நீங்கள் தேடியது "Tiruvallur Rain"

திருவள்ளூர்:

திருவள்ளூர் மற்றும் அதன் சுற்றுப்புறங்களில் நேற்று முன்தினம் சூறாவளி காற்றுடன் பலத்த மழை பெய்தது.

இதில் சென்னை-திருப்பதி சாலையில் 18 மின் கம்பங்கள் முறிந்து விழுந்தன. கிராம பகுதிகளில் 30-க்கும் அதிகமான மின் கம்பங்கள் சரிந்தன.

இதனால் திருவள்ளூரை சுற்றியுள்ள அரண் வாயில், அரண்வாயில் குப்பம், திருவூர்மணவாள நகர், வேப்பம்பட்டு, கூடப்பாக்கம் உள்ளிட்ட 10-க்கும் மேற்பட்ட கிராமங்களில் மின் வினியோகம் பாதிக்கப்பட்டது. மின்கம்பங்களை சரி செய்யும் பணி நடந்து வருகிறது.

மின் கம்பங்களை சரி செய்து மின் இணைப்பு கொடுக்கும் பணி இன்னும் நிறைவு பெறவில்லை. எனவே, 3-வது நாளாக நேற்றும் இந்த கிராமங்களுக்கு மின் வினியோகம் செய்யவில்லை.

இரவிலும் மின்சாரம் வராததால் இந்த பகுதியை சேர்ந்த பொதுமக்கள் பூந்தமல்லி-திருவள்ளூர் நெடுஞ்சாலையில் திடீர் சாலை மறியலில் ஈடுபட்டனர். தகவல் அறிந்ததும், திருவள்ளூர் துணை போலீஸ் சூப்பிரண்டு கங்காதரன் மற்றும் வெள்ளவேடு போலீசார் சம்பவ இடம் சென்று பொதுமக்களிடம் பேச்சுவார்த்தை நடத்தினார்கள்.

விரைவில் மின்சாரம் வழங்க நடவடிக்கை எடுக்கப்படும் என்று உறுதி அளித்தனர். இதையடுத்து, போராட்டம் நடத்தியவர்கள் கலைந்து சென்றனர். இரவில் நடந்த திடீர் போராட்டத்தால் அந்த பகுதியில் பரபரப்பு ஏற்பட்டது.

திருவள்ளூர்:

தமிழ்நாட்டில் கடந்த சில நாட்களாக வெப்பச் சலனம் காரணமாக ஆங்காங்கே பலத்த மழை பெய்து வருகிறது.

சென்னையில் நேற்று மதியம் வெயிலின் தாக்கம் அதிகமாக இருந்த நிலையில் மாலை 6 மணியளவில் மேகம் திரண்டு ஆங்காங்கே மழை பெய்ய தொடங்கியது. பின்னர் நள்ளிரவில் 2 மணி நேரம் பலத்த மழை பெய்தது. இதனால் நகரின் பல பகுதிகளில் தாழ்வான இடங்களில் மழைநீர் தேங்கியது.

அண்ணாநகர், கீழ்ப்பாக்கம், புரசைவாக்கம், வில்லிவாக்கம், முகப்பேர், அம்பத்தூர், ஆவடி, பிராட்வே, வண்ணாரப்பேட்டை, திருவொற்றியூர், கொடுங்கையூர், வியாசர்பாடி, மயிலாப்பூர், அடையார், திருவான்மியூர், ஆலந்தூர், மீனம்பாக்கம், வேளச்சேரி, பல்லாவரம், குரோம்பேட்டை, தாம்பரம், சேலையூர், மேடவாக்கம், கூடுவாஞ்சேரி, பெருங்குடி, துரைப்பாக்கம் உள்ளிட்ட பல இடங்களில் கனமழை பெய்தது.

இதில் சென்னை நுங்கம்பாக்கத்தில் 6 செ.மீ. மழையும், மீனம்பாக்கத்தில் 5 செ.மீ. மழையும் பெய்துள்ளது.

திருவள்ளூர் மாவட்டத்தில் பல்வேறு பகுதிகளில் நேற்று நள்ளிரவு முதல் இன்று காலை வரை பலத்த மழை பெய்தது.

திருவள்ளூர், திருத்தணி, ஊத்துக்கோட்டை, பூந்தமல்லி, அம்பத்தூர், பொன்னேரி, கும்மிடிப்பூண்டி, செங்குன்றம், சோழவரம் உள்ளிட்ட பகுதிகளில் பெய்த மழையால் சாலையில் மழை நீர் வெள்ளம் போல் ஓடியது. பலத்த மழை காரணமாக திருவள்ளூர் மற்றும் சுற்றுப்புற பகுதியில் இரவு மின்சார சப்ளை துண்டிக்கப்பட்டது.

திருவள்ளூர் மாவட்டத்தில் அதிகபட்சமாக திருவள்ளூரில் 83 மி. மீட்டர் மழை பதிவாகி உள்ளது. இன்று காலை நிலவரப்படி மாவட்டத்தில் பெய்த மழை அளவு (மி.மீட்டரில்) விவரம் வருமாறு:-

திருவள்ளூர் - 83
திருத்தணி - 81
அம்பத்தூர்- 80
பூண்டி- 74
பூந்தமல்லி - 57
செம்பரம்பாக்கம் - 47
திருவாலங்காடு- 47
ஊத்துக்கோட்டை- 45
தாமரைப்பாக்கம்- 38
கும்மிடிப்பூண்டி - 33
பொன்னேரி - 31
ஆர்கே பட்டு - 30
செங்குன்றம் - 22
சோழவரம்-22
பள்ளிப்பட்டு 17