நாகப்பட்டினம்

சீர்காழி:

சீர்காழி நகர தி.மு.க. சார்பில் தி.மு.க. செயல்தலைவர் மு.க.ஸ்டாலின் பிறந்தநாள் விழா மற்றும் நலத்திட்ட உதவிகள் வழங்கும் பொதுக்கூட்டம் சீர்காழி பழையபேருந்து நிலையம் அருகே நடைபெற்றது.

கூட்டத்திற்கு நாகை வடக்கு மாவட்ட பொறுப்பாளர் நிவேதா.முருகன் தலைமை வகித்தார். ஒன்றிய செயலாளர்கள் சசிக்குமார், ரவிக்குமார், மலர்விழி, நகர துணை செயலாளர் பாஸ்கர், மாவட்ட பொருளாளர் ரவி, முன்னாள் ஒன்றியக்குழு தலைவர் எம்.என்.ஆர்.ரவி, மாவட்ட அமைப்பாளர்கள் முத்து குபேரன், கலைவாணன்,மாவட்ட துணை அமைப்பாளர்கள் பிரபாகரன், விஜயேஸ்வரன், முருகன், ராமச்சந்திரன் ஆகியோர் முன்னிலை வகித்தனர். நகர செயலாளர் சுப்பராயன் வரவேற்றார்.

மாநில தேர்தல் பணிக்குழு செயலாளர் குத்தாலம்.கல்யாணம், தலைமை செயற்குழு உறுப்பினர் வக்கீல் பன்னீர்செல்வம் ஆகியோர் பேசினர். கூட்டத்தில் முன்னாள் அமைச்சர் பொன்முடி கட்சியினர்களுக்கு நலத்திட்ட உதவிகளை வழங்கி பேசும்போது கூறியதாவது:-

வளர்கிற இளைஞர்களுக்கு திராவிட இயக்க உணர்வுகளை உருவாக்கவேண்டும் என்ற நோக்கத்திலே இளைஞர் எழுச்சிநாள் விழா கொண்டாடப்படுகிறது. இளைஞர்களுக்கு இளமையிலேயே அரசியல் உணர்வு வரவேண்டும். மாணவர்கள் அரசியலில் சுவற்றில் அடித்த பந்தாக இருக்கவேண்டும், சேற்றில் அடித்த பந்தாக இருக்ககூடாது என கருணாநிதி அப்போதே கூறியுள்ளார்.அவ்வாறு மாணவர்கள், இளைஞர்கள் அரசியலை தெரிந்து வைத்திருக்க வேண்டும்.

தற்போது சிலர் நான் தான் அடுத்த முதல்வர் என்ற கனவோடு அரசியலுக்கு வருகின்றனர். திராவிட இயக்கம் கொடுத்த உணர்வுகளின் அடிப்படையில்தான் பெண்கள் படித்தார்கள். பெண்களுக்கு சொத்துரிமை, சமஉரிமை,தேர்தலில் 33சதவீத இடஒதுக்கீடு கிடைத்திட காரணம் திராவிட இயக்கம் தான். தற்போது மருத்துவஇடங்களில் நீட் தேர்வு மூலம் தமிழ்நாட்டில் வட இந்தியர்களை திணிக்கும் நிலை ஏற்படுத்தப்பட்டு உள்ளது.

நீட் தேர்வுக்கு எதிராக குரல் கொடுத்துவரும் ஒரே இயக்கம் திமுகதான். நீட்தேர்வை, ஜல்லிகட்டு ஆகிய பிரச்சனைக்கு உணர்வுடன் போராடிய மாணவர்கள் காவிரி நதிநீர் பிரச்சனைக்கும் போராடவேண்டும்.

தமிழ்நாட்டில் நாடக ஆட்சிதான் நடக்கிறது. சட்டமன்றத்தில் காவிரிமேலாண்மை வாரியம் அமைக்க நிறைவேற்றிய தீர்மானத்தை குடியரசு தலைவர் ஒப்புதலுக்கு அனுப்பிவைத்து கையெழுத்து பெற்றால் தான் மத்தியஅரசிற்கு அழுத்தம் தரமுடியும். மேலாண்மை வாரியம் அமைக்க உச்சநீதிமன்றம் விதித்த 6 வார காலகெடு முடிவடைந்த பிறகு தற்போது மத்திய அரசு ஸ்கீம் என்ற வார்த்தைக்கு விளக்கம் கேட்டு நீதிமன்றத்தை மிக தாமதமாக நாடுவது மக்களை ஏமாற்றும் செயல்.

பா.ஜ.க. என்றைக்கும் தமிழகத்தில் நுழைய முடியாது. அரசியலமைப்பு சட்டப்படி ஆளுனருக்கு எந்த அதிகாரமும் கிடையாது ஆனால் தமிழகத்தில் ஆளுனர் மாவட்டங்களை ஆய்வு செய்கிறார். தமிழகத்தில் கூட்டுறவு சங்க தேர்தல்கள் நியாயமாக நடக்கவில்லை என்று பேசினார்.

முடிவில் நகர இளை ஞரணி அமைப்பாளர் ராஜசேகரன் நன்றி கூறினார்.

வேதாரண்யம்:

வேதாரண்யம் தாலுக்கா அண்டர்காடு பகுதியை சேர்ந்தவர் ராஜகிளி. விவசாயி. இவரது மனைவி அன்புச்செல்வி இவர்களது மகள் பிரதிபா (வயது 21) ஆசிரியர் பட்டயப்படிப்பு இரண்டாம் ஆண்டு படித்து வருகிறார். பிரதிபாவிற்கும், திருத்துறைப்பூண்டி அடுத்த ஒருவருக்கும் கடந்த 3 நாட்களுக்கு முன்பு நிச்சயதார்த்தம் நடந்தது.

இந்நிலையில் வாய் மேட்டைச் சேர்ந்த முருகையன் மகன் கார்த்தி என்பவர் பிரதிபாவை கடத்தி சென்று விட்டதாக அன்புச்செல்வி வேதாரண்யம் போலீசில் புகார் தெரிவித்துள்ளார். போலீசார் வழக்கு பதிவு செய்து கடத்தப்பட்ட பிரதீபாவை தேடிவருகின்றனர். பிரதீபாவும் கார்த்தியும் கடந்த ஓராண்டாக காதலித்து வருவதாக கூறப்படுகிறது.

மயிலாடுதுறை:

மீத்தேன் திட்ட எதிர்ப்பு கூட்டமைப்பின் தலைமை ஒருங்கிணைப்பாளர் பேராசிரியர் ஜெயராமன் மயிலாடுதுறையில் நிருபர்களுக்கு பேட்டியளித்தார். அப்போது அவர் கூறியதாவது:-

காவிரி நீர் பிரச்சினையில் சுப்ரீம் கோர்ட்டு தனது தீர்ப்பில் 6 வார காலத்திற்குள் காவிரி மேலாண்மை வாரியம் அமைக்க வேண்டும் என்று கூறியது. இந்த காலக்கெடு முடிவடைந்து விட்டது. 17 நாட்களாக தமிழக எம்.பி.க்.கள் பாராளுமன்றத்தை முடக்கியுள்ளனர்.

இது வரை மேலாண்மை வாரியத்தை பற்றி வாய்திறக்காத மத்திய அரசு தற்போது தீர்ப்பில் என்ன கூறப்பட்டுள்ளது என்று எதுவும் தெரியாதது போல் கேட்கிறது.

இந்த விவகாரத்தில் காவிரி நீர் தமிழகத்திற்கு கிடைக்காமல் இருக்க சட்டத்தில் என்ன ஓட்டை உள்ளது என்று மத்திய அரசு தேடுகிறது. நதிநீர் இணைப்பு திட்டத்திற்கு ஆதரவு திரட்டிய ஜக்கி வாசுதேவ், விவசாயிகள் தண்ணீரை விலை கொடுத்து வாங்க வேண்டும் என்று நியூயார்க்கில் பேசியது கண்டிக்கத்தக்கது. நதிகள் இணைப்பு என்பது ஆறுகளை பறித்து பன்னாட்டு நிறுவனங்களுக்கு கொடுக்கும் திட்டமாகும்.

பன்னாட்டு நிறுவனங்கள் ஆறுகளில் குழாய்கள் அமைத்து ஆற்று நீரை விற்கும் நிலை ஏற்படும். அதை காசு கொடுத்து வாங்க வேண்டிய நிலைக்கு பொதுமக்கள் தள்ளப்படுவார்கள்.

தமிழகத்தில் காவிரி பிர்ச்சினைக்கு தீர்வுகாண வேண்டும் என்று நெய்வேலி, கூடங்குளம் மின்சாரத்தை தமிழகத்தில் இருந்து வெளி மாநிலங்களுக்கு வழங்கக் கூடாது. எண்ணெய் கிணறுகள் அமைப்பதை தடுத்து நிறுத்த மக்கள் ஒன்றிணைந்து போராட வேண்டும்.

தமிழக மக்கள் நலனை பற்றி மத்திய அரசு ஒரு போதும் கவலைப்படாது. தமிழகத்தில் அனைத்து கட்சி தலைவர்களும் ஒன்றிணைந்து தமிழகத்தின் இயற்கை வளங்கள் வெளிமாநிலங்களுக்கு கொண்டு செல்வதை தடுத்து நிறுத்த வேண்டும்.

இவ்வாறு அவர் கூறினார். #tamilnews