ஜம்மு காஷ்மீரில் 6 புதிய பாலங்கள்- காணொலி வாயிலாக திறந்து வைத்தார் ராணுவ மந்திரி

புதுடெல்லி:

ஜம்மு காஷ்மீர் மாநிலத்தில் உள்கட்டமைப்பு மேம்பாட்டு பணிகளை எல்லை சாலைகள் அமைப்பு (பிஆர்ஓ) செய்து வருகிறது. அவ்வகையில், ஜம்மு செக்டாரில் ரூ.43 கோடி மதிப்பீட்டில் 6 புதிய பாலங்களை பிஆர்ஓ கட்டமைத்துள்ளது. இந்த பாலங்களை ராணுவ மந்திரி ராஜ்நாத் சிங் இன்று திறந்து வைத்தார்.

ராணுவ மந்திரி டெல்லியில் இருந்தபடி காணொலி வாயிலாக பாலங்களை திறந்து வைத்தார். உயர் அதிகாரிகள் உடனிருந்தனர். அதேசமயம் பாலங்கள் உள்ள பகுதிகளில் நடைபெற்ற விழாவில், அந்தந்த பகுதி ராணுவ அதிகாரிகள் பங்கேற்று, கொடியசைத்து வாகன போக்குவரத்தை தொடங்கி வைத்தனர். 

ஜம்மு காஷ்மீர், உத்தரகாண்ட் மாநிலங்களில் கூடுதலாக ரூ.1691 கோடி மதிப்பீட்டில் பிஆர்ஓ நெடுஞ்சாலை பணிகளை மேற்கொள்ள மத்திய அரசு கடந்த மாதம் ஒப்புதல் அளித்தது குறிப்பிடத்தக்கது.