நாடாளுமன்ற மக்களவை கூட்டத் தொடர் நாளையுடன் முடிவடைகிறது

இந்திய நாடாளுமன்ற மழைக்கால கூட்டத்தொடர் கொரோனா வைரஸ் தொற்றால் குறிப்பிட்ட நேரத்தில் நடத்த முடியாமல காலம் தள்ளிப்போனது. இறுதியில் கொரோனா வைரஸ் தொற்றின் வழிகாட்டு நெறிமுறைகளை பின்பற்றி கடந்த 14-ந்தேதி கூடியது.

எதிர்க்கட்சிகள் கடும் எதிர்ப்பு தெரிவித்தும் மத்திய அரசு வேளாண் மசோதாக்களை இரு அவைகளிலும் தாக்கல் செய்து நிறைவேற்றியது. மேலும், எம்.பி.க்களுக்கான சம்பள குறைப்பு மசோதாக்களை தாக்கல் செய்தது.

மாநிலங்களவை வேளாண் மசோதாக்களுக்கு எதிர்ப்பு தெரிவித்த விவகாரத்தில் 8 எம்.பி.க்கள் சஸ்பெண்ட் செய்யப்பட்டுள்ளனர். அவர்கள் மீதான சஸ்பெண்ட்-ஐ திரும்பப் பெற வேண்டும் என எதிர்க்கட்சிகள் அனைத்தும் கோரிக்கை விடுத்து வருகின்றன. மேலும், அவைகளை புறக்கணிக்க இருப்பதாகவும் காங்கிரஸ் தெரிவித்துள்ளது.

இந்நிலையில் நாளைய கூட்டம் முடிந்த பின்னர், தேதி குறிப்பிடாமல் மக்களவை ஒத்திவைக்கப்படும் எனத் தகவல் தெரிவிக்கின்றன.