சிவகங்கை

சிவகங்கை:

சிவகங்கை மாவட்ட கலெக்டர் ஜெயகாந்தன் விடுத்துள்ள செய்திக் குறிப்பில் கூறி இருப்பதாவது:-

சிவகங்கை மாவட்டம், சிங்கம்புணரி வட்டம், கிருங்காக்கோட்டை கிராமத்தில் வருகிற 14-ந் தேதி ஜல்லிக்கட்டு நடத்த உத்தேசிக்கப்பட்டுள்ளது.

இந்தப்பகுதி மக்கள் வாழும் குடியிருப்பு பகுதியாகவும், பொதுமக்கள் உயிருக்கும், உடமைக்கும் பாதுகாப்பு இல்லாத காரணத்தினாலும் ஜல்லிக்கட்டு நடத்த அனுமதி வழங்க இயலாதென சிங்கம்புணரி வட்டாட்சியர் அனுமதி மறுத்தார்.

ஜல்லிக்கட்டு நடத்துவதற்கு தமிழக அரசால் சட்ட விதிமுறைகள் வகுக்கப்பட்டு அதில் ஜல்லிக்கட்டு நடத்துவதற்கு வருடத்தில் ஜனவரி முதல் மே மாதம் வரையிலான காலமே அனுமதிக்கப்பட்ட காலம் என்பதால் கிருங்காக்கோட்டை கிராமத்தில் ஜல்லிக்கட்டு நடத்த அரசால் அனுமதி ஏதும் வழங்கப்படவில்லை.

தேவகோட்டை வருவாய் கோட்டாட்சியர், திருப்பத்தூர் காவல் துணை கண்காணிப்பாளர் மற்றும் சிங்கம்புணரி வட்டாட்சியர் ஆகியோர் முன்னெச்சரிக்கை நடவடிக்கை மேற்கொண்டு 14-ந்தேதி ஜல்லிக்கட்டு நடைபெறாத வகையில் கண்காணித்து சட்டம் மற்றும் ஒழுங்கை பராமரிக்க அறிவுறுத்தப்பட்டுள்ளது.

மேலும் அன்றைய தினம் தடையை மீறி பொதுமக்களுக்கு பாதுகாப்பு இல்லாத குடியிருப்பு பகுதியில் அரசு அனுமதியின்றி சட்டத்திற்கு புறம்பாக ஜல்லிக்கட்டு நடத்தினால் கிராம ஜல்லிக்கட்டு ஒருங்கிணைப்பாளர் மற்றும் விழா குழுவினர் மீது குற்றவியல் நடவடிக்கை எடுப்பதுடன் அனுமதி பெறாத கிருங்காக்கோட்டை கிராமத்திற்கு ஜல்லிக்கட்டு மாடுகளை அழைத்து வரும் ஜல்லிக்கட்டு மாடுகளின் உரிமையாளர்கள் மீதும் நடவடிக்கை எடுக்கப்படும்.

பொதுமக்களும், ஜல்லிக்கட்டு மாடு உரிமையாளர்களும் பொதுமக்கள் நலன் கருதி இந்த நிகழ்ச்சியில் கலந்து கொள்ளாமல் சட்டப்படி மாவட்ட நிர்வாகத்திற்கு ஒத்துழைப்பு வழங்க வேண்டும்.

இவ்வாறு அதில் கூறப்பட்டுள்ளது.

காரைக்குடி:

சிவகங்கை மாவட்டம் காரைக்குடி முத்துப்பட்டணம் பகுதியைச் சேர்ந்தவர் கார்த்திகா (வயது 25). இவர் செக்காலைவீதியில் உள்ள ஒரு கடையில் வேலை செய்து வந்தார். கடந்த மாதம் கடையில் வேலை பார்க்கும் சக ஊழியர்கள் தொந்தரவு செய்ததாக கூறி கார்த்திகா விஷம் குடித்து தற்கொலைக்கு முயன்றார்.

அதற்கு முன்னதாக வாட்ஸ்-அப்பில் அழுகையோடு பதிவு செய்து நடவடிக்கை எடுக்க வலியுறுத்தி இருந்தார். இந்த வாட்ஸ்-அப் தகவல் காரைக்குடி நகர் முழுவதும் பரவி பெரும் பரபரப்பை ஏற்படுத்தியது. இதற்கிடையில் கார்த்திகா சிகிச்சை பெற்று குணமடைந்தார்.

இந்தநிலையில் காரைக்குடி மாவட்ட உரிமையியல் நீதிமன்ற நடுவர் பாலமுருகன் தாமாக முன்வந்து, இது குறித்து விசாரிக்க கார்த்திகாவை கோர்ட்டில் ஆஜர்படுத்த வடக்கு போலீசாருக்கு உத்தரவிட்டார். அதன்பேரில் போலீசார் கார்த்திகாவை நீதிபதி முன்பு ஆஜர்படுத்தினர். அப்போது நடந்த சம்பவம் குறித்து போலீசார் என்ன நடவடிக்கை எடுத்தனர் என்று கார்த்திகாவிடம் நீதிபதி கேட்டதற்கு, அவர் நடவடிக்கை ஏதும் எடுக்கவில்லை என்று கூறினார். பின்பு போலீசாரிடம் என்ன நடவடிக்கை எடுக்கப்பட்டது என்று கேட்டபோது, போலீசார், கார்த்திகா எவ்வித நடவடிக்கையும் எடுக்க வேண்டாம் என்று கூறியதாக நீதிபதியிடம் தெரிவித்தனர்.

இதையடுத்து கார்த்திகாவிற்கு அறிவுரை வழங்கிய நீதிபதி, காரைக்குடி அரசு ஆஸ்பத்திரிக்கு ஒரு வாரம் சென்று, தற்கொலை முயற்சி செய்து, அனுமதிக்கப்பட்டு சிகிச்சை பெற்று வருபவர்களிடம், தற்கொலை மனநிலையை போக்கும் வகையில் விழிப்புணர்வை ஏற்படுத்தும் ஆலோசனை (கவுன்சிலிங்) வழங்க உத்தரவிட்டார்.

சிவகங்கை:

மாவட்ட ஊரக வளர்ச்சித்துறையின் மூலம் ஊராட்சி அளவில் மேற்கொள்ளப்பட்டு வரும் திட்டப்பணிகள் குறித்து ஆய்வுக் கூட்டம் சிவகங்கை கலெக்டர் அலுவலகத்தில், கலெக்டர் ஜெயகாந்தன் தலைமையில் நடைபெற்றது. அதில் கலெக்டர் பேசியதாவது:- அனைத்து ஊராட்சி பகுதிகளிலும் பொதுமக்களுக்கு தேவையான குடிநீர் தங்கு தடையின்றி வழங்க வேண்டும்.

மேலும் குடிநீர் தட்டுப்பாடு உள்ள இடங்களில் ஆழ்துளை கிணறுகள் அமைத்து தண்ணீர் வழங்கிட நடவடிக்கை எடுக்கவேண்டும். அதேபோல் குளங்கள், ஊருணிகள் மற்றும் கண்மாய்கள், வரத்துக்கால்வாய்களை சீரமைக்க வேண்டும்.

இந்த பணியினை ஒருமாதத்திற்குள் விரைந்து முடித்திட அதிகாரிகள் உறுதுணையாக இருக்க வேண்டும். நீர்நிலை ஆதாரங்களிலுள்ள ஆக்கிரமிப்புகளை அகற்றிட பணிகள் மேற்கொள்ள வேண்டும். தெருவிளக்குகள் போன்ற கோரிக்கைகளுக்கு முன்னுரிமை கொடுத்து பணிகளை மேற்கொள்வதுடன் சாலைகள், பழுதடைந்த கட்டடங்களை சீரமைக்கவும் நடவடிக்கை எடுக்க வேண்டும்.

கூட்டத்தில் மாவட்ட ஊரக வளர்ச்சி முகமை திட்ட இயக்குனர் வடிவேல், மகளிர் திட்ட இயக்குனர் அருண்மணி, உதவி இயக்குனர் விஜயநாதன் உள்பட அரசு அலுவலர்கள் பலர் கலந்து கொண்டனர். 

காரைக்குடி:

காரைக்குடி நகர் வளர்ந்து வரும் நகரமாக உள்ளது. இந்த நகரில் வசிக்கும் மக்கள் வாரந்தோறும் புதன், ஞாயிறு உள்ளிட்ட நாட்களில் அதிகஅளவில் அசைவத்தை விரும்பி சாப்பிடுவார்கள். இதில் மீன் பிரியர்கள் அதிகஅளவில் உள்ளனர். பொதுவாக காரைக்குடி மற்றும் அதன் சுற்றுவட்டார பகுதிக்கு விற்பனைக்காக கொண்டு வரப்படும் மீன்கள் ராமநாதபுரம் மாவட்டத்தில் உள்ள தொண்டி மற்றும் ராமேசுவரத்தில் இருந்து வரும்.

இந்நிலையில் காரைக்குடி பகுதியில் மீன் மார்க்கெட் இல்லாததால் நகர் முழுவதும் ஆங்காங்கே சாலையோரங்களில் தார்ப்பாயை விரித்து வியாபாரிகள் கடை போட்டு நடத்தி வருகின்றனர். இதனால் அவற்றின் கழிவுகள் ஆங்காங்கே கொட்டப்படுவதால் துர்நாற்றம் வீசி சுகாதார கேடு ஏற்படுகிறது. இதையடுத்து ஆங்காங்கே போடப்படும் கடைகளை ஒரே இடத்திற்கு கொண்டுவர காரைக்குடி நகரில் மீன் மார்க்கெட் அமைக்க வேண்டும் என்று பல்வேறு அமைப்புகள் கோரிக்கை விடுத்து வந்தன.

இதையடுத்து இந்த கோரிக்கையை ஏற்று காரைக்குடி நகராட்சி வாரச்சந்தை அருகில் தேசிய மீன்வள வாரியம் சார்பில் ரூ.1கோடி மதிப்பீட்டில் மீன்மார்க்கெட்டுக்கு கட்டிடம் கட்டப்பட்டுள்ளது. இந்த மார்க்கெட்டில் மொத்தம் 60 கடைகள் உள்ளன.

இந்நிலையில் இந்த மார்க்கெட் கட்டிடம் கட்டப்பட்டு பல மாதங்களாகியும் இதுவரை திறக்கப்படாமல் திறப்பு விழாவிற்காக காத்திருக்கிறது. இதனால் சாலையோரத்தில் மீன்கடை போடும் வியாபாரிகள் எண்ணிக்கை வாரந்தோறும் பெருகி வருகிறது. எனவே சம்பந்தப்பட்ட அதிகாரிகள் உடனடியாக இந்த மீன்மார்க்கெட்டை பயன்பாட்டிற்கு கொண்டு வரவேண்டும். அதன் மூலம் காரைக்குடி நகர் சுகாதார கேடு இல்லாத நகரமாக உருவாகும் என்று இப்பகுதி பொதுமக்கள் கோரிக்கை விடுத்துள்ளனர்.

சிவகங்கை:

சிவகங்கை மாவட்ட கலெக்டர் அலுவலக கூட்ட அரங்கில் மாற்றுத்திறனாளிகள் சிறப்பு குறை தீர்க்கும் மற்றும் மக்கள் குறை தீர்க்கும் நாள் கூட்டம் கலெக்டர் ஜெயகாந்தன் தலைமையில் நடைபெற்றது.

வேலை வாய்ப்பு, இலவச வீட்டுமனைப்பட்டா, விபத்து நிவாரணம் கோருதல், பசுமை வீடு கேட்டல், சமூக பாதுகாப்பு திட்டத்தின் கீழ் உதவித்தொகை கோருதல், வங்கிக்கடன், மாவட்ட ஊனமுற்றோர் மற்றும் மறுவாழ்வுத்துறை உதவித்தொகை மற்றும் உபகரணங்கள் கேட்டல், குடும்ப அட்டை கோருதல், இலவச தையல் இயந்திரம் வழங்கக் கேட்டல், ஆக்கிர மிப்பு அகற்ற கேட்டல், பட்டா ரத்து தொடர்பான மேல்முறையீடு, மின் இணைப்பு உள்ளிட்ட 312 கோரிக்கை மனுக்கள் பெறப்பட்டன.

பின்னர் சமூக பாதுகாப்புத் திட்டத்தின் கீழ் 1 பயனாளிக்கு மின்சாரம் தாக்கி இறந்த அவரது வாரிசுதாராகிய மனைவிக்கு முதலமைச்சர் பொது நிவாரண நிதியிலிருந்து ரூ.3 லட்சத்துக்கான காசோலையினையும், மாவட்ட மாற்றுத்திறனாளிகள் நலத்துறையின் மூலம் 16 பயனாளிகளுக்கு ரூ.1,91,500-க்கான காசோலையினையும் ஆக மொத்தம் 17 பயனாளிகளுக்கு ரூ.4,91,500 மதிப்பீட்டில் நலத்திட்ட உதவிகளை கலெக்டர் ஜெயகாந்தன் வழங்கினார்.

இக்கூட்டத்தில் மாவட்ட வருவாய் அலுவலர் லதா, மாவட்ட ஊரக வளர்ச்சி முகமை திட்ட இயக்குநர் வடிவேல், கலெக்டரின் நேர்முக உதவியாளர் (பொது) ராமபிரதீபன் உள்பட அரசு அலுவலர்கள் கலந்து கொண்டனர்.

சிவகங்கை:

சிவகங்கை மாவட்டத்தில் ஏற்பட்டுள்ள குடிநீர் பிரச்சினைகளை தீர்ப்பது தொடர்பான ஆய்வு கூட்டம் சிவகங்கை கலெக்டர் அலுவலகத்தில் தமிழ்நாடு கனிம நிறுவன மேலாண்மை இயக்குனர் மகேசன் காசிராஜன், தலைமையிலும் மாவட்ட கலெக்டர் ஜெயகாந்தன் முன்னிலையில் நடைபெற்றது.

மாவட்டத்தில் நிலவும் குடிநீர் பிரச்சினைக்கு எடுக்கப்பட்டு வரும் நடவடிக்கைகள் குறித்து மாவட்டத்தில் உள்ள நகராட்சி யூனியன் பேரூராட்சி அலுவலர்களுடன் அவர் ஆய்வு நடத்தினார். கூட்டத்தில் மாவட்ட வருவாய் அலுவலர் லதா, மாவட்ட ஊரக வளர்ச்சி முகமை திட்ட இயக்குனர் வடிவேல், உதவி இயக்குனர் (ஊராட்சிகள்) விஜயநாதன் மற்றும் அரசு அலுவலர்கள் உள்பட பலர் கலந்துகொண்டனர்.பின்னர் மகேசன் காசிராஜன் பேசியதாவது:- சிவகங்கை மாவட்டத்தில் 3 நகராட்சிகள், 12 பேரூராட்சிகள் மற்றும் 12 ஊராட்சி ஒன்றியங்களுக்கு உட்பட்ட 445 கிராம ஊராட்சிகளில் பொதுமக்களுக்கு தேவையான குடிநீர் தங்குதடையின்றி வழங்க நடவடிக்கை எடுக்கப்பட்டு வருகிறது.

மாவட்டத்தில் 2,723 குக்கிராமங்கள் உள்ளன. இதில் 1,730 குக்கிராமங்களுக்கு தினசரி குடிநீர்வினியோகம் மேற்கொள்ளப்பட்டு வருகிறது. 993 குக்கிராமங்களுக்கு ஒருநாள் விட்டு ஒருநாள் குடிநீர் வினியோகம் செய்யப்பட்டு வருகிறது. மேலும் இதில் 217 குக்கிராமங்கள் கோடைகாலத்தில் பாதிப்பிற்கு உள்ளாகும் என்பதை முன்னரே கண்டறியப்பட்டு ரூ.12 கோடி மதிப்பீட்டில் திட்டப்பணிகள் மேற்கொள்ளப்பட்டு பொதுமக்களின் பயன்பாட்டிற்கு கொண்டுவரப்பட்டுள்ளது.

மற்றபடி 3 நகராட்சிகள், 12 பேரூராட்சிகளில் சில இடங்களில் குடிநீர் தினசரியும் மற்றும் ஒருசில இடங்களில் ஒருநாள் விட்டு ஒருநாள் வழங்கப்பட்டு வருகிறது. வரும் நிதியாண்டில் நீர்நிலை ஆதாரங்களை சீர்செய்ய கூடுதல் நிதி கோரப்பட்டுள்ளது. தற்போது மாவட்டத்தில் உள்ள அனைத்து நீர்நிலை ஆதாரங்களும் சீர்செய்யும் பணி தொடங்கப்பட்டு நிறைவு பெறும் நிலையில் உள்ளது.

இவ்வாறு அவர் கூறினார்.

மானாமதுரை:

மானாமதுரை அருகே வான்புரம் மாதா நர்சிங் கல்லூரியில் சர்வதேச யோகா தினம் கொண்டாடப்பட்டது. விழாவிற்கு மாதா நர்சிங் கல்லூரி முதல்வர் அருள்மணி எஸ்தர் ராணி தலைமை வகித்தார். யோகாவின் சிறப்புகள் குறித்து டாக்டர்கள் சண்முகபிரியா, யோகேஸ்வரி ஆகியோர் எடுத்துரைத்தனர். தினமும் யோகா செய்வதால் உடல், மனம் ஆரோக்யம் பெறுகிறது என்று கல் லூரியின் செய்தி தொடர்பாளர் பால்ராஜ் தெரிவித்தார். விழாவில் கல்லூரி ஆலோசகர் மேரியம்மாள் நன்றி கூறினார்.

தேவகோட்டைஅருகேஉள்ள புளியால் அரசு உயர்நிலைப்பள்ளியில் நடந்த நிகழ்ச்சிக்கு பள்ளி தலைமையாசிரியை தனலட்சுமி தலைமை தாங்கினார். ஆசிரியர் ஜோசப் இருதயராஜ் முன்னிலை வகித்தார். யோகாதோன்றியவிதம் பற்றியும், யோகாவினால் ஏற்படக்கூடிய நன்மைகள் பற்றி பேசப்பட்டது.

தேவகோட்டை ராம்நகர் ஆக்ஸ்போர்டு மழலையர் மற்றும் தொடக்க பள்ளியில். பள்ளி தாளாளர் விஜயன் அவர்கள் தலைமையில் யோகா ஆசிரியர் ராமநாதன் மாணவர்களுக்கு பயிற்சி அளித்தார். தலைமையாசிரியை அமுதா, உதவி தலைமை ஆகியோர் கலந்து கொண்டனர்.

தேவகோட்டை ஸ்ரீ சேவுகன் அண்ணாமலை கல்லூரியில் நடைபெற்ற நிகழ்ச்சிக்கு கல்லூரி முதல்வர் சிந்தா மணிவஸ்திராணி தலைமை தாங்கினார். தேவகோட்டை மனவளக்கலை மன்றத் தலைவர் ராதாகிருஷ்ணன் யோகா பயிற்சி குறித்த விழிப்புணர்வை ஏற்படுத்தினார்.

இளையான்குடி டாக்டர் சாகீர் உசேன் கல்லூரியில் நடைபெற்ற நிகழ்ச்சியில் மாணவர்களுக்கு யோகா பயிற்சி நடைபெற்றது. தமிழ்த்துறைத் தலைவர் இபுராஹிம் வரவேற்றார். கல்லூரி செயலாளர் ஜபருல்லாஹ்கான் தலைமை தாங்கினார். கல்லூரி முதல்வர் வாழ்த்தி பேசினார். சிறப்பு விருந்தினராக பரமக்குடி அரசு கலைக் கல்லூரி உடற்கல்வி இயக்குனர் பிரசாத் கலந்துகொண்டு மாணவர்களுக்கு யோகா பயிற்சியளித்தார். முடிவில் உடற்கல்வி ஆசிரியை வெற்றி நன்றி கூறினார்.

காரைக்குடி அழகப்பா பல்கலைக்கழக யோகா கல்வி மையம் மற்றும் நாட்டு நலப்பணித் திட்டம் ஆகியன இணைந்து சர்வதேச யோகா தினம் பல்கலைக்கழக அறிவியல் வளாகத்தில் நடைபெற்றது. பல்கலைக்கழக துணைவேந்தர் ராஜேந்திரன் தலைமை தாங்கினார்.

காரைக்குடி செல்லப்பன் வித்யா மந்திர் சர்வதேச பள்ளியில் யோகா தினம் கொண்டாடப்பட்டது. பள்ளி முதல்வர் சிவக்குமார் நிகழ்ச்சிக்கு தலைமை தாங்கினார். யோகா ஆசிரியை மோகனப்பிரியா யோகா முத்திரைகளை மாணவர்களுக்கு செய்து காட்டினார். யோகா பயிற்சி மூலமாக உடலையும் ஆன்மாவையும் சீர்படுத்தலாம் என்று பள்ளி தாளாளர் சத்தியன் பேசினார்.

கோவிலூர் மடாலய கல்வி நிறுவனங்கள் சார்பில் யோகா தினம் கொண்டாடப்பட்டது. கோவிலூர் நாச்சியப்ப சாமிகள் கல்லூரி முதல்வர் செல்லப்பா வரவேற்றார். கோவிலூர் ஆதீனம் மெய்யப்ப ஞானதேசிக சுவாமிகள் வாழ்த்துரை வழங்கினார். நிகழ்ச்சியில் மடாலய கல்வி நிறுவனங்களின் மாணவ- மாணவிகள் யோகா முத்திரைகளை செய்து காட்டினார்

மானகிரியில் உள்ள செட்டிநாடு பப்ளிக் பள்ளியில் நடைபெற்ற நிகழ்ச்சியை பள்ளியின் நிறுவன தலைவர் குமரேசன் தொடங்கி வைத்தார். பள்ளி முதல்வர் ரமேஷ் வரவேற்றார். இதில் ஏர்விங் கமாண்டர் குணசேகரன் சிறப்பு விருந்தினராக கலந்துகொண்டார். முடிவில் பள்ளி முதல்வர் ரமேஷ் நன்றி கூறினார்.

ஆறாவயல் பரத் பப்ளிக் பள்ளியில் நடைபெற்ற யோகா நிகழ்ச்சிக்கு பள்ளி நிர்வாகக்குழு உறுப்பினர் என்ஜினீயர் செல்லத்துரை சிறப்பு விருந்தினராக கலந்து கொண்டார். பல்கலைக்கழக யோகா ஆசிரியை யோகேஸ்வரி மாணவ- மாணவிகளுக்கு யோகா பயிற்சிகளை அளித்தார். முடிவில் பள்ளி துணை முதல்வர் அமுதா நன்றி கூறினார்.