குஷ்பு என்னும் நான்: சந்தித்ததும் சிந்தித்ததும்- கண்ணீரிலும் கலைஞரின் நகைச்சுவை- 37

தமிழ்நாட்டில் ஒவ்வொரு பகுதிக்கும் ஒரு முக்கியத்துவம் இருக்கும். அதே போல் தலைநகரம் சென்னை என்று சொல்லப்பட்டாலும் கோபாலபுரம்தான் முக்கியத்துவம் பெறும் பகுதி. அரை நூற்றாண்டுக்கும் மேலாக அரசியல் வியூகங்கள் அனைத்தும் இங்கிருந்துதான் வகுக்கப்பட்டு இருக்கின்றன.
எப்படியும் காலையில் தான் கூப்பிடுவார்கள் என்று நினைத்தேன். ஆனால் நான் சந்திக்க நேரம் கேட்டதுபற்றி அவரது கவனத்துக்கு உடனே கொண்டு சென்று இருக்கிறார்கள்.

கலைஞருக்கு சைனஸ் பிரச்சினை உண்டு. எனக்கும் சைனஸ் உண்டு. இந்த பிரச்சினை இருப்பவர்களுக்கு காலையில் கண்ணீர் வந்து கொண்டே இருக்கும். எனவே நான் காலையில் எங்கு சென்றாலும் கையில் ஈரப்பதமுள்ள ‘டிஸ்யூ’ பேப்பர் வைத்திருப்பேன். கண்ணீர் வடிய வடிய துடைத்து கொள்வேன். அப்படித்தான் ஒருநாள் காலையில் கலைஞரை சந்திக்க சென்றபோதும் கண்களை அடிக்கடி துடைத்துக் கொண்டே இருந்தேன்.
கலைஞர் டிஸ்யூ பயன்படுத்த மாட்டார். மெலிதான வெள்ளை துண்டு வைத்திருப்பார். அவரும் அந்த துண்டால் அடிக்கடி கண்ணீரை துடைத்துக் கொண்டார். திடீரென்று சொன்னார் ‘சம்பந்தமே இல்லாமல் இருவர் கண்களிலும் கண்ணீர் வருகிறது. துடைத்து கொண்டிருக்கிறோம். இப்போது நம்மை பார்ப்பவர்கள் உணர்ச்சி பெருக்கால் இருவரும் கண்ணீர் சிந்துகிறார்கள் போலும் என்பார்கள்’ என்றார்.