நாகப்பட்டினம்

சீர்காழி:

சீர்காழியில் தமிழ்நாடு வணிகர் சங்கங்களின் பேரமைப்பின் செயற்குழு கூட்டம் நடைபெற்றது. மாவட்டதலைவர் தமிழ்ச்செல்வன் தலைமை வகித்தார். மாவட்ட செயலாளர் நவநீதன் முன்னிலை வகித்தார். சீர்காழி வர்த்தக சங்க தலைவர் சிவசுப்ரமணியன் வரவேற்றார். தமிழ்நாடு வணிகர் சங்கங்களின் பேரமைப்பு மாநில தலைவர் விக்கிரமராஜா கலந்து கொண்டு பேசுகையில் கூறியதாவது:-

சென்னையில் தண்ணீர் இல்லாமல் மக்கள் சிரமப்படுகிறார்கள். திண்டுக்கலில் வாரம் இருமுறை மட்டுமே தண்ணீர் வழங்கப்படுகிறது. கிருஷ்ணகிரி, நாகை, திருவாரூர் மாவட்டங்களில் மட்டுமே ஓரளவு பசுமையாக காணப்படுகிறது. வருகின்ற 26-ந் தேதி மாநில நிர்வாகக்குழு கூட்டம் சென்னையில் கூடுகிறது. இதில் மாநிலத் துணைத்தலைவராக சிவசுப்ரமணியன் தேர்வு செய்யப்பட இருகிறார். ஜி.எஸ்.டி. கணக்கு சமர்ப்பிக்க இரண்டு மாதம் அவகாசம் வழங்கப்பட்டுள்ளது. அதற்குள் கணக்களை வழங்கவில்லை என்றால் 200 சதவீதம் அபராதம் வசூல் செய்யப்படும் என தெரிவிக்கப்பட்டுள்ளது.

ஜி.எஸ்.டி வரி விதிப்பது தொடர்பாக வர்த்தகர்களை அழைத்து பேசவில்லை. வறுத்த வேர்கடலைக்கு 15 சதவீதம் வரி வெளிநாட்டில் இருந்து இறக்குமதி செய்யப்படும் பாதாம் பருப்பிற்கு 5 சதவீதம் வரி. வெளிநாட்டு உணவு பொருட்களுக்கு பர்கர் பீசாவிற்கு 5 சதவீதம் வரி உள்நாட்டு உணவு பொருட்களுக்கு 18 சதவீதம் வரி விதிக்கப்பட்டுள்ளது.

ஒருவருடத்திற்கு 20 லட்சத்திற்குள் வியாபாரம் செய்பவர்களுக்கு ஜி.எஸ்.டி. தேவையில்லை என அறிவிக்கப்பட்டுள்ளது. இதற்கு மேல் வியாபாரம் செய்தால் அரசு சேல்ஸ் டாக்ஸ் கணக்கில் வந்துவிடும் அப்படி வந்தால் 300 சதவீதம் அபாராதமும், ஜெயில் தண்டனையும் கிடைக்கும் என தெரிவிக்கப்பட்டுள்ளது. 20 லட்சம் வரை வரி கிடையாது என்பதை மாற்றி 50 லட்சமாக உயர்த்தி தர வேண்டும் என கோரிக்கை வைத்துள்ளோம். ஜி.எஸ்.டி வரியை எதிர்க்க அனைத்து வியாபாரிகளும் தயாராக வேண்டும். காலாவதியான பொருட்களை தனியாக வைக்க வேண்டும். ஜி.எஸ்.டி. மூலம் அரசுக்கு பல கோடிரூபாய் வருமானம் கிடைத்துள்ளது. 60 வயது முடிந்த வியாபாரிகளுக்கு ஓய்வூதியம் வழங்க வேண்டும். விபத்துக்கள் ஏற்பட்டால் வியாபாரிகளுக்கு இழப்பீடு வழங்க வேண்டும்.

இவ்வாறு அவர் கூறினார்.

கூட்டத்தில் நிர்வாகிகள் துரைராஜன், ஹரக்சந்த், கியான்சந்த், அன்வர்அலி, செயற்குழு உறுப்பினர் சோலை, தமிழ்ச்செல்வம், சாமிராஜ், உள்ளிட்ட பலர் கலந்து கொண்டனர்.

வேளாங்கண்ணி:

நாகை மாவட்டம் வேளாங்கண்ணியில் புகழ் பெற்ற புனித ஆரோக்கிய மாதா பேராலயம் உள்ளது. இந்த ஆலயத்தின் ஆண்டு திருவிழா கடந்த 29-ந் தேதி கொடியேற்றத்துடன் தொடங்கியது.

விழாவையொட்டி தினமும் தமிழ், தெலுங்கு, ஆங்கிலம், இந்தி, கன்னடம், கொங்கனி, மராத்தி ஆகிய மொழிகளில் சிறப்பு திருப்பலிகள் நிறைவேற்றப்பட்டு வருகிறது.

மேலும் ஜெப மாலை, நவநாள் ஜெபம், மாதா மன்றாட்டு, திவ்ய நற்கருணை ஆசீர் நிகழ்ச்சிகளும் நடைபெறுகின்றன. ஒவ்வொரு நாளும் மதியம் 12 மணிக்கு கொடி ஏற்றுதலும், இரவு 9 மணிக்கு கொடி இறக்குதல் நிகழ்ச்சியும் நடைபெறுகிறது.

விழாவின் முக்கிய நிகழ்ச்சியான பெரிய தேர் பவனி இன்று (வியாழக்கிழமை) மாலை நடைபெறுகிறது. இதில் கலந்து கொள்ள வேளாங்கண்ணியில் பக்தர்கள் குவிந்து உள்ளனர்.

கோவில் வளாகம், கடற்கரை, பழைய கோவில் ஆகிய இடங்களில் பக்தர்கள் கூட்டம் அதிகமாக உள்ளது. பலத்த போலீஸ் பாதுகாப்பு போடப்பட்டு உள்ளது.

நாளை (வெள்ளிக்கிழமை) மாதாவின் பிறந்த நாள் விழா கொண்டாடப்படுகிறது. இதையொட்டி நாளை நாகை மாவட்டத்திற்கு உள்ளூர் விடுமுறை அறிவிக்கப்பட்டுள்ளது.

தலைஞாயிறு:

தலைஞாயிறு அருகே உள்ள பிரிஞ்ச மூலை பிள்ளையார்கோவில் தெருவைச் சேர்ந்தவர் தட்சிணாமூர்த்தி. தொழிலாளி.

இவர் சைக்கிளில் கடை வீதிக்கு சென்று பொருட்களை வாங்கி கொண்டு வீடு நோக்கி சென்றார். அவர் தலைஞாயிறு பொதுப்பணித்துறை அலுவலகம் முன்பு சென்ற போது அந்த வழியாக வந்த கார் மோதியது. இதில் படுகாயம் அடைந்து அவர் சம்பவ இடத்திலேயே பரிதாபமாக இறந்தார்.

இதுபற்றிய தகவல் கிடைத்ததும் தலைஞாயிறு போலீசார் சம்பவ இடத்துக்கு விரைந்து வந்து பலியான தட்சிணாமூர்த்தி உடலை மீட்டு பிரேத பரிசோதனைக்கு அனுப்பி வைத்தனர்.

போலீசாரின் விசாரணையில் தொழிலாளி மீது மோதிய கார் அ.தி.மு.க. ஒன்றிய செயலாளர் பால சுப்பிரமணியத்துக்கு சொந்தமானது என்பதும், அதனை முருகதாஸ் என்பவர் ஓட்டிவந்தபோது விபத்து ஏற்பட்டதும் தெரியவந்தது. இது தொடர்பாக தலைஞாயிறு போலீசார் வழக்கப்பதிவ செய்து கார் டிரைவரை தேடி வருகின்றனர்.

இந்த விபத்து தலைஞாயிறு பகுதியில் பரபரப்பை ஏற்படுத்தி உள்ளது.

வேதாரண்யம்:

நாகை மாவட்டம் வேதாரண்யம் அருகே உள்ள ஆறுகாட்டுத்துறை மீனவ கிராமத்தை சேர்ந்தவர் மயில் வாகனன். இவருக்கு சொந்தமான படகில் செல்வமணி, கோவிந்தன், ரவிகுமார், செல்வகுமார், வெற்றிவேல் ஆகியோர் கடலுக்கு மீன் பிடிக்க சென்றனர்.

இதே போல் சசிகுமார் என்பவருக்கு சொந்தமான படகில் ஆனந்தன், கலைமாறன், கதிரவன், சரவணன் ஆகியோர் மீன் பிடிக்க சென்றனர்.

அவர்கள் கோடியக்கரைக்ககு தென்கிழக்கே மீன் பிடித்து கொண்டிருந்தனர். அப்போது இலங்கை கடற்படை மற்றும் இலங்கை மீனவர்கள் அங்கு வந்தனர்.

இலங்கை கடற்படையினர் வேதாரண்யம் மீனவர்கள் மீது கற்கள் மற்றும் இரும்பு குண்டுகளால் தாக்கினார்கள்.

அப்போது இலங்கை மீனவர்கள் தமிழக மீனவர்களின் வலைகள் மற்றும் பல லட்சம் மதிப்புள்ள மீன்களை பறித்து கொண்டு அங்கிருந்து சென்று விட்டனர்.

மீன்கள், வலைகளை பறி கொடுத்த வேதாரண்யம் மீனவர்கள் வெறுங்கையுடன் கரைக்கு திரும்பினார்கள். இது குறித்து கடலோர காவல் படையினருக்கு தகவல் தெரிவிக்கப்பட்டது.

இலங்கை கடற்படை, மீனவர்கள் தாக்குதலுக்கும் இலங்கை மீனவர்கள் மீன்களை பறித்து செல்வதற்கும் முற்றுப்புள்ளி வைக்க வேண்டும் என வேதாரண்யம் மீனவர்கள் கூறினர்.

குத்தாலம்:

நாகை மாவட்டம் மயிலாடுதுறை அருகே உள்ள திருவாவடுதுறை செக்கடி கீழத் தெருவை சேர்ந்தவர் வெங்கட்ராமன் (42). விவசாய கூலி தொழிலாளி.

இவரது மனைவி கார்த்திகா (34). இவர்களுக்கு வர்ஷினி (11), சாதித்யா (7) ஆகிய 2 பெண் குழந்தைகள் உள்ளனர். வெங்கட்ராமன் தனது வீட்டை விரிவாக்கம் செய்து வந்தார். இதற்காக புதிய சுவர் கட்டப்பட்டு வந்தது.

நேற்று இரவு அவர் குடும்பத்துடன் வீட்டில் தூங்கி கொண்டிருந்தார். அப்போது வீட்டின் பழைய சுவர் இடிந்து விழுந்தது. இதில் வெங்கட்ராமன், கார்த்திகா, வர்ஷினி, சாதித்யா ஆகியோர் இடிபாடுகளுக்குள் சிக்கி கொண்டனர்.

அவர்களில் வெங்கட்ராமன், கார்த்திகா, சாதித்யா ஆகியோர் உடல் நசுங்கி பரிதாபமாக இறந்தனர். வர்ஷினி பலத்த காயத்துடன் முனகி கொண்டிருந்தார். இன்று காலை அந்த வழியாக சென்றவர்கள் இதனை பார்த்து மீட்பு பணியில் ஈடுபட்டனர்.

கையில் பலத்த காயம் அடைந்த அவரை மயிலாடுதுறை அரசு ஆஸ்பத்திரிக்கு அனுப்பி வைத்தனர். பலியான 3 பேர் உடல்களையும் தாசில்தார் திருமாறன் பார்வையிட்டார்.

பின்னர் பிரேத பரிசோதனைக்காக மயிலாடுதுறை அரசு ஆஸ்பத்திரிக்கு அனுப்பி வைக்கப்பட்டது. சுவர் இடிந்து 3 பேர் பலியான சம்பவம் குத்தாலம் பகுதியில் சோகத்தை ஏற்படுத்தி உள்ளது.

வேதாரண்யம்:

வேதாரண்யம் வட்டம் தோப்புத்துறையில் மனிதநேய ஜனநாயக கட்சியின் பொதுச் செயலாளர் தமீமுன் அன்சாரி பேட்டியளித்தார். அப்பொழுது நீட் தேர்வில் ஏற்பட்ட பிரச்சனையின் காரணமாக மனமுடைந்து தற்கொலை செய்து கொண்ட அனிதாவின் குடும்பத்திற்கு ரூ.25-லட்சமும், வீட்டில் ஒருவருக்கு அரசு வேலை வாய்ப்பும் வழங்க வேண்டும்.

மேலும் 50 எம்.பி.களை வைத்திருக்கும் தமிழக அரசு மத்திய அரசிற்கு நெருக்கடி கொடுத்திருக்க வேண்டும். இந்நிகழ்வுக்கு மத்திய அரசும் மாநில அரசுமே முழுப் பொறுப்பு. அனிதாவின் மரணமே முதலும் கடைசியாகவும் இருக்க வேண்டும் என்றுகூறினார்.

வேதாரண்யம்:

வேதாரண்யம் கொல்லித் தீவு பகுதியைச் சேர்ந்தவர் முருகேசன். இவரது மனைவி மாரியம்மாள் (வயது 28). இவர்களுக்கு 2 ஆண் குழந்தைகள் உள்ளனர். முருகேசன் வேதாரணயத்தில் உள்ள ஒரு கோழி கடையில் வேலை பார்த்து வருகிறார். அதே தெருவில் பக்கத்து வீட்டில் செல்வகுமார்(35) மனைவி சுதாவுடன் வசித்து வருகிறார்.

கடந்த 26-ந்தேதி காலை மாரியம்மாள் பொது குடிநீர் குழாயில் தண்ணீர் பிடிக்க வந்தபோது அங்கு வந்த சுதா, மாரியம்மாளிடம் உன் போட்டோ என் கணவர் சட்டைப்பையில் எப்படி வந்தது எனக் கேட்க, இதில் ஏற்பட்ட தகராறில் கடுமையான வார்த்தைகளால் திட்டிக் கொண்டார்களாம். இதில் மனமுடைந்த மாரியம்மாள் வீட்டிற்கு சென்று எலி மருந்தை சாப்பிட்டு விட்டார். அவரை மீட்டு வேதாரண்யம் அரசு மருத்துவமனையிலும், தீவிர சிகிச்சைக்காக திரூவாரூர் அரசு மருத்துவ கல்லூரி மருத்துவமனைக்கு அனுப்பி வைத்தனர். அங்கு அவரை பரிசோதித்த டாக்டர் அவர் ஏற்கனவே இறந்து விட்டதாக தெரிவித்தனர்.

இதுகுறித்த புகாரின் பேரில் வேதாரண்யம் இன்ஸ்பெக்டர் (பொறுப்பு) அறிவழகன், சப்-இன்ஸ்பெக்டர்கள் ஜெயேந்திரசரஸ்வதி, கார்த்திகேயன் ஆகியோர் வழக்குப்பதிவு செய்து விசாரணை மேற்கொண்டு வருகிறார்கள்.

மேலும் மாரியம்மாள் இறந்ததை அறிந்த செல்வகுமாரும் நேற்று வி‌ஷம் குடித்து விட்டார். செல்வகுமாரை மீட்டு வேதாரண்யம் அரசு மருத்துவமனையில் சேர்த்தனர். பின்பு தீவிர சிகிச்சைக்காக் திருவாரூர் அரசு மருத்துவக்கல்லூரி மருத்துவமனையில் சேர்த்தனர். இது குறித்தும் போலீசார் விசாரணை மேற்கொண்டு வருகின்றனர்.