நாகப்பட்டினம்

சீர்காழி:

சீர்காழி அடுத்த தைக்கால் கிராமத்தில் நடைப்பெற்ற நிகழ்ச்சி ஒன்றில் பங்கேற்க வந்த மூவேந்தர் முன்னேற்ற கழக தலைவர் ஸ்ரீதர்வாண்டையார் நிருபர்களிடம் கூறியதாவது:-

தினந்தோறும் தமிழ்நாட்டில் உள்ள ஆறுகளிலிருந்து 1லட்சம் லாரிகளில் மணல் அள்ளப்படுகிறது. ஆறுகளில் மார்ச் மற்றும் ஏப்ரல் மாதங்களில் மட்டுமே மணல் அள்ளவேண்டும். மீதமுள்ள மாதங்களில் மணல் அள்ளுவதை தடை செய்யவேண்டும். கர்நாடக மாநிலத்திலிருந்து நமக்கு வரவேண்டிய தண்ணீர் பிரச்சினை போல் நமக்கு அடுத்த பிரச்சினையாக இருப்பது மணல் கொள்ளை. நமக்கு தரவேண்டிய தண்ணீரை கர்நாடக அரசு தரவேண்டும். மே மாதத்திற்கு 40டிஎம்சி தண்ணீரையும், ஜூன் மாதத்திற்கு 45டிஎம்சி தண்ணீரையும் வழங்கவேண்டும். இதற்கு மணல்குவாரி தடையாக இருந்து வருகிறது.

காவிரி மேலாண்மை வாரியத்தை உடனடியாக அமைக்கவேண்டும். கொள்ளிடம் ஆற்றில் தடுப்பணைகட்டவேண்டும். வருடந்தோறும் 2 அல்லது 3லட்சம் கனஅடி தண்ணீர் வீணாக கடலில் சென்று கலக்கிறது. தமிழ்நாட்டில் உள்ள அனைத்து ஆறுகளையும் முக்கொம்பு என்ற இடத்தில் இணைப்பதன் மூலம் தேவைக்கு அதிகமாகவே தண்ணீர் கிடைக்கும். தண்ணீர் பஞ்சம் வராது.

காவிரி மேலாண்மை வாரியம் அமைக்க குரல் வலுப்பெற்று வரும் நிலையில், நிர்மலாதேவி பிரச்னையை வைத்து காவிரி பிரச்சினையை மூடி மறைக்கும் முயற்சி நடைபெறுகிறது. பா.ஜ.க.வின் எச்.ராஜா மற்றும் எஸ்.வி.சேகர் ஆகியோரை ஒதுக்கி வைத்துவிட்டு காவிரி நீர் பெறுவதில் கவனம் செலுத்தவேண்டும்.

இவ்வாறு அவர் கூறினார்.

குத்தாலம்:

நாகை மாவட்டம் குத்தாலம் அருகே எலந்தங்குடி பகுதியை சேர்ந்தவர் வின்சென்ட்(45). விவசாயி. இவர் கடந்த 4 ஆண்டுகளுக்கு முன்பு தனது தம்பி ஆரோக்கியதாசின் திருமணத்திற்காக தனக்கு சொந்தமான நிலத்தை வங்கி ஒன்றில் அடகு வைத்து பணம் கொடுத்துள்ளார்.

இந்த நிலையில் வின்சென்ட் தனது நிலத்தை மீட்டுக் கொடுக்குமாறு பலமுறை கேட்டும் ஆரோக்கியதாஸ் மீட்டு கொடுக்கவில்லை என்று கூறப்படுகிறது. இதுகுறித்து பெரம்பூர் போலீசில் வின்சென்ட் புகார் செய்தார். ஆனால் இதுதொடர்பாக போலீசார் நடவடிக்கை எடுக்கவில்லையாம். இதனால் ஆத்திரமடைந்த வின்சென்ட் இன்று காலை எலந்தங்குடியில் உள்ள செல்போன் டவரில் ஏறி தற்கொலை மிரட்டல் விடுத்தார்.

இதுபற்றி அறிந்த மயிலாடுதுறை டி.எஸ்.பி. வெங்கடேசன், பெரம்பூர் போலீசார், தீயணைப்பு மற்றும் மீட்பு படையினர் சம்பவ இடம் சென்று வின்சென்டிடம் பேச்சுவார்த்தை நடத்தி அவரை மீட்டனர். பின்னர் அவரை போலீஸ் நிலையத்திற்கு அழைத்து சென்று விசாரணை மேற்கொண்டனர். இச்சம்பவம் அப்பகுதியில் பரபரப்பை ஏற்படுத்தியது.

கீழ்வேளூர்:

நாகை சொக்க நாதர் கோவில் தெருவில் நெடுஞ்சாலைத்துறை அலுவலகம் செயல்பட்டு வருகிறது. இப்பகுதியில் வசிக்கும் மக்கள் ரோட்டு ஓரத்தில் ஒரு விநாயகர் கோவில் கட்டி வழிப்பட்டு வருகின்றனர். இக்கோவில் போக்குவரத்துக்கு இடையூறாக இருப்பதாக கூறி நெடுஞ்சாலைத்துறையினர் அதனை அப்புறப்படுத்த நடவடிக்கை எடுத்தனர். இதற்கு பொதுமக்கள் எதிர்ப்பு தெரிவித்ததால் அந்த நடவடிக்கை கைவிடப்பட்டது.

இந்தநிலையில் ரோட்டு ஓரம் உள்ள விநாயகர் கோவிலில் காம்பவுண்டு சுவர் அமைத்துள்ளனர். இதுபற்றி புகார் எழுந்ததால் நாகை தாசில்தார் ராகவன் மற்றும் நெடுஞ்சாலைத்துறை அதிகாரிகள் இன்று காலை சம்பவ இடம் சென்று விநாயகர் கோவில் காம்பவுண்டு சுவரை இடித்து அகற்றினர். இதனால் அங்கு பரபரப்பு ஏற்பட்டது.

கோவில் காம்பவுண்டு சுவர் இடிக்கப்பட்டதற்கு கண்டனம் தெரிவித்து பா.ஜனதா மாவட்ட தலைவர் நேதாஜி தலைமையில் ஏராளமானோர் நாகை - நாகூர் சாலையில் அமர்ந்து சாலை மறியல் போராட்டம் நடத்தினர். இதுபற்றிய தகவல் கிடைத்ததும் நாகை வெளிப்பாளையம் போலீசார் சம்பவம் இடம் சென்று பேச்சுவார்த்தை நடத்தி போராட்டக்காரர்களை கலைந்து செல்ல வைத்தனர்.

சீர்காழி:

சிதம்பரத்தில் இருந்து இன்று காலை சீர்காழி நோக்கி தனியார் பஸ் ஒன்று வழக்கம்போல் வந்து கொண்டிருந்தது. பஸ்சில் ஏராளமான பயணிகள் இருந்தனர். பஸ்சை சிதம்பரம் மணக்குடி பகுதியை சேர்ந்த டிரைவர் ஜெகன்(26) என்பவர் ஓட்டி வந்தார்.

இன்று காலை 9 மணியளவில் தனியார் பஸ் சீர்காழி அருகே தைக்கால் என்ற இடத்தில் வந்து கொண்டிருந்தது. அப்போது சீர்காழியில் இருந்து சிதம்பரம் நோக்கி வந்த லாரியும், தனியார் பஸ்சும் எதிர்பாராமல் நேருக்குநேர் மோதி விபத்துக்குள்ளானது. இதனால் பஸ்சில் இருந்த பயணிகள் பயத்தால் அலறி துடித்தனர். இந்த விபத்தில் லாரி மேலும் கட்டுப்பாட்டை இழந்து சாலையோரம் இருந்த வீட்டின் மீதும் மோதி நின்றது.

பயங்கர சத்தத்துடன் பஸ்-லாரி மோதிக் கொண்டதை கண்ட பொதுமக்கள் அதிர்ச்சியடைந்தனர். பின்னர் அவர்கள் ஓடிவந்து விபத்தில் காயமடைந்தவர்களை மீட்கும் பணியில் ஈடுபட்டனர். உடனடியாக 108 ஆம்புலன்சுக்கும் தகவல் தெரிவித்தனர்.

விபத்து பற்றி தகவலறிந்து கொள்ளிடம் போலீசாரும் சம்பவ இடத்துக்கு விரைந்து வந்து காயமடைந்தவர்களை மீட்டனர்.

இந்த விபத்தில் பஸ்சில் பயணித்த சிதம்பரத்தை சேர்ந்த சாதிக்பாட்சா(வயது40), அதே பகுதி கருணாகரன்(45), அட்சயவர்த்தினி, பஸ் டிரைவர் ஜெகன்(26), வல்லம்படுகையை சேர்ந்த கவிதா(35), சீர்காழி தென்பாதி ஜீவிதா மற்றும் கண்டக்டர் உள்பட 22 பேர் காயமடைந்தனர்.

இவர்களில் 18 பேரை 108 ஆம்புலன்ஸ் மூலம் சீர்காழி அரசு மருத்துவமனைக்கு அனுப்பி வைக்கப்பட்டனர். மேலும் படுகாயமடைந்த 4 பேர் சிதம்பரம் அரசு மருத்துவமனைக்கு கொண்டு செல்லப்பட்டனர். விபத்து குறித்து கொள்ளிடம் போலீசார் வழக்குப்பதிவு செய்து விசாரணை நடத்தி வருகின்றனர்.

சீர்காழி-சிதம்பரம் தேசிய நெடுஞ்சாலையில் நடந்த இந்த விபத்தால் சுமார் அரைமணி நேரத்துக்கும் மேலாக போக்குவரத்து பாதிக்கப்பட்டது. பின்னர் போலீசார் போக்குவரத்தை ஒழுங்குபடுத்தினர். இந்த சம்பவத்தால் அப்பகுதியில் பரபரப்பு ஏற்பட்டது.

வேதாரண்யம்:

கோடைக்காலம் துவங்கி கடும் வெயில் மக்களை வாட்டி வதைக்கிறது. காலையிலேயே வெயிலின் உக்கிரத்தால் மக்கள் வெளியில் செல்லவே அச்சப்படுகின்றனர். வெளியில் செல்லாமல் வீட்டிலேயே முடங்கி இருக்கும் மக்கள் வெயிலின் தாக்கத்தால் மிகுந்த அவதிப்படுகின்றனர்.

இந்நிலையில் வேதாரண்யத்தில் கடந்த பல நாட்களாக அறிவிக்கப்படாத மின்வெட்டாக பலமணி நேரம் மின்சாரம் அவ்வப் போது தடைபடுகிறது. இதனால் நோயாளிகள், வயதானோர்அவதிக்கு ஆளாகி வருகின்றனர்.

இந்த அறிவிக்கப்படாத மின்வெட்டால் தேர்விற்கு படிக்கும் மாணவர்களும் மிகுந்த சிரமப்படுகின்றனர். குறிப்பாக கிராமப்புறங்களில் இரவு நேரங்களில் பலமணி நேரம் மின்தடை நிலவுகிறது. இதனால் தேர்விற்கு படிக்கும் மாணவர்கள் பாதிக்கப்படுகின்றனர். 

மின்தடை குறித்து மின்வாரிய அதிகாரிகளை தொடர்பு கொண்டால் அங்குள்ள தொலைபேசி இயங்குவதில்லை. மீண்டும் மின்சாரம் வந்தபிறகுதான் தொடர்பு கொள்ள முடிகிறது. அடிக்கடி மின்தடை ஏற்படுவது குறித்து சரியான காரணமும் அறிவிப்பதில்லை.

எனவே வேதாரண்யம் பகுதியில் மின்சாரம் தடையின்றி கிடைக்க மின்வாரியத்துறை அதிகாரிகள் நடவடிக்கை எடுக்க வேண்டும். மின்வெட்டு குறித்து முன்கூட்டியே தெரிவிக்க வேண்டும் என பொதுமக்கள் கோரிக்கை விடுத்துள்ளனர்.