கள்ளக்குறிச்சி:
விழுப்புரம் மாவட்டம் கள்ளக்குறிச்சி பஸ் நிலையத்தில் ஓட்டல்கள் மற்றும் ஏராளமான கடைகள் உள்ளன. அங்கு காதர் மீரான் (வயது 45) என்பவர் ஓட்டல் நடத்தி வருகிறார்.
இன்று காலை 6 மணி அளவில் அவரது கடையில் பெண் ஊழியர் விஜயா (40) கியாஸ் அடுப்பை பற்றவைத்தார். அப்போது திடீரென்று கியாஸ் கசிவு ஏற்பட்டு தீப்பிடித்தது. இதை அறிந்த விஜயா தீயை அணைக்க முயன்றார். அனால் தீ குபீரென்று பிடித்து மேலே சென்ற மின்சார வயர் மீது பட்டது. இதனால் கடை முழுவதும் தீ பரவியது.
உடனே கடையில் இருந்த ஊழியர்கள் தீயை அணைக்க முயற்சி செய்தனர். அப்போது காற்று வேகமாக வீசியதால் தீ மளமள வென பரவியது.
இதுகுறித்து கள்ளக்குறிச்சி தீயணைப்பு நிலையத்துக்கு தகவல் தெரிவிக்கப்பட்டது. நிலைய அலுவலர் நாகேஸ்வரன் தலைமையில் தீயணைப்பு படையினர் விரைந்து சென்று தீயை அணைக்கும் பணியில் ஈடுபட்டனர். அவர்கள் 30 நிமிடம் போராடி தீயை அணைத்தனர்.
இந்த தீ விபத்தில் ஓட்டலில் இருந்த மேஜை மற்றும் அனைத்து பொருட்களும் எரிந்தன. இதன் சேத மதிப்பு ரூ.3 லட்சம் ஆகும். இது குறித்து தகவல் அறிந்த கள்ளக் குறிச்சி சப்-இன்ஸ் பெக்டர் பாலமுரளி மற்றும் போலீசார் விரைந்து சென்று விசாரணை நடத்தினர்.
