப்பர்வைசர் பாஸ்கரன், சேல்ஸ்மேன்கள் பிரபாகரன், லெட்சுமணன், ஆகியோர் பணியில் இருந்தனர்.

அப்போது திடீரென கையில் பட்டா கத்தியுடன் முகமூடி அணிந்து 3 பேர் வந்தனர். அவர்கள் கடையில் மது வாங்கி கொண்டிருந்தவர்களை மிரட்டி அப்புறப்படுத்தி விற்பனையாளரை தள்ளி விட்டு ஒருவர் கடைக்குள் நுழைந்தார்.

ஒருவர் வாசலில் பட்டாக் கத்தியுடன் காவலுக்கு நின்று கொண்டார். மற்றொருவர் இருசக்கர வாகனத்தில் வெளியே காத்திருந்தார். கடைக்குள் நுழைந்த கொள்ளையன் சூப்பர்வைசரை மிரட்டி விற்பனையான பணம் முழுவதையும் கேட்டான். அதற்கு சூப்பர்வைசர் விற்பனை பணத்தை கொடுத்து அனுப்பி விட்டதாக கூறினார். இதனால் ஆத்திரம் அடைந்த கொள்ளையர்கள் சூப்பர்வைசரை தாக்கி கல்லாவில் இருந்த ரூ.15 ஆயிரத்தை எடுத்துக் கொண்டு தப்பி சென்றனர்.

இதுகுறித்து வேளாங்கண்ணி போலீசில் புகார் செய்யப்பட்டது. அதன் பேரில் சம்பவ இடத்துக்கு விரைந்து வந்த போலீசார் சி.சி.டி கேமராவை ஆய்வு செய்து கேமராவில் பதிவாகி உள்ள கொள்ளையர்கள் உருவ படத்தை வைத்து அவர்களை தேடி வருகின்றனர்.

குத்தாலம்:

மருத்துவ படிப்பில் சேரும் மாணவ, மாணவிகளுக்கு கடந்த ஆண்டு முதல் மத்திய அரசு நீட் தேர்வை கட்டாயமாக்கியுள்ளது. இந்த ஆண்டுக்கான நீட் தேர்வு இன்று நடைபெறுகிறது. இதில் தமிழகத்தை சேர்ந்த மாணவ, மாணவிகள் பலருக்கு வெளி மாநிலங்களில் தேர்வு மையங்கள் ஒதுக்கப்பட்டுள்ளது. இதனால் மாணவர்கள் மன உளைச்சலுக்கு ஆளாகியுள்ளதுடன், ஏழை மாணவர்கள் தேர்வு மையத்திற்கு செல்வதற்கே பல ஆயிரம் கடன் வாங்கி செல்ல வேண்டிய இக்கட்டான சூழ்நிலைக்கு தள்ளப்பட்டுள்ளனர்.

நாகை மாவட்டம் குத்தாலம் தாலுக்கா அருகே எலந்தங்குடி கிராமத்தில் கொத்தனார் வேலை பார்க்கும் முருகன் என்பவரின் மகள் துர்காதேவி அரசு உதவி பெறும் பள்ளியில் படித்து வருகிறார். இவர் மருத்துவம் படிக்க வேண்டும் என்று நீண்ட நாட்களாக ஆசைப்பட்டு நீட் தேர்வுக்கு தயாராகி வந்துள்ளார். இவருக்கு தற்போது எர்ணாகுளத்தில் தேர்வு மையம் ஒதுக்கப்பட்டு, ஹால்டிக்கெட் வந்ததை கண்டு துர்காதேவி அதிர்ச்சி அடைந்துள்ளார்.

இதுகுறித்து துர்காதேவி கூறும்போது, டாக்டருக்கு படிக்க வேண்டும் என்று ஆசைப்பட்டேன். ஏழை குடும்பத்தில் பிறந்தாலும் எனது ஆசையை நிறைவேற்ற பெற்றோர் ஒத்துழைப்பு அளித்து வருகின்றனர். நீட்டிற்கு விண்ணப்பித்த போது விருப்ப தேர்வு மையங்களாக புதுச்சேரி, திருச்சி, கோவை ஆகிய தமிழக மாவட்டங்களைத்தான் தேர்வு செய்திருந்தேன். ஆனால் நான் தேர்வு செய்யாத வெளி மாநிலமான எர்ணாகுளத்தில் எனக்கு தேர்வு மையத்தை ஒதுக்கியுள்ளனர். இது மன உளைச்சலை ஏற்படுத்தியுள்ளது என்றார்.

இதுகுறித்து மாணவியின் தந்தை முருகன் கூறுகையில் கொத்தனார் வேலை பார்த்து வந்தாலும் எனது மகள் துர்காதேவி டாக்டருக்கு படிக்க வேண்டும் என்று ஆசைப்பட்டதால் கடன்வாங்கி படிக்க வைத்து வருகிறேன். நீட் தேர்வு எழுத கேரள மாநிலம் எர்ணாகுளம் செல்ல வேண்டி உள்ளது. அங்கு செல்வதற்கு ரூ.5 ஆயிரம் முதல் 7 ஆயிரம் வரை செலவு ஆகும். அதற்கும் கடன் வாங்கித்தான் செல்கிறோம்.

தமிழக அரசு ரூ.1000 உதவித்தொகையை அறிவித்துள்ளது. எப்படி நாங்கள் அரசு உதவித்தொகையை பெற முடியும். மாணவர்களுக்கு எந்தெந்த மாநிலங்களுக்கு தேர்வு மையம் ஒதுக்கப்பட்டு அதற்கான அனைத்து செலவுத் தொகையையும் முழுமையாக தமிழக அரசு வழங்க வேண்டும் என்றார். #tamilnews #neet

சீர்காழி:

சீர்காழி அருகே திருவெண்காடு போலீஸ் நிலைய சப்-இன்ஸ்பெக்டர் கணேசன் மற்றும் போலீசார் நேற்று மாலை நாங்கூர் பகுதியில் வாகன தணிக்கையில் ஈடுபட்டிருந்தனர்.

அப்போது அந்த வழியாக மோட்டார் சைக்கிளில் வந்த ஒரு நபரை நிறுத்தி சோதனை நடத்திய போது அவர் ஆயுதத்தை பதுக்கி எடுத்து வந்தது தெரியவந்தது. அப்போது இந்த நபர் சப்-இன்ஸ்பெக்டர் கணேசனை தாக்கி விட்டு தப்பி ஓட முயன்றார்.

இதில் அவர் கீழே விழுந்தார். இதையடுத்து போலீசார் அந்த நபரை சுற்றி வளைத்து பிடித்து விசாரணை நடத்தினர். அவர் மேலநாங்கூர் பகுதியை சேர்ந்த இலக்கியராஜ் (வயது 35). என்பதும், பிரபல ரவுடியான இவர் மீது திருவெண்காடு, சீர்காழி, பொறையார் ஆகிய போலீஸ் நிலையங்களில் கொலை, கொலை முயற்சி உள்பட பல்வேறு வழக்குகள் இருப்பதும் தெரியவந்தது.

இதையடுத்து இலக்கிய ராஜை போலீசார் கைது செய்து சிறையில் அடைத்தனர். மேலும் தாக்குதலில் காயம் அடைந்த சப்-இன்ஸ்பெக்டர் கணேசன் சீர்காழி அரசு மருத்துவமனையில் சிகிச்சைக்காக அனுமதிக்கப்பட்டுள்ளார்.

இந்த சம்பவம அப்பகுதியில் பரபரப்பை ஏற்படுத்தியுள்ளது.