மன்னார்குடி:
முன்னாள் எம்.எல்.ஏ.வான மன்னை மு.அம்பிகாபதி(வயது 83) நேற்று இரவு மரணம் அடைந்தார். 15.8.1937 அன்று பிறந்த அம்பிகாபதி 1977 மற்றும் 1980 ஆகிய 2 முறை மன்னார்குடி சட்டசபை தொகுதி இந்திய கம்யூனிஸ்டு உறுப்பினராக இருந்தவர். இவர் எம்.எல்.ஏ.வாக பதவி வகித்த காலத்தில் சைக்கிளில் இருவர் பயணம் செய்வதற்கு சட்டரீதியான அனுமதி பெற்றுத்தந்தவர் என்ற பெருமைக்கு உரியவர். மேலும் 1985-1986-ம் ஆண்டு சிறுசேமிப்புத்துறை துணை தலைவராகவும் பதவி வகித்துள்ளார்.
1987-ம் ஆண்டு முதல் மன்னார்குடி கம்பன் கழக தலைவராக இருந்து வந்தார். தீவிர அரசியலில் இருந்து ஒதுங்கி இருந்த அவர் தொடர்ந்து இலக்கிய கூட்டங்களில் பங்கேற்று இலக்கிய சொற்பொழிவாற்றி வந்தார். கடந்த சில மாதங்களாக முதுமை காரணமாக அவதிப்பட்டு வந்த அவர் உடல் நலம் குன்றியதால் தஞ்சையில் உள்ள தனியார் மருத்துவமனையில் அனுமதிக்கப்பட்டிருந்தார். இந்த நிலையில் சிகிச்சை பலனின்றி நேற்று இரவு மரணம் அடைந்தார்.
