திண்டுக்கல்:
டி.என்.பி.எல். தொடரில் இன்று மோதும் காரைக்குடி காளை, மதுரை பாந்தர்ஸ் இரு அணிகளும் சம புள்ளிகளுடன் இருப்பதால் எந்த அணி பிளேஆப் சுற்றுக்கு நுழையும் என்பது எதிர்பார்ப்பை ஏற்படுத்தி உள்ளது.
3-வது டி.என்.பி.எஸ். 20 ஓவர் கிரிக்கெட் போட்டி சென்னை, நெல்லை, திண்டுக்கல் ஆகிய இடங்களில் நடைபெற்று வருகிறது. 8 அணிகள் பங்கேற்றுள்ள இந்தப் போட்டியில் ஒவ்வொரு அணியும், மற்ற அணிகளுடன் தலா 1 முறை மோத வேண்டும். ‘லீக்’ முடிவில் புள்ளிகள் அடிப்படையில் முதல் 4 இடங்களை பிடிக்கும் அணிகள் ‘பிளேஆப்’ சுற்றுக்கு தகுதி பெறும்.
நேற்றுடன் 23 ஆட்டம் முடிந்துவிட்டன. இதுவரை எந்த அணியும் ‘பிளேஆப்’ சுற்றுக்கு தகுதி பெறவில்லை. காரைக்குடி காளை, திண்டுக்கல் டிராகன்ஸ், மதுரை பாந்தர்ஸ் ஆகிய அணிகள் தலா 8 புள்ளிகளுடனும், கோவை கிங்ஸ், டூட்டி பேட்ரியாஸ், திருச்சி வாரியர்ஸ் தலா 6 புள்ளிகளுடனும் உள்ளன. காஞ்சி வீரன்ஸ், நடப்பு சாம்பியன் சேப்பாக் சூப்பர் கில்லீஸ் அணிகள் தலா 2 புள்ளிகள் பெற்று ஏற்கனவே வாய்ப்பை இழந்துவிட்டன.
டி.என்.பி.எல். போட்டியின் 24-வது லீக் ஆட்டம் திண்டுக்கல் அடுத்த நத்தம் என்.பி.ஆர். கல்லூரி மைதானத்தில் இன்று இரவு 7.15 மணிக்கு நடக்கிறது. இதில் அனிருத் தலைமையிலான காரைக்குடி காளை- ரோகித் தலைமையிலான மதுரை பாந்தர்ஸ் அணிகள் மோதுகின்றன.
இரு அணிகளும் தலா 8 புள்ளியுடன் உள்ளன. இதனால் வெற்றி பெறும் அணி ‘பிளேஆப்’ சுற்றுக்கு தகுதி பெறும். தோல்வி அடைந்தாலும் இரு அணிகளுக்கும் இன்னும் ஒரு ஆட்டம் உள்ளன.
காரைக்குடி காளை அணி தொடக்க ஆட்டத்தில் சூப்பர் ஓவரில் கோவையிடம் தோற்றது. அதைத் தொடர்ந்து தொடர்ச்சியாக காஞ்சி வீரன்ஸ் (8 விக்கெட்), சேப்பாக் சூப்பர் கில்லிஸ் (47 ரன்), திருச்சி வாரியர்ஸ் (1 விக்கெட்), திண்டுக்கல் டிராகன்ஸ் (6 விக்கெட்) ஆகிய அணிகளை வீழ்த்தியது.
மதுரை பாந்தர்ஸ் அணி சேப்பாக் சூப்பர் கில்லீஸ் (26 ரன்), டூட்டி பேட்ரியாஸ் (7 விக்கெட்), காஞ்சி வீரன்ஸ் (11 ரன்), திருச்சி வாரியர்ஸ் (5 விக்கெட்) ஆகியவற்றை வீழ்த்தியது. திண்டுக்கல் டிராகன்சிடம் தோற்று இருந்தது.
காரைக்குடி காளையை போலவே மதுரை அணியும் தொடர்ச்சியாக 4 வெற்றியை பெற்று இருந்தது. இதனால் இரு அணிகளும் சமபலத்துடன் மோதுவதால் இன்றைய ஆட்டம் விறுவிறுப்பாக இருக்கும். #TNPL2018
