நாகப்பட்டினம்

வேதாரண்யம்:

வேதாரண்யம் வடக்கு வீதியில் ஆட்டோ ஸ்டாண்ட் உள்ளது. 2 ஆண்டுகளுக்கு முன்பு அந்த ஆட்டோ நிறுத்தகத்தில் வேதை பன்னீர்(43) என்பவர் ஆட்டோ நிறுத்தி ஓட்டி வந்தார். அவரது நடவடிக்கை சரியில்லாததால் அங்கு ஆட்டோ நிறுத்தக்கூடாது என மற்ற ஆட்டோ ஓட்டுனர்கள் கூறியுள்ளனர். இதனால் அவர் வேறு இடத்திற்கு சென்றார்.

தற்போது மீண்டும் வேதை பன்னீர் வேதாரண்யம் வடக்கு வீதி, ஆட்டோ நிறுத்தகத்தில் தனது ஆட்டோவை கொண்டு வந்து நிறுத்தினார். இதனால் இவருக்கும், மற்ற ஆட்டோ ஓட்டுநர்களுக்கும் தகராறு ஏற்பட்டது. இதில் ஆத்திரமடைந்த பன்னீர் இதற்கு காரணம் குமரேசன் (52) என்பவர்தான் எனக் கூறி அங்கு நிறுத்தியிருந்த காமராஜ் என்பவருக்கு சொந்தமான ஆட்டோவையும், குமரேசனுக்கு சொந்தமான கார் கண்ணாடியையும் அடித்து சேதப்படுத்தியதோடு அங்குள்ள ஒருவர் மீது மண்ணெண்ணையை ஊற்றியதாக கூறப்படுகிறது.

இது குறித்து குமரேசன் வேதாரண்யம் போலீஸில் புகார் செய்தார். சப்-இன்ஸ்பெக்டர் தேவபாலன் வழக்குபதிவு செய்து, வேதை பன்னீரை கைது செய்து விசாரணை மேற்கொண்டுள்ளார்.

வேதாரண்யம்:

நாகை மாவட்டம் வேதாரண்யத்தை அடுத்த வாய்மேடு மேற்கு பவர் ஹவுஸ் அருகில் அடகு கடை நடத்தி வருபவர் ராதாகிருஷ்ணன் (வயது 62). இவர் நேற்று இரவு வழக்கம்போல் கடையை பூட்டிவிட்டு சென்றார். இதனை நோட்டமிட்ட கொள்ளையன் நள்ளிரவு கடையில் போடப்பட்டிருந்த 4 பூட்டுகளை உடைத்து உள்ளே சென்று உள்ளான்.

பின்னர் அங்கு நகை வைக்க லாக்கரை எடுத்துக்கொண்டு தப்பி சென்றுவிட்டான். இன்று காலை அக்கம் பக்கத்தில் உள்ள கடைகாரர்கள் அடகு கடையில் பூட்டுகள் உடைக்கப்பட்டிருப்பதை கண்டு கடை உரிமையாளர் ராதாகிருஷ்ணனுக்கு தகவல் தெரிவித்தனர்.

இதை தொடர்ந்து கடைக்கு வந்த ராதாகிருஷ்ணன் லாக்கரில் வைக்கப்பட்டிருந்த 25 பவுன் நகை கொள்ளையடிக்கப்பட்டிருப்பதை கண்டு அதிர்ச்சி அடைந்தார். இதன் மதிப்பு ரூ.5 லட்சம் ஆகும். இதுபற்றி அவர் வாய்மேடு போலீசில் புகார் செய்தார். அதன் பேரில் போலீசார் சம்பவ இடத்துக்கு விரைந்து வந்து கடையில் உள்ள காமிராவை பார்வையிட்டனர். அது செயல்படவில்லை. உடனே பக்கத்து கடையில் உள்ள காமிராவில் பார்த்தபோது இரவு 1 மணியளவில் மர்ம நபர் முகத்தை துணியால் மறைத்து கொண்டு வந்து அடகு கடையில் கொள்ளையில் ஈடுபட்டது பதிவாகி இருந்தது.

மேலும் சம்பவ இடத்துக்கு கைரேகை நிபுணர்கள் வரவழைக்கப்பட்டு கொள்ளையனின் கைரேகை பதிவு செய்யப்பட்டது. மோப்ப நாய் மூலம் துப்பு துலங்கவும் நடவடிக்கை மேற்கொண்டனர். இந்த கொள்ளை தொடர்பாக வாய்மேடு போலீசார் வழக்குப்பதிவு செய்து கொள்ளையனை தேடி வருகின்றனர். இந்த சம்பவம் வாய்மேடு பகுதியில் பரபரப்பை ஏற்படுத்தி உள்ளது.

வேதாரண்யம்:

வேதாரண்யம் அடுத்த கரியாப்பட்டினம் காவல் சரகம், நாகக்குடையான் பகுதியைச் சேர்ந்தவர் சுப்பிரமணியன் (45). இவரது மகள் சுசீலாவை அதே ஊரைச் சேர்ந்த முருகையன் மகன் கனகராசன் (23) என்பவரை காதலித்து திருமணம் செய்து கொண்டாராம்.

இந்நிலையில் சுசீலா 7 மாத கர்ப்பவதியாக இருப்பதால் வளைகாப்பு இட்டு, தகப்பனார் வீட்டிற்கு அழைத்து சென்றுள்ளனர். கடந்த 12-ந் தேதி நள்ளிரவு சுப்பிரமணியன் வீட்டிற்கு சென்று சுசீலாவை அனுப்பி வைக்கும்படி கனகராசன் கேட்டுள்ளார். அப்போது காலையில் அழைத்து செல்லுங்கள் என்று அவர் கூறியுள்ளார். இதில் ஆத்திரமடைந்த கனகராசன் மாமனார் சுப்பிரமணியனை தரக்குறைவாக பேசி வீடு புகுந்து வீட்டில் உள்ள பொருட்களை சேதப்படுத்தி, அவரையும் தாக்கியுள்ளார். இதில் காயமடைந்த சுப்பிர மணியன் வேதாரண்யம் அரசு மருத்துவ மனையில் சிகிச்சை பெற்று வருகிறார். புகாரின் பேரில் கரியாப்பட்டினம் போலீஸ் சப்-இன்ஸ்பெக்டர் பசுபதி வழக்குபதிவு செய்து கனகராசனை கைது செய்தார்.

வேதாரண்யம்:

வேதாரண்யம் அடுத்த தோப்புத்துறையைச் சேர்ந்தவர் அவுலியா முகமது (53). இவர் குடும்பத்துடன் தோப்புத்துறையில் வசித்து வருகிறார்.

இவர் வேளாங்கண்ணியில் செல்போன் கார்டு விற்கும் கடை வைத்துள்ளார். தினசரி தோப்புத்துறையிலிருந்து வேளாங்கண்ணி சென்று இரவு 10 மணிக்கு வீடு திரும்புவார் என கூறப்படுகிறது. கடந்த 4-ந் தேதி கடைக்கு சென்றவர் ஊர் திரும்பவில்லை.

அவரை பல இடங்களில் தேடி பார்த்தும் கிடைக்கவில்லை. கடையை திறந்து பார்க்கும் போது அங்கிருந்த கடிதத்தில் தனக்கு அதிக கடன்கள் இருப்பதாகவும், வட்டிக்கு பணம் வாங்கி பிறருக்கு கொடுத்த கடன் வராததாலும், தன் மகள் கல்யாணம் சமீபத்தில் நடைபெறவுள்ளதால் எப்படி நடத்துவது என்று தெரியாமல் செல்வதாக எழுதி இருந்ததாக கூறப்படுகிறது.

இது குறித்து அவரது மனைவி செய்துல்அரபா வேதாரண்யம் போலீசில் புகார் செய்துள்ளார். அதன் பேரில் சப்- இன்ஸ்பெக்டர் தேவபாலன் மற்றும் போலீசார் வழக்குபதிவு செய்து விசாரணை மேற்கொண்டுள்ளனர்.

சீர்காழி:

நாகை மாவட்டம் சீர்காழி ரெயில் நிலையத்தில் இருந்து மயிலாடுதுறை செல்லும் ரெயில் பாதையில் தண்டவாளத்தின் குறுக்கே லெவல் கிராசிங் அருகே 15 அடி நீள இரும்பு ராடு வைக்கப்பட்டு இருந்தது.

இந்த இரும்பு ராடு கட்டு கம்பியால் இரு புறமும் கட்டப்பட்டு இருந்தது. இதனால் இன்று காலை 4.30 மணிக்கு சீர்காழி வந்த உழவன் எக்ஸ்பிரஸ் ரெயில் சிக்னல் கிடைக்காமல் சீர்காழி ரெயில் நிலையத்தில் நிறுத்தப்பட்டது. பின்னர் ரெயில்வே ஊழியர்கள் சென்று பார்த்த போது தண்டவாளத்தில் இருந்த இரும்பு ராடை கண்டுபிடித்து அதனை அகற்றினர். அதன் பிறகு 20 நிமிடம் தாமதாக உழவன் எக்ஸ்பிரஸ் ரெயில் புறப்பட்டு சென்றது. மற்ற ரெயில்களும் தாமதமாக புறப்பட்டு சென்றது.

தண்டாவளத்தில் இரும்பு ராடை வைத்து ரெயிலை கவிழ்க்க சதி நடைபெற்று இருப்பது தெரியவந்தது. இந்த சதி செயலில் ஈடுபட்ட மர்ம ஆசாமிகள் யார்? என்பது குறித்து ரெயில்வே போலீசார் விசாரணை நடத்தி வருகிறார்கள்.

தரங்கம்பாடி:

நாகை மாவட்டம் பூம்புகார், தரங்கம்பாடி கடற்கரைக்கு ஏராளமான காதல் ஜோடிகள் வந்து செல்கின்றன. விடுமுறை நாட்கள் என்றால் காதல் ஜோடிகளின் எண்ணிக்கை அதிகமாக இருக்கும்.

நேற்று ஞாயிற்றுக் கிழமை விடுமுறை நாள் என்பதால் தரங்கம்பாடி கடற்கரைக்கு மயிலாடுதுறை பகுதியை சேர்ந்த 3 காதல் ஜோடிகள் வந்தனர். அவர்கள் மறைவான பாறை இடுக்குகளில் அமர்ந்து பேசிக் கொண்டிருந்தனர்.

அப்போது வாலிபர்கள் 5 பேர் அங்கு வந்தனர். அவர்கள் காதல் ஜோடிகளை மிரட்டினர். இதனால் 2 காதல் ஜோடி அங்கிருந்து தப்பி சென்று விட்டனர்.

ஒரு காதல் ஜோடியை மடக்கி பிடித்த அக்கும்பல் அவர்களிடம் இருந்த செல்போனை பறித்து படம் எடுத்தனர். இதனை பெற்றோரிடம் காண்பித்து விடுவோம் என மிரட்டினர். பின்னர் காதல் ஜோடியிடம் இருந்து பணம், நகையை பறித்தனர். மேலும் அப்பெண்ணை சில்மி‌ஷம் செய்ததாவும் கூறப்படுகிறது. இது குறித்து காதலன் தனிப்பிரிவு போலீஸ் சரவணபவனுக்கு தகவல் கொடுத்தார்.

இது தொடர்பாக பொறையாறு போலீசாருக்கு தெரிவிக்கப்பட்டது.

இன்ஸ்பெக்டர் முருகவேல் மற்றும் போலீசார் தரங்கம்பாடி கடற்கரைக்கு விரைந்து சென்றனர். அங்கு காதல் ஜோடியை மிரட்டிய பூம்புகார் அருகே உள்ள சந்திரபாடி மீனவ கிராமத்தை சேர்ந்த நாகராஜன் மகன் ரஞ்சித் (24), அதே பகுதியை சேர்ந்த சஞ்சய் (24), ஆக்கூர் முக்கூட்டு பரமேஸ்வரன் (26) ஆகிய 3 பேரை கைது செய்தனர்.

பெருமாள் பேட்டை, தரங்கம்பாடியை சேர்ந்த வாலிபர்கள் 2 பேர் தப்பி ஓடி விட்டனர். அவர்களை போலீசார் தேடி வருகிறார்கள்.

பூம்புகார், தரங்கம்பாடி கடற்கரைக்கு வரும் காதல் ஜோடிகளை மிரட்டி பணம், நகை பறிப்பது, சில பெண்களை சில்மி‌ஷம், செய்வது தொடர் கதையாக நடைபெற்று வருகிறது.

ஆனால் காதல் ஜோடிகள் இது வெளியே தெரிந்தால் அவமானம் என கருதி போலீசில் புகார் கொடுப்பதில்லை.இதனை பயன்படுத்தி வாலிபர்கள் அத்து மீறி நடந்து கொள்கிறார்கள். இதனை தடுக்க போலீசார் நடவடிக்கை எடுக்க வேண்டும் என கோரிக்கை விடுத்துள்ளனர்.