ஒகேனக்கல்:
கர்நாடக மாநிலத்தில் உள்ள காவிரி நீர்பிடிப்பு பகுதிகளில் பெய்த மழையின் காரணமாக கடந்த சில நாட்களுக்கு முன்பு ஒகேனக்கல்லுக்கு நீர்வரத்து அதிகரித்து. தற்போது கர்நாடக மாநிலத்தில் மழை அளவு குறைந்ததால் ஒகேனக்கல்லுக்கு நீர்வரத்து சரிய தொடங்கியது.
நேற்று ஒகேனக்கல்லுக்கு நீர்வரத்து 8 ஆயிரத்து 500 கன அடியாக வந்து கொண்டிருந்தது. இன்று மேலும் நீர்வரத்து சரிந்து 6 ஆயிரம் கன அடியாக குறைந்தது.
கடந்த சில நாட்களுக்கு முன்பு நீர்வரத்து அதிகரித்ததன் காரணமாக ஒகேனக்கல்லில் குளிக்கவும், பரிசல் இயக்கவும் மாவட்ட நிர்வாகம் சார்பில் தடை விதிக்கப்பட்டு இருந்தது.
தற்போது 6 ஆயிரம் கனஅடி நீர்வரத்து சரிந்து வருவதால் ஒகேனக்கல்லில் இன்று காலை மாமரத்துகடுவு பகுதியில் இருந்து மீண்டும் பரிசல் இயக்க மாவட்ட நிர்வாகம் அனுமதி வழங்கியது. 6 நாட்களுக்கு பிறகு பரிசல் இயக்க அனுமதி வழங்கியதால் இன்று ஒகேனக்கல்லுக்கு வருகை தந்த சுற்றுலா பயணிகள் பரிசலில் சென்று மகிழ்ந்தனர்.
தொடர்ந்து அருவிகளில் குளிக்க தடை விதிக்கப்பட்டு உள்ளது. இதனால் சுற்றுலா பயணிகள் அருவிகளில் குளிக்க முடியாமல் ஏமாற்றத்துடன் திரும்பி சென்றனர்.
