காஞ்சிபுரம்

மாமல்லபுரம்:

மாமல்லபுரத்தை அடுத்த திருவிடந்தையில் வருகிற 11-ந்தேதி முதல் 14-ந் தேதி வரை மத்திய பாதுகாப்புத் துறை அமைச்சகம் சார்பில் பிரமாண்டமான ராணுவ தளவாட கண்காட்சி நடை பெற உள்ளது.

இதனை பிரதமர் மோடி தொடங்கி வைக்கிறார். கண் காட்சிக்காக சுமார் 280 ஏக்கர் நிலத்தில் அரங்கங்கள் அமைக்கும் பணி முழு வீச்சில் நடந்து வருகிறது.

பெரும்பாலான பணிகள் முடிந்து விட்டன. பீரங்கிகள், டாங்கிகள் மற்றும் ராணுவ தளவாட பொருட்கள் கண்காட்சி நடைபெறும் இடத்துக்கு லாரிகளில் வந்த வண்ணம் உள்ளன.

கண்காட்சி தொடங்க இன்னும் 2 நாட்களே இருக்கும் நிலையில் அங்கு பாதுகாப்புகள் பலப்படுத்தப்பட்டுள்ளது.

அரங்கங்களின் உட்பகுதி, தளவாடங்களை இயக்கும் பகுதி, ராணுவ வீரர்களின் சாகச பகுதி அனைத்தும் ராணுவ பாதுகாப்பில் உள்ளது.

வளாக வெளிப் பகுதி, நுழைவு வாயில், மற்றும் தொலைதூர கண்காணிப்பு பகுதிகள் அனைத்தும் மத்திய தொழில்துறை பாதுகாப்பு படையின் கட்டுப்பாட்டில் கொண்டு வரப்பட்டு இருக்கிறது.

வளாகத்தின் வெளிப் பகுதி வேலிகள், போக்கு வரத்து சாலைகள், வெளியே நிறுத்தப்பட்டுள்ள வாகனங்கள் இவைகளை பாதுகாக்கும் பணியில் காவல் துறையினர் ஈடுபட்டு வருகிறார்கள்.

இந்த 3 அடுக்கு பாதுகாப்பு நேற்றில் இருந்து அமலுக்கு வந்தது. கண்காட்சி வளாகம் முழுவதையும் கண்காணிக்க 50 அடி உயரத்துக்கு 100-க்கும் மேற்பட்ட உயர் கோபுரங்களும் அமைக்கப்பட்டு உள்ளன. அதில் இருந்தபடி பைனாகுலர், வயர்லஸ், கேமரா பொருத்திய நவீன துப்பாக்கிகளுடன் வீரர்கள் கண்காணித்து வருகிறார்கள்.

வடநெம்மேலி கிழக்கு கடற்கரை சாலையில் இருந்து திருவிடந்தை வரை வாகனங்கள் வேகமாக செல்லாமல் இருக்க 3 கிலோ மீட்டர் தூரத்துக்கு 100மீட்டர் தூரத்துக்கு ஒரு 3 அடுக்கு வேகத்தடை போடப்பட்டுள்ளது.

இந்த சாலைகளில் வாகனங்களை நிறுத்தவோ, ராணுவ கண்காட்சி பகுதியை பொதுமக்கள் புகைப்படம் எடுக்கவோ அனுமதி கிடையாது. அந்த பகுதி முழுவதும் 144தடை உத்தரவு போன்று காட்சி அளிக்கிறது.

கண்காட்சிக்கு வரும் வெளிநாட்டு ராணுவ அதிகாரிகள் தங்குவதற்காக சென்னை முதல் பாண்டிச்சேரி வரை கிழக்கு கடற்கரை சாலையில் உள்ள முக்கிய ரிசார்ட்களில் ரூம்கள் முழுவதும் பதிவு செய்யப்பட்டுள்ளது. அங்கும் மத்திய தொழில் துறை பாதுகாப்பு படையின் பாதுகாப்பு போடப்பட்டுள்ளது

ஓட்டல்களில் ரகசிய கேமராக்கள் பொறுத்தப்பட்டு நவீன ரேடார் வசதியுடன் கண்காட்சி வளாகம் உள்ளிருந்தே பாதுகாப்பை ராணுவத்தினர் கண் காணித்து வருகிறார்கள்.

காஞ்சீபுரம்:

காஞ்சீபுரம் அடுத்த கோளிவாக்கம் பகுதியில் மாட்டு வண்டியில் அரசு அனுமதியின்றி மணல் கடத்தப்படுவதாக காஞ்சீபுரம் தாலுகா போலீஸ் சப்-இன்ஸ்பெக்டர் தர்மலிங்கத்திற்கு புகார் வந்தது. அவரும் போலீசாரும் அப்பகுதிக்கு விரைந்தனர்.

அப்போது அங்கு மாட்டு வண்டியில் மணல் கடத்திய கோளிவாக்கம் பகுதியை சேர்ந்த செல்வம் (வயது 29) என்பவரை போலீசார் கைது செய்தனர். காஞ்சீபுரம் அடுத்த வளத்தோட்டம், மாகரல் மின்வாரிய அலுவலகம் அருகில் மாட்டுவண்டி மற்றும் லாரியில் மணல் கடத்தப்படுவதாக மாகரல் போலீஸ் சப்-இன்ஸ்பெக்டர் சிவசங்கரனுக்கு புகார் வந்தது. அவர் போலீசாருடன் அங்கு விரைந்தார்.

அப்போது வளத்தோட்டம் பகுதியில் மணல் கடத்திய தூசி பகுதியை சேர்ந்த குமார் (40) என்பவரை போலீசார் கைது செய்தனர். மாகரல் மின்வாரியம் அருகில் லாரியில் மணல் கடத்தி வந்த காவனூர்புதுச்சேரி பகுதியை சேர்ந்த லாரி டிரைவர் ஆறுமுகம் (36), ஊரல் கிராமத்தை சேர்ந்த கிளீனர் அருள்முருகன் (22) ஆகியோரையும் போலீசார் கைது செய்து லாரியை பறிமுதல் செய்தனர்

மாமல்லபுரம்:

காஞ்சீபுரம் சங்கரா பல்கலைக் கழகத்தில் முதலாம் ஆண்டு படித்து வந்தவர்கள் தேவசந்தர் (வயது 19), துளிபாலா பார்கவ் (19).

நேற்று மதியம் தேவசந்தர், துளிபாலா பார்கவ் உள்பட 17 மாணவர்கள் மாமல்லபுரத்துக்கு சுற்றுலா வந்தனர். அனைவரும் கடற்கரை கோவில் அருகே கடலில் குளித்துக் கொண்டிருந்தனர்.

அப்போது தேவசந்தர், துளிபாலா பார்கவ் ஆகிய 2 பேரையும் ராட்சதஅலை கடலுக்குள் இழுத்து சென்றது. நண்பர்கள் காப்பாற்ற முயன்றும் முடியவில்லை.

சிறிது நேரத்தில் அதே பகுதியில் தேவசந்தர் உடல் கரை ஒதுங்கியது. மாயமான துளிபாலா பார்கவை தேடி வந்தனர். இந்த நிலையில் இன்று காலை மாமல்லபுரத்தை அடுத்த தேவநேரி கடற்கரையில் துளிபாலா பார்கவ் பிணம் கரை ஒதுங்கியது.

மாமல்லபுரம் போலீசார் உடலை கைப்பற்றி விசாரணை நடத்தி வருகிறார்கள். பலியானவர் தேவசந்தர் காஞ்சீபுரத்தை சேர்ந்தவர். துளிபாலா பார்கவின் சொந்த ஊர் ஆந்திர மாநிலம் ஆகும். #tamilnews

சோழிங்கநல்லூர்:

நீலாங்கரையில் உள்ள நீலாங்கரை குப்பத்தை சேர்ந்தவர் ராஜா. பெயிண்டராக இருக்கிறார். இவரது மனைவி சற்குணம் (32). கடந்த 2 நாட்களாக உடல் நலக்குறைவால் அவதிப்பட்டார்.

எனவே அவரை அருகேயுள்ள ஒரு தனியார் ஆஸ்பத்திரிக்கு அழைத்து சென்றனர். அங்கு அவரை பரிசோதித்த டாக்டர் சிறுநீரக கோளாறு காரணமாக உடல் நலக்குறைவு எற்பட்டுள்ளது. ஆபரே‌ஷன் செய்தால் குணமாகும் என தெரிவித்தார்.

உடனே ஆபரேசனுக்கு ஏற்பாடு செய்யப்பட்டது. இந்த நிலையில் சற்குணம் திடீரென இறந்து விட்டதாக டாக்டர்கள் தெரிவித்தனர். இதனால் அவரது கணவர் ராஜா மற்றும் உறவினர்கள் அதிர்ச்சி அடைந்தனர்.

இது குறித்து நீலாங்கரை போலீசில் சற்குணத்தின் கணவர் ராஜா புகார் செய்தார். அதில், டாக்டர்களின் தவறான சிகிச்சையால் தனது மனைவி இறந்துவிட்டதாக தெரிவத்துள்ளார். போலீசார் வழக்குப்பதிவு செய்து விசாரித்து வருகின்றனர்.

திருப்போரூர்:

கேளம்பாக்கத்தை அடுத்த நாவலூர், பஜனை கோவில் தெருவை சேர்ந்தவர் சசிக்குமார் (வயது 35). இவரது மனைவி விஜயா (27).

இவர்களுக்கு திருமணம் ஆகி 3 ஆண்டுகள் ஆகிறது. குழந்தை இல்லை. அதே பகுதியில் சிறிய ஓட்டல் நடத்தி வந்தனர். அவர்களுக்கு உதவியாக சசிக்குமாரின் அண்ணன் மெய்ப்பொருள் கடையை கவனித்து வந்தார். இவர்களது சொந்த ஊர் ராமநாதபுரம் மாவட்டம் கடம்பூர் கிராமம் ஆகும்.

குழந்தை இல்லாததால் சசிக்குமாரும், விஜயாவும் மிகுந்த மனவருத்தத்தில் இருந்தனர். இந்த நிலையில் நேற்று மாலை வீட்டில் இருந்த இருவரும் ஓட்டலுக்கு வரவில்லை.

இதனால் சந்தேகம் அடைந்த மெய்ப்பொருள் வீட்டுக்கு வந்து பார்த்த போது சசிக்குமாரும், விஜயாவும் தூக்குப்போட்டு தற்கொலை செய்து இருப்பதை கண்டு அதிர்ச்சி அடைந்தார்.

இது குறித்து தாழம்பூர் போலீசுக்கு தகவல் தெரிவிக்கப்பட்டது. போலீசார் உடலை கைப்பற்றி விசாரணை நடத்தினர். குழந்தை இல்லாத ஏக்கத்தில் கணவன்-மனைவி இருவரும் தற்கொலை செய்து இருப்பது தெரிந்தது. அவர்களது தற்கொலை முடிவுக்கு வேறு ஏதேனும் காரணம் உள்ளதா? என்றும் விசாரணை நடந்து வருகிறது.

கணவன்-மனைவி தற்கொலை செய்த சம்பவம் அப்பகுதியில் சோகத்தை ஏற்படுத்தி உள்ளது. #tamilnews

செங்கல்பட்டு:

செங்கல்பட்டை அடுத்த மகேந்திரா சிட்டி தொழிற் பூங்காவில் கொல்கத்தாவை சேர்ந்த சஞ்சய் வேலை பார்த்து வருகிறார்.

இரவு அவர் பணிமுடிந்து வந்தபோது மோட்டார் சைக்கிளில் வந்த 6 பேர் கும்பல் கத்தியால் வெட்டினர். பின்னர் சஞ்சய்யிடம் இருந்த செல்போன் மற்றும் பணத்தை பறித்து தப்பி சென்றுவிட்டனர்.

இது குறித்து செங்கல்பட்டு தாலுக்கா போலீசார் வழக் குப்பதிவு செய்து விசாரணை நடத்தி வந்தனர்.

இந்த நிலையில் சஞ்சய்யிடம் கொள்ளை நடந்த அன்று பரனூர் அருகே மோட்டார் சைக்கிளில் வந்த 2 வாலிபர்கள் விபத்தில் சிக்கி படுகாயம் அடைந்து இருந்தனர். அவர்களுக்கு செங்கல்பட்டு அரசு ஆஸ்பத்திரியில் சிகிச்சை அளிக்கப்பட்டது.

இதுபற்றி போலீசார் விசாரணை நடத்திய போது அவர்கள் சிவா, தினேஷ் என்பதும் நண்பர்களுடன் மகேந்திரா சிட்டி தொழிற் பூங்காவில் சஞ்சய் என்பவரிடம் கொள்ளையில் ஈடுபட்டு தப்பி வந்தபோது விபத்தில் சிக்கி படுகாயம் அடைந்ததும் தெரிந்தது.

அவர்கள் கொடுத்த தகவலின்படி கூட்டாளிகளான வல்லத்தை சேர்ந்த தென்னரசு, நவீன்ராஜ், கரண்குமார், அனுமந்த புத்தேரி துளசிதரன் ஆகிய 4 பேர் கைது செய்யப்பட்டனர்.

அவர்களிடம் இருந்து 2½ பவுன் செயின், செல்போன் பறிமுதல் செய்யப்பட்டது. கொள்ளையில் ஈடுபட்டு தப்பியபோது விபத்தில் சிக்கியதால் அவர்கள் பிடிபட்டு உள்ளனர்.