வாஷிங்டன்:
அமெரிக்க தொலைக்காட்சி பிரபலம் ஜான் மெலெண்டெஸ். காமெடி நடிகர், ரேடியோ ஜாக்கி என பன்முகத்தண்மை கொண்டவர். அடிக்கடி பிரபலங்களுக்கு போன் செய்து கலாய்ப்பது இவரது வேடிக்கையான பணி. இந்நிலையில், கடந்த வாரம் வெள்ளை மாளிகைக்கு ஜான் போன் செய்துள்ளார். அப்போது, எதிர்முனையில் அதிபர் டிரம்ப் மருமகன் ஜரேட் குஷ்னர் பேசியுள்ளார்.
அவரிடம், தன்னை ஜனநாயக கட்சியை சேர்ந்த நியூ ஜெர்சி மாகாண செனட்டர் பாப் மெலெண்டெஸ் பேசுவதாக தன்னை ஜான் அறிமுகப்படுத்தியுள்ளார். டிரம்பிடம் பேச வேண்டும் என தனது கோரிக்கையும் ஜான் முன் வைத்துள்ளார். இதனை அடுத்து, உங்களது விருப்பத்தை டிரம்பிடம் தெரிவிப்பதாக குஷ்னர் கூறியுள்ளார்.
சில மணி நேரம் கழித்து, அமெரிக்க அதிபருக்கான பிரத்யேக விமானத்தில் இருந்து டிரம்ப், ஜானுக்கு போன் செய்துள்ளார். செனட்டர் பாப் மெலெண்டெஸிடம் பேசுவதாக நினைத்து ஜான் மெலெண்டெஸிடம் பல்வேறு விவகாரங்கள் குறித்து டிரம்ப் மிக தீவிரமாக பேசியுள்ளார். இந்த ஆடியோ பதிவை ஜான் மெலெண்டெஸ் தனது இணையதளத்தில் வெளியிட அது வைரலாக பரவி வருகிறது.
பாப் மெலெண்டெஸ் சமீபத்தில் பரிசுப்பொருள் பெற்ற வழக்கில் இருந்து விடுவிக்கப்பட்டார். அதற்கு, தனது வாழ்த்துக்களை டிரம்ப் தெரிவித்தார். குடியேறிகள் விவகாரம், சுப்ரீம் கோர்ட்டில் புதிய நீதிபதியை நியமிப்பது என பல விவகாரங்கள் தொடர்பாக டிரம்ப் ஜானிடம் விவாதித்துள்ளார்.
இந்த ஆடியோ விவகாரம் தொடர்பாக கருத்து தெரிவித்துள்ள வெள்ளை மாளிகை, சில நேரங்களில் அதிபரின் தொடர்பு எல்லைக்குள் இது போன்ற பிரச்சனைகள் வந்து விடுகின்றன என கூறியுள்ளது. அதிபரை ஏமாற்றியதற்காக ஜான் கைது செய்யப்பட்டதாக தகவல்கள் பரவிய நிலையில் ‘நான் இன்னும் கைது செய்யப்படவில்லை’ என ஜான் மெலெண்டெஸ் ட்விட்டரில் பதிவிட்டுள்ளார்.
