நீங்கள் தேடியது "Refusal to marry"

பண்ருட்டி:

பண்ருட்டி அடுத்த ஏ.புதூர் கிராமத்தை சேர்ந்தவர் வீரமணி, விவசாயி. இவரது மகள் பிரேமா (வயது 27). இவர் அதே பகுதியில் உள்ள ஒரு தனியார் பள்ளியில் ஆசிரியையாக வேலை பார்த்து வருகிறார். இவருக்கும் அதே ஊரைச் சேர்ந்த கல்லூரி பேராசிரியர் சின்னமணி (28) என்பவருக்கும் காதல் ஏற்பட்டது. கடந்த 8 ஆண்டுகளாக ஒருவரை ஒருவர் காதலித்து வந்தனர்.

ஆசிரியை பிரேமாவை திருமணம் செய்து கொள்வதாக ஆசை வார்த்தை கூறி சின்னமணி அவருடன் முந்திரி தோப்பில் உல்லாசமாக இருந்ததாக கூறப்படுகிறது. தற்போது தன்னை திருமணம் செய்து கொள்ளுமாறு சின்னமணியிடம் பிரேமா கூறினார். இதற்கு சின்னமணி எதிர்ப்பு தெரிவித்தார். மேலும் அவரது தந்தை கோபாலகிருஷ்ணன் மற்றும் அவரது உறவினர்கள் ரவிச்சந்திரன், ஜெயக்குமாரி, முத்துலட்சுமி ஆகியோர் பிரேமாவை தலை முடியை இழுத்து தள்ளி அடித்து தாக்கியதாக தெரிகிறது.

இது பற்றி பண்ருட்டி அனைத்து மகளிர் போலீசில் பிரேமா புகார் செய்தார். இன்ஸ்பெக்டர் ரேவதி வழக்கு பதிவு செய்து விசாரணை நடத்தினார். இதையடுத்து கல்லூரி பேராசிரியர் சின்னமணியை கைது செய்து பண்ருட்டி கோர்ட்டில் ஆஜர்படுத்தினார். நீதிபதி கணேஷ் விசாரித்து சின்னமணியை 15 நாள் நீதிமன்ற காவலில் வைக்க உத்தரவிட்டார். இதனை தொடர்ந்து பேராசிரியர் சின்னமணி கடலூர் மத்திய சிறையில் அடைக்கப்பட்டார். #Tamilnews