சமயபுரம் விடுதிகளில் விபசாரம்- கைதான மேலாளர்கள் உள்பட 4பேர் சிறையில் அடைப்பு

திருச்சி:

திருச்சி சமயபுரத்தில் உள்ள தங்கும் விடுதிகளில் விபசாரம் நடைபெற்று வருவதாக போலீஸ் உயர் அதிகாரிகளுக்கு புகார்கள் வந்தன. இதைத்தொடர்ந்து லால்குடி துணை போலீஸ் சூப்பிரண்டு ராஜசேகர் மேற்பார்வையில் போலீசார் சமயபுரத்தில் உள்ள தங்கும் விடுதிகளில் அதிரடியாக சோதனை நடத்தினர்.

அப்போது 2 விடுதிகளில் பெண்களை வைத்து விபசாரம் நடப்பது கண்டுபிடிக்கப்பட்டது. இதில் புரோக்கராக செயல்பட்டதாக விடுதியின் காவலாளிகள் கருப்பையா (வயது 62), தங்கராஜ் (58) மற்றும் உடந்தையாக இருந்ததாக விடுதி மேலாளர்கள் பொன்னையா (62), ரபீக் அகமது (43) ஆகிய 4 பேரை போலீசார் கைது செய்தனர்.

மேலும் அங்கிருந்த 4 பெண்களும் மீட்கப்பட்டனர். இதைத்தொடர்ந்து அனைவரும் திருச்சி ஜுடிசியல் மாஜிஸ்திரேட்டு கோர்ட்டு எண் 3-ல் ஆஜர்படுத்தப்பட்டனர். பின்னர் கோர்ட்டு உத்தரவின்படி மீட்கப்பட்ட 4 பெண்களும் திருச்சியில் உள்ள அரசு காப்பகத்தில் சேர்க்கப்பட்டனர். விடுதியின் காவலாளிகள் மற்றும் மேலாளர்கள் ஆகிய 4 பேரும் திருச்சி மத்திய சிறையில் அடைக்கப்பட்டனர்.