சிவகாசி:
சிவகாசியில் அமைச்சர் ராஜேந்திரபாலாஜி நிருபர்களிடம் கூறியதாவது:-
பட்டாசு வழக்கில் நீதிமன்ற உத்தரவால் விருதுநகர் மாவட்ட மக்கள் சிரமத்தை சந்திக்கக்கூடிய நிலை ஏற்பட்டுள்ளது.
பட்டாசு தொழிலை பாதுகாக்க தமிழக முதல்- அமைச்சர் எடப்பாடி பழனிசாமி எவ்வாறு நடவடிக்கை எடுத்தார்? எப்படி சட்ட போராட்டம் நடத்தினார் என்று பட்டாசு ஆலை உரிமையாளர்களுக்கு நன்றாக தெரியும்.
இந்திய அளவில் பட்டாசு வெடிக்க தடையில்லை என்ற உச்சநீதிமன்ற உத்தரவிற்கு காரணம் நமது முதலமைச்சர் எடுத்த நடவடிக்கைதான்.
தமிழக அரசு என் முன் வந்து நிற்பதால் பட்டாசு வெடிக்க தடையில்லை என்று உச்சநீதிமன்ற தீர்ப்பில் நீதிபதிகள் கூறிப்பிட்டுள்ளனர். பட்டாசு பிரச்சனை குறித்து தமிழக முதல்வரின் கவனத்திற்கு மீண்டும் கொண்டு சென்றுள்ளேன்.
அதிகாரிகளோடு கலந்து பேசி சொல்வதாக என்னிடம் தமிழக முதல்வர் தெரிவித்தார். கஜா புயல் பாதிப்பை மத்திய அரசிடம் நாங்கள் கேட்ட நிதி கிடைக்கவில்லை. மிகப்பெரிய பாதிப்பை டெல்டா மாவட்டம் சந்தித்துள்ளது. கொடுமையான பாதிப்பை டெல்லா மாவட்ட விவசாயிகள் சந்தித்துள்ளனர்.
மத்திய அரசு ஏன் நமக்கு தேவையான நிதியை கொடுக்க மறுக்கின்றது என்று டெல்டா மாவட்ட மக்களுக்கு ஒரு ஏக்கம் இருக்கிறது.
தமிழக அரசு கேட்ட நிதியை கொடுத்திருந்தால் கூடுதல் திட்டங்கள் கிடைத்திருக்கும் என்று டெல்டா விவசாயிகள் எதிர்பார்த்து காத்திருந்தனர். மத்திய அரசு கொடுத்த நிதி யானை பசிக்கு சோளப்பொறி போன்று உள்ளது. அதை வைத்து எதையும் செய்ய முடியாது.
அனைத்து அமைச்சர்களும் டெல்டா மாவட்டங்களில் தங்கி பணியாற்றி வருகின்றனர். ஜெயலலிதா இருந்தபோது எடப்பாடி ஆட்சியிலும் பேரறிவாளன் உட்பட அனைவரையும் விடுதலை செய்ய வேண்டும் என்று சட்டமன்றத்தில் தீர்மானம் போட்டுள்ளோம்.
தீர்மான நகலை மத்திய அரசு, கவர்னருக்கு அனுப்பி வைத்துள்ளோம். தமிழகத்தில் தலைவர்களால் அமைப்பது கூட்டணி அல்ல. மக்கள் ஏற்றுக்கொள்ளும் கூட்டணி தான் தேர்தலில் வெற்றி பெறும். எந்த தேர்தல் வந்தாலும் மக்களோடு கூட்டணி வைத்துள்ள அ.தி.மு.க.தான் வெற்றி பெறும். பா.ஜ.க.வோடு கூட்டணி குறித்து தமிழக முதல்வர், துணை முதல்வர்தான் முடிவு செய்வார்கள்.
மேற்கண்டவாறு அவர் கூறினார். #GajaCyclone #RajendraBalaji
