கடலூர்

சிதம்பரம்:

சிதம்பரம் கீழவீதியில் தனியார் ஓட்டல் ஒன்று உள்ளது. இந்த ஓட்டல் நுழைவு வாசலில் தபால் அட்டை ஒன்று கிடந்தது. அது அல்கொய்தா என்ற தீவிரவாத அமைப்பின் பெயரில் சிதம்பரம் நடராஜர் கோவில் செயலாளர் முகவரிக்கு அனுப்பப்பட்டு இருந்தது.

மேலும் அதில் ‘சிதம்பரம் ஆயிரங்கால் மண்டபத்தை வெடிகுண்டு வைத்து தகர்ப்போம்’ என்ற வாசகம் ஆங்கிலத்தில் எழுதப்பட்டு இருந்தது.

இது குறித்து சிதம்பரம் நகர போலீஸ் நிலையத்திற்கு சென்று, இன்ஸ்பெக்டர் அம்பேத்கரிடம் புகார் செய்யப்பட்டது.

இதையடுத்து, மாவட்ட போலீஸ் சூப்பிரண்டு விஜயகுமார் உத்தரவின்பேரில், வெடிகுண்டு சோதனை நிபுணர் பாபு தலைமையில் 12 பேர் கொண்ட குழுவினர் சிதம்பரம் நடராஜர் கோவிலுக்கு விரைந்தனர். பின்னர், கோவிலில் ஆயிரங்கால் மண்டபம், தீர்த்தகுளம் என அங்குலம் அங்குலமாக சோதனை மேற்கொண்டனர்.

மேலும் மோப்ப நாய் ஜேக் உதவியுடன் கோவிலில் சோதனை செய்யப்பட்டது. இதில் வெடிகுண்டுகள், வெடிபொருட்கள் எதுவும் சிக்கவில்லை.

கோவிலுக்கு வெடிகுண்டு மிரட்டல் விடுத்து அல்கொய்தா பெயரில் கடிதம் அனுப்பிய மர்ம வாலிபர் யார்? என்று தனிப்படை போலீசார் தீவிர விசாரணை நடத்தி வருகின்றனர். மேலும், கோவில் வளாகத்திலும், 4 தேரோடும் வீதிகளிலும் சந்தேகப்படும்படியாக சுற்றித்திரிபவர்களை பிடித்து போலீசார் விசாரணை நடத்தி வருகிறார்கள்.

இது குறித்து கடலூர் மாவட்ட போலீஸ் சூப்பிரண்டு விஜயகுமாரிடம் கேட்டபோது, அவர் கூறியதாவது:-

இந்த கடிதத்தை மனநலம் பாதிக்கப்பட்ட நபர்கள் யாராவது அனுப்பி இருக்கலாம் அல்லது கோவிலில் உள்ளவர்களுக்கும், சாமி கும்பிட வந்தவர்களுக்கும் இடையே ஏதேனும் பிரச்சினை ஏற்பட்டிருக்கலாம். அதை முன்விரோதமாக கொண்டுகூட இதுபோன்று மிரட்டல் கடிதம் அனுப்பி இருக்க வாய்ப்பு உள்ளது.

மேலும், அந்த கடிதத்தில் எழுதப்பட்டுள்ள வார்த்தைகளில் எழுத்து பிழைகள் அதிக அளவில் உள்ளன. அல்கொய்தா என்ற வார்த்தையை கூட தவறாக எழுதி, அதன் மூலம் மிரட்டல் கடிதம் அனுப்பப்பட்டுள்ளது. இருப்பினும், இதை அலட்சியமாக விட முடியாது.

தொடர்ந்து, சிதம்பரம் நடராஜர் கோவிலை கண்காணித்து வருகிறோம். கோவிலுக்கு வரும் பக்தர்கள் உடைமைகள் சோதனை செய்த பிறகே கோவிலுக்குள் அனுமதிக்க ஏற்பாடு செய்யப்பட்டுள்ளது. மேலும், மிரட்டல் கடிதம் விடுத்த நபரை பிடிக்க உரிய நடவடிக்கை எடுக்கப்படும்.

இவ்வாறு போலீஸ் சூப்பிரண்டு விஜயகுமார் கூறினார்.

சிதம்பரம்:

கடலூர் மாவட்டம் சிதம்பரம் அருகே உள்ள பழைய நல்லூர் காலனியை சேர்ந்தவர் காத்தமுத்து (வயது 68), விவசாயி. இவரது மனைவி அம்புஜம் (60). இவர் அதே பகுதியில் உள்ள டீக்கடையில் வேலை செய்து வந்தார். இவர்களுக்கு சுந்தர்ராஜன் என்ற மகனும், ஜெயா, கற்பகம் என்ற 2 மகள்களும் உள்ளனர். அனைவருக்கும் திருமண மாகிவிட்டது.

காத்தமுத்துவுக்கு குடிப்பழக்கம் உள்ளது. அவர் தினமும் மது குடித்துவிட்டு வீட்டுக்கு வந்து மனைவி அம்புஜத்திடம் தகராறு செய்து வந்தார். காத்தமுத்து தனது மனைவியின் நடத்தையில் சந்தேகப்பட்டார். இதுதொடர்பாக கணவன்-மனைவி இடையே அடிக்கடி தகராறு ஏற்பட்டு வந்தது.

நேற்று இரவு காத்தமுத்து குடித்துவிட்டு வீட்டுக்கு வந்தார். குடிபோதையில் அம்புஜத்திடம் வாக்குவாதம் செய்தார். பின்னர் 2 பேரும் வீட்டில் தூங்கினர். இன்று அதிகாலை 3 மணிக்கு காத்தமுத்து திடீரென விழித்தார்.மனைவி மீது அவருக்கு ஆத்திரம் ஏற்பட்டது.

தூங்கிக்கொண்டிருந்த அம்புஜத்தின் தலையில் உருட்டு கட்டையால் ஓங்கி அடித்தார். இதில் திடுக்கிட்டு எழுந்த அம்புஜத்தை மீண்டும், மீண்டும் கட்டையால் சரமாரியாக தாக்கினார். இதில் ரத்தவெள்ளத்தில் அம்புஜம் அதே இடத்திலேயே பரிதாபமாக இறந்தார்.

அலறல் சத்தம்கேட்டு அக்கம் பக்கத்தினர் காத்தமுத்துவின் வீட்டு முன்பு திரண்டனர். வீட்டை விட்டு வெளியே வந்த காத்தமுத்து அவர்களிடம் தனது மனைவியை யாரோ அடித்துக் கொலை செய்துவிட்டு ஓடிவிட்டனர் என கூறினார். இதுகுறித்து அண்ணாமலைநகர் போலீசுக்கு தகவல் தெரிவிக்கப்பட்டது. இன்ஸ்பெக்டர் ஏழுமலை மற்றும் போலீசார் சம்பவ இடத்துக்கு விரைந்து வந்தனர்.

அம்புஜத்தின் உடலை மீட்டு பிரேத பரிசோதனைக்காக சிதம்பரம் அரசு ஆஸ்பத்திரிக்கு அனுப்பி வைத்தனர். இந்த கொலை சம்பவம் குறித்து காத்தமுத்துவிடம் போலீசார் விசாரித்தனர். அவர் முன்னுக்கு பின் முரனாக பதில் கூறினார். இதில் சந்தேகம் அடைந்த போலீசார் காத்த முத்துவிடம் தொடர்ந்து விசாரித்தனர். அப்போது மனைவியை அடித்துக் கொலை செய்ததை ஒப்புக்கொண்டார்.

இதையொட்டி காத்தமுத்துவை போலீசார் கைது செய்தனர். இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.

சிதம்பரம்:

சுப்ரீம் கோர்ட்டு உத்தரவுப்படி, தேசிய மற்றும் மாநில நெடுஞ்சாலையில் இருந்த டாஸ்மாக் கடைகள் மூடப்பட்டன. இந்த நிலையில், மூடப்பட்ட டாஸ்மாக் கடைகளுக்கு மாற்று இடம் தேர்வு செய்து, அங்கு டாஸ்மாக் கடைகளை திறக்க அதிகாரிகள் தீவிர முயற்சி காட்டி வருகின்றனர். ஆனால், அதற்கு அந்தந்த பகுதியில் உள்ள மக்கள் எதிர்ப்பு தெரிவித்து போராட்டத்தில் ஈடுபட்டு வருகின்றனர்.

கடலூர் மாவட்டம் சிதம்பரம் அருகே தில்லைநாயகபுரம் சுடுகாடு அருகே டாஸ்மாக் கடை அமைக்க அதிகாரிகள் இடம் தேர்வு செய்தனர். நேற்று அங்கு புதிதாக கடை திறக்க ஏற்பாடுகள் செய்யப்பட்டன. இதையறிந்த அந்த கிராம மக்கள் அங்கு ஒன்று திரண்டனர்.

புதிதாக டாஸ்மாக் கடை அமைக்க எதிர்ப்பு தெரிவித்து கோ‌ஷங்களை எழுப்பினர். டாஸ்மாக் கடை முன்பு ஆர்ப்பாட்டத்தில் ஈடுபட்டனர்.

தகவல் அறிந்து டாஸ்மாக் கோட்ட அலுவலர் விஜயா, சிதம்பரம் தாசில்தார் மகேஷ், டாஸ்மாக் வருவாய் ஆய்வாளர் சோமசுந்தரம் மற்றும் போலீசார் அங்கு விரைந்து வந்தனர். கிராம மக்களிடம் சமரச பேச்சுவார்த்தையில் ஈடுபட்டனர்.

டாஸ்மாக் கடை திறக்கப்படாது என்று அதிகாரிகள் உறுதியளித்தனர். இதையடுத்து, கிராம மக்கள் போராட்டத்தை கைவிட்டு அங்கிருந்து கலைந்து சென்றனர். டாஸ்மாக் கடைக்கு விற்பனைக்காக கொண்டு வரப்பட்ட அனைத்து மதுபாட்டில்களும் திருப்பி எடுத்து செல்லப்பட்டது.