திருவனந்தபுரம்:
கேரள மாநிலம் கொச்சி அருகே உள்ள பாலாரி வட்டத்தைச் சேர்ந்தவர் உல்லாஸ் ஹரிஹரன்.
இவருக்கு திருமணமாகி மனைவி மற்றும் கிருஷ்ணப்ரியா என்ற மகளும் ஏகநாத் என்ற மகனும் உள்ளனர். கிருஷ்ணப்ரியா அந்த பகுதியில் உள்ள பள்ளியில் பிளஸ்-1 படித்து வந்தார். ஏகநாத் 7-ம் வகுப்பு படித்து வந்தார்.
நேற்று மாலை உல்லாஸ் ஹரிஹரன் தனது மகள், மகனுடன் ஆலுவா பகுதியில் உள்ள சிவன் கோவிலுக்கு செல்லும் சாலைக்கு வந்தார். அங்குள்ள ஆற்றின் தரைப்பாலத்தில் நடந்து சென்ற அவர் திடீரென தனது மகள், மகனை தூக்கி ஆற்றுக்குள் வீசி உள்ளார். இதனை அந்த வழியே சென்றவர்கள் பார்த்து அதிர்ச்சி அடைந்தனர்.
இந்த நிலையில் யாரும் எதிர்பாராதவிதமாக உல்லாஸ் ஹரிஹரனும் ஆற்றில் குதித்தார். இது குறித்து தீயணைப்பு படையினருக்கு தகவல் கொடுக்கப்பட்டது.
அவர்கள் உடனடியாக சம்பவ இடத்துக்கு விரைந்து வந்து ஆற்றில் தத்தளித்த குழந்தைகளை மீட்டு கரைக்கு கொண்டு வந்தனர். அவர்களைஉடனடியாக ஆலுவா தாலுகா மருத்துவமனைக்கு கொண்டு சென்றனர். அங்கு பரிசோதித்த டாக்டர்கள், கிருஷ்ணப்ரியா மற்றும் ஏகநாத் இறந்து விட்டதாக தெரிவித்தனர்.
இதற்கிடையில் சுமார் 2 மணி நேர தேடுதலுக்குப் பிறகு உல்லாஸ் ஹரிஹரன்உடலும் ஆற்றில் இருந்து மீட்கப்பட்டது.
இந்த சம்பவத்தை நேரில் பார்த்தவர்கள் கூறுகையில், 13 வயது சிறுவனை முதலில் ஆற்றில் வீசியதாகவும் அதன் பிறகு 16 வயது சிறுமியை கட்டாயப்படுத்தி பாலத்தில் ஏற்றிய தந்தை அவரையும் ஆற்றில் வீசியதாக தெரிவித்தனர்.
