அதிக விலைக்கு ஏலம் போன உனத்கட்: ராஜஸ்தான் ராயல்ஸ் ரூ. 8.4 கோடிக்கு வாங்கியது- ஷமிக்கு ரூ. 4.8 கோடி

ஐபிஎல் வீரர்கள் ஏலம் ஜெய்ப்பூரில் நடைபெற்று வருகிறது. வேகப்பந்து வீச்சாளர்களை ஏலம் விடும்போது அனைத்து அணிகளும் போட்டி போட்டு அவர்களை ஏலம் எடுக்க விரும்பின. இடது கை வேகப்பந்து வீச்சாளர் உனத்கட்டை ஏலம் எடுக்க சென்னை சூப்பர் கிங்ஸ் அணி அதிக அளவில் விரும்பியது.

சென்னை சூப்பர் கிங்ஸ் 5.8 கோடி ரூபாய் வரை விருப்பம் தெரிவித்தது. ஆனால் அதற்குமேல் ராஜஸ்தான் ராயல்ஸ், கிங்ஸ் லெவன் பஞ்சாப் அணிகள் போட்டியிட்டன. இறுதியில் ராஜஸ்தான் ராயல்ஸ் 8.4 கோடி ரூபாய் கொடுத்து வாங்கியது. இன்றைய ஏலத்தில் இதுதான் அதிகபட்ச தொகையாக இருக்க வாய்ப்புள்ளது.

ஆஸ்திரேலியா தொடரில் அசத்தி வரும் முகமது ஷமியை வாங்கவும் சென்னை சூப்பர் கிங்ஸ் விருப்பம் தெரிவித்தது. ஆனால், இறுதியில் கிங்ஸ் லெவன் பஞ்சாப் 4.8 கோடி ரூபாய் கொடுத்து வாங்கியது. வருண் ஆரோனை 2.40 கோடி ரூபாய் கொடுத்து ராஜஸ்தான் ராயல்ஸ் அணி வாங்கியது.