மதுரை
லட்சுமிபுரம் 7-வது தெருவை சேர்ந்தவர் வெங்கடேசன்(வயது49). இவர் நகைக்கடை பஜாரில் கடை வைத்துள்ளார். சம்பவத்தன்று காலை இந்த கடைக்கு 35 வயது மதிக்கத்தக்க 2 பெண்கள் வந்தனர்.
அவர்கள் இந்த கடையின் வாடிக்கையாளர்கள் என்று கூறி நகை வாங்க வந்துள்ளதாக தெரிவித்தனர். பல்வேறு டிசைன்களை காண்பிக்க சொல்லியுள்ளனர். பின்னர் டிசைன் பிடிக்கவில்லை என்று கூறிவிட்டு திரும்பிச் சென்றனர்.
இதையடுத்து ஊழியர்கள் கடையில் வைத்திருந்த நகைகளை சரிபார்த்தனர். அப்போது 3¾ பவுன் செயின் திருடுபோனது தெரியவந்தது. இதுகுறித்து தெற்கு வாசல் போலீசில் புகார் செய்யப்பட்டது.
போலீசார் வழக்குப்பதிவு செய்து நகை கடையில் கைவரிசை காட்டிய 2 பெண்களையும் தேடி வருகின்றனர். மேலும் நகை கடையில் உள்ள கண்காணிப்பு காமிரா பதிவுகளையும் போலீசார் ஆய்வு செய்து வருகின்றனர்.
