நாகூர் நாகநாதசாமி கோவில் குடமுழுக்கு

நாகையை அடுத்த நாகூரில் நாகநாதசாமி கோவில் அமைந்துள்ளது. இந்த கோவில் ராகு, கேது பரிகார தலமாக விளங்கி வருகிறது. இந்த கோவில் குடமுழுக்கு விழா நேற்று காலை நடந்தது.

இதை முன்னிட்டு கடந்த 19-ந்தேதி காலை விக்னேஸ்வர பூஜையுடன், கணபதிஹோமம், நவக்கிரக ஹோமம், கோ பூஜை, தன பூஜை, தீபாராதனை நடந்தது. தொடர்ந்து வாஸ்து சாந்தி, கஜபூஜை, லட்சுமி ஹோமம், யாகசாலை பூஜைகள் நடந்தது.

பின்னர் நேற்று காலை 5 மணிக்கு 6-ம் கால யாகசாலை பூஜையுடன் மகா பூர்ணாகுதி நடந்தது. இதையடுத்து கடங்கள் புறப்பாடாகி காலை 10 மணிக்கு கோவில் விமானங்கள் மற்றும் ராஜகோபுர கலசங்களில் புனித நீர் ஊற்றப்பட்டு குடமுழுக்கு நடந்தது. இதையொட்டி நாகநாத, நாகவல்லி உள்ளிட்ட பரிவார தெய்வங்களுக்கு தீபாராதனையும், இரவு 7 மணிக்கு பஞ்சமூர்த்திகள் வீதி உலாவும் நடந்தது. இதில் திரளான பக்தர்கள் கலந்து கொண்டனர்.