காஞ்சிபுரம்

காஞ்சீபுரம்:

வேலூரை சேர்ந்தவர் சதீஷ்குமார் (24). இவருக்கும் காஞ்சீபுரத்தை அடுத்த ஏனாத்தூரை சேர்ந்த 16 வயது மாணவிக்கும் திருமணம் நிச்சயிக்கப்பட்டிருந்தது.

இந்த மாணவி காஞ்சீபுரத்தில் பிளஸ்-1 படித்து வருகிறார். இவர்களது திருமணம் காஞ்சீபுரம் ஜிலம்பி பகுதியில் உள்ள ஒரு மண்டபத்தில் இன்று நடைபெற இருந்தது.

மைனர் பெண்ணுக்கு திருமணம் நடைபெறுவதை அறிந்த ‘சைல்டு லைன்’ அமைப்பினர் காஞ்சீபுரம் மாவட்ட சமூக நலத்துறை அதிகாரி சங்கீதாவிடம் இதுகுறித்து புகார் செய்தனர்.

அதைத் தொடர்ந்து இன்று காலை பாலசெட்டி சத்திரம் போலீசார் உதவியுடன் திருமண மண்டபத்துக்கு அதிகாரி சங்கீதா வந்தார். அப்போது திருமண ஏற்பாடுகள் தீவிரமாக நடந்து கொண்டிருந்தன.

அப்போது இரு வீட்டாரையும் அழைத்து அதிகாரி சங்கீதா பேசினார். ‘மைனர்’ பெண்ணுக்கு திருமணம் செய்வது சட்டவிரோதம் என எடுத்துக் கூறினார். அதை ஏற்றுக்கொண்ட இரு வீட்டினரும் இன்று நடைபெற இருந்த திருமணத்தை நிறுத்தினர். இதுகுறித்து பாலசெட்டி சத்திரம் போலீசார் வழக்கு பதிவு செய்துள்ளனர்.

காஞ்சீபுரம்:

ஜனாதிபதி பிரணாப் முகர்ஜியின் பதவி காலம் ஜூலை 24-ந்தேதி முடிவடைகிறது. புதிய ஜனாதிபதியை தேர்ந்தெடுப்பதற்கான தேர்தல் அடுத்த மாதம் 17-ந் தேதி நடைபெற உள்ளது. 20-ந் தேதி முடிவு அறிவிக்கப்பட உள்ளது.

இந்நிலையில், ஜனாதிபதி பிரணாப் முகர்ஜி கடந்த மே மாதம் 24-ந்தேதி காஞ்சீபுரம் வருவதாக இருந் தது. அதையொட்டி பாதுகாப்பு ஏற்பாடுகளை மாவட்ட நிர்வாகம் செய்திருந்தது. திடீரென இந்த சுற்றுப் பயணம் நிர்வாக காரணங்களால் ரத்து ஆனது.

இந்த நிலையில் ஜனாதிபதி பிரணாப் முகர்ஜி வருகிற 13-ந்தேதி (நாளை மறுநாள்) காஞ்சீபுரம் வருகிறார். டெல்லியிலிருந்து ராணுவ ஹெலிகாப்டர் மூலம் வேலூர் மாவட்டம் அரக்கோணம், ராஜாளி விமானபடை தளத்தில் வந்து இறங்குகிறார். அங்குள்ள ராணுவ ஹெலிபேடில் இறங்கி 30 கிலோ மீட்டர் ரோடு வழியாக குண்டு துளைக்காத கார் மூலம் காஞ்சீபுரத்திற்கு பிற்பகல் வருகிறார்.

நேராக காஞ்சீபுரம் சங்கர மடம் செல்கிறார். அங்கு காஞ்சி சங்கராச்சாரியார்கள் ஜெயேந்திர சரஸ்வதி சுவாமிகள், விஜயேந்திர சரஸ்வதி சுவாமிகளை சந்தித்து ஆசி பெறுகிறார். பிறகு சங்கரமடத்தில் முக்தியடைந்த காஞ்சி மகா பெரியவர் ஸ்ரீ சந்திரசேக ரேந்திர சரஸ்வதி பிருந்தாவனத்திற்கு சென்று பாத பூஜை செய்கிறார்.

காமாட்சியம்மன் கோயிலுக்கு குண்டு துளைக்காத காரில் செல்கிறார். அங்கு கோயில் கருவறையில் உள்ள காமாட்சியம்மனை பயபக்தியுடன் தரிசனம் செய்கிறார்.

கோவில் சார்பில் ஜனாதிபதிக்கு சிறப்பான வரவேற்பு அளிக்கப்படுகிறது. பின்னர் காஞ்சி வரதராஜபெருமாள் கோயில், ஏகாம்பரநாதர் கோவில், ராமானுஜர் சன்னதி ஆகிய கோவில் களுக்கும் சென்று தரிசனம் செய்கிறார்.

ஜனாதிபதி வருகையயொட்டி கலெக்டர் பா. பொன்னையா, மாவட்ட வருவாய்துறை அதிகாரி சவுரிராஜன், மாவட்ட போலீஸ் சூப்பிரண்டு சந்தோஷ் ஹதிமானி, காஞ்சீ புரம் உதவி போலீஸ் சூப்பி ரண்டு டாக்டர் என்.ஸ்ரீநாத் ஆகியோர் பாதுகாப்பு ஏற்பாடுகளை தீவிரமாக செய்து வருகின்றனர்.

ஆலந்தூர்:

தி.மு.க செயல் தலைவர் மு.க.ஸ்டாலின் புதுக்கோட்டைக்கு செல்லும் வழியில் சென்னை விமான நிலையத்தில் நிருபர்களிடம் கூறியதாவது:-

முதல்- அமைச்சர் எடப்பாடி பழனிச்சாமி குடிமராமத்து பணிக்காக மேலும் நிதி ஒதுக்கப்படும் என்று கூறி இருக்கிறார். ஏற்கனவே ஒதுக்கப்பட்ட நிதி, குடிமராமத்து பணிக்காக செலவு செய்யப்பட்டு இருந்ததால் அது பயன் உள்ளதாக அமையும் ஆனால் இது வரையில் அப்படி செலவு செய்யப்பட்டதாக தெரியவில்லை.

இந்த ஆட்சியை காப்பாற்ற எம்.எல்.ஏ.க்களுக்கு கமி‌ஷன் தரப்படுவதற்கு இந்ததொகை ஒதுக்கப்பட்டு உள்ளதாக மக்களிடம் கேள்வி எழுந்து உள்ளது.

நான் அ.தி.மு.க ஆட்சியை கவிழ்க்க பல்வேறு முயற்சிகள் எடுப்பதாக கூறுகிறார்கள். ஒரு துளி அளவு கூட அப்படிப்பட்ட செயலில் நான் ஈடுபடவில்லை.

தற்போது ஆட்சியை அவர்களே கவிழ்த்து கொள்கிற சூழ்நிலை இருக்கிறது.

எய்ம்ஸ் மருத்துவமனை எங்கு அமைய வேண்டும் என்ற போட்டி மட்டும் அல்ல, அவர்களுக்கு உள்ளே பல போட்டா போட்டி நிலவுகிறது.

தினகரன் அணி, பழனிசாமி அணி, ஓ. பன்னீர் செல்வம் அணி, தீபா அணி என்று பல அணிகளாக பிரிந்து இருக்கிறார்கள்.

பா.ஜனதா தேசிய தலைவர் அமித்ஷா, காந்தி பற்றி கூறிய கருத்தை தி.மு.க வன்மையாக கண்டிக்கிறது. தமிழகத்தில் பாலில் கலப்படம் என்று முதலில் கூறினார்கள். அதன் மீது உரிய நடவடிககை எடுக்கப்பட்டதா? இதில் ஈடுபட்டவர்கள் தண்டிக்கப்பட்டு இருக்கிறார்களா?.

இது ஒரு புறம் இருக்க இப்போது அரிசி, முட்டை, சர்க்கரை போன்றவற்றில் பிளாஸ்டிக் கலப்படம் இருப்பதாக செய்திகள் வருகிறது. இதனை ஆட்சியில் இருப்பவர்கள் தடுத்து நிறுத்தி நடவடிக்கை எடுக்க வேண்டும்.

இவ்வாறு அவர் கூறினார்.

ஆலந்தூர்:

சென்னையில் இருந்து அபிதாபிக்கு செல்லும் விமானம் இன்று அதிகாலை புறப்பட தயாராக இருந்தது. அந்த விமானத்தில் போதைப் பொருள் கடத்தப்படுவதாக சுங்கத்துறை அதிகாரிகளுக்கு தகவல் கிடைத்தது.

இதையடுத்து விமானத்தில் பயணம் செய்ய வந்த பயணிகளின் உடமைகளை அதிகாரிகள் சோதனை செய்தனர்.

தென் ஆப்பிரிக்காவை சேர்ந்த ஜோகன் என்பவர் வைத்திருந்த சூட்கேசை சோதனை செய்த போது மாத்திரை மற்றும் பால் பவுடர் போன்று இருந்தது. சந்தேகம் அடைந்த அதிகாரிகள் அதனை ஆய்வு செய்த போது அவை ஹெராயின் போதைப்பொருள் என்பது தெரிந்தது.

இதைத் தொடர்ந்து போதைப் பொருளுடன் ஜோகனை கைது செய்தனர். மொத்தம் 2 கிலோ ஹெராயின் இருந்தது. இதன் சர்வதேச மதிப்பு ரூ. 20 கோடி ஆகும், கைப்பற்றப்பட்ட போதைப் பொருளை அதிகாரிகள் ஆய்வுக்கு அனுப்பி உள்ளனர்.

கைதான ஜோகன் சர்வதேச போதைப்பொருள் கடத்தல் கும்பலை சேர்ந்தவன் ஆவான். அவன் ஏற்கனவே இதேபோல் போதைப்பொருள் கடத்தியதாக 2 முறை கைது செய்யப்பட்டவன் என்பது குறிப்பிடத்தக்கது.

திருவான்மியூர்:

நீலாங்கரை அடுத்த கானாத்தூர் போலீஸ் நிலையம் எதிரே உள்ள பக்கிங்காம் கால்வாயில் இன்று காலை வாலிபர் பிணமாக மிதந்தார். அவரது உடலில் காயங்கள் இருந்தன.

வாலிபர் உடலை போலீசார் கைப்பற்றி விசாரணை நடத்தினர். இதில் அவர் ஆந்திராவை சேர்ந்த நீலாம்பவசிங் என்பதும் அவரை மர்ம நபர்கள் அடித்து கொலை செய்து கால்வாயில் வீசி சென்றதும் தெரியவந்தது.

அவர் அப்பகுதியில் கட்டிட கட்டுமான பணியில் ஈடுபட்டு வந்துள்ளார். அப்போது ஏற்பட்ட தகராறில் கொலை செய்து விட்டு உடலை கால்வாயில் வீசி சென்று இருப்பார்கள் என்று போலீசார் கருதுகிறார்கள்.

இது குறித்து போலீசார் வழக்குபதிவு செய்து விசாரிக்கிறார்கள்.