ஆவடி:
ஆவடியை அடுத்த கோவில்பதாகை கலைஞர் நகர் 2-வது தெருவைச் சேர்ந்தவர் தங்கராஜ். இவர், ஆவடியில் உள்ள மத்திய அரசின் ராணுவ தொழிற்சாலையில் வேலை செய்து வருகிறார். இவருடைய மகன் பரத்குமார் (வயது 22). பி.காம் படித்துள்ளார்.
இவர், தனது தந்தையிடம் மோட்டார் சைக்கிள் வாங்கித்தரும்படி கேட்டார். அதற்கு மறுத்த அவரது தந்தை, “இப்போது வாங்கி தர முடியாது. 2 மாதம் கழித்து நான் ஓய்வுபெற்ற பிறகு வாங்கித்தருகிறேன்” என்றார்.
இதனால் விரக்தி அடைந்த பரத்குமார், நேற்று முன்தினம் இரவு வீட்டின் படுக்கை அறைக்குள் சென்று உள்பக்கமாக தாழ்ப்பாள் போட்டுக்கொண்டார். நள்ளிரவு 2 மணியளவில் பரத்குமாரின் அறை கதவை அவரது பெற்றோர் நீண்டநேரம் தட்டியும் அவர் திறக்கவில்லை.
சந்தேகம் அடைந்த அவர்கள், கதவை உடைத்து உள்ளே சென்று பார்த்தனர். அங்கு பரத்குமார், மின்விசிறியில் புடவையால் தூக்குப்போட்டு தற்கொலை செய்து கொண்டிருப்பதை கண்டு அதிர்ச்சி அடைந்தனர்.
இதுபற்றி ஆவடி டேங்க் பேக்டரி போலீசார் வழக்குப்பதிவு செய்து பரத்குமாரின் உடலை மீட்டு பிரேத பரிசோதனைக்காக சென்னை கீழ்ப்பாக்கம் அரசு ஆஸ்பத்திரிக்கு அனுப்பி வைத்தனர். மேலும் இதுபற்றி போலீசார் விசாரித்து வருகின்றனர்.
