காஞ்சிபுரம்

ஆலந்தூர்:

சென்னை கமி‌ஷனர் அலுவலகத்தில் மத்திய குற்றப்பிரிவில் தலைமை காவலராக பணியாற்றி வருபவர் சங்கீதா (வயது 40).

இவர் ஆலந்தூரில் உள்ள காவலர் குடியிருப்பில் வசித்து வந்தார். இவரது மகன் அதே பகுதியில் உள்ள தனியார் பள்ளியில் 7-ம் வகுப்பு படித்து வருகிறான். சங்கீதாவின் கணவர் கடந்த சில ஆண்டுகளுக்கு முன்பு குடும்ப தகராறில் பிரிந்து சென்று விட்டார்.

சில மாதங்களுக்கு முன்பு சங்கீதாவுக்கு திடீரென உடல்நிலை பாதிக்கப்பட்டது. தனியார்ஆஸ்பத்திரியில் பரிசோதனை செய்த போது அவருக்கு ரத்த புற்று நோய்இருப்பது கண்டு பிடிக்கப்பட்டது.

இந்தநிலையில் உரிய சிகிச்சை பெற பணம் இல்லாமல் சங்கீதா கஷ்டப்பட்டார். சேர்த்து வைத்திருந்த பணம்-நகை முழுவதையும் சிகிச்சைக்காகவே செலவு செய்தார்.

பணம் காலியானதால் அவரால் புற்றுநோய்க்கு தொடர்ந்து சிகிச்சை பெற முடியவில்லை. இதனால் நோயின் தீவிரம் அதிகமானது. கவனிக்க உறவினர்கள் அருகில் இல்லாததாலும் அவரது நிலைமை மேலும் மோசம் அடைந்தது.

இதையடுத்து சங்கீதாவை சென்னை அரசு ஆஸ்பத்திரியில் சேர்த்தனர். அவருக்கு அங்கு தீவிர சிகிச்சை அளிக்கப்பட்டு வருகிறது.

உயிருக்கு போராடும் சங்கீதாவை அவரது தம்பி ஒருவர் கவனிப்பதாக தெரிகிறது. அவரும் போதிய பணம் இல்லாமல் கஷ்டப்பட்டு வருகிறார்.

சங்கீதாவுக்கு தேவையான பண உதவி மற்றும் புற்றுநோய்க்கான சரியான சிகிச்சை கிடைத்தால் மட்டுமே அவர் பழைய நிலைக்கு வர முடியும்.

காஞ்சீபுரம்:

காஞ்சீபுரம் மாவட்ட கலெக்டர் பொன்னையா வெளியிட்டுள்ள அறிக்கையில் கூறியுள்ளதாவது:-

மாநில அளவில் 17 நலவாரியங்களில் சுமார் 50 லட்சம் பேர் உறுப்பினர்களாக பதிவு செய்துள்ளனர்.

அரசின் நலத்திட்ட உதவிகள் அனைவருக்கும் சென்று சேரவேண்டும் என்ற நோக்கத்தின் அடிப்படையில் இனிவரும் காலங்களில் உறுப்பினர்கள் அனைவரும் அரசு நலத்திட்ட உதவிகள் பெறுவதற்கு தங்களது உறுப்பினர் அடையாள அட்டையுடன் ஆதார் அட்டை எண்ணையும் அவசியம் பதிவு செய்ய வேண்டும்.

எனவே காஞ்சீபுரம் மாவட்டத்தை சேர்ந்த அமைப்பு சாரா மற்றும் கட்டுமான நல வாரியங்களில் பதிவு செய்துள்ள உறுப்பினர்கள் தங்களது பதிவு அடையாள அட்டை நகலுடன் ஆதார் அடையாள அட்டை நகலையும் வரும் ஜூலை 31-ந்தேதிக்குள் காஞ்சீபுரம் ரங்கசாமிகுளம் அருகில் உள்ள தொழிலாளர் நல வாரிய அலுவலகத்தில் சமர்ப்பிக்க வேண்டும்.

மேலும் இதுகுறித்து 044-27230279 என்ற தொலைபேசி எண்ணில் தொடர்பு கொண்டு விவரங்களை அறிந்து கொள்ளலாம்.

இவ்வாறு அதில் கூறப்பட்டு உள்ளது.

தாம்பரம்:

குரோம்பேட்டையில் கண்ணாடியை உடைத்து காருக்குள் வைத்திருந்த ரூ.3 லட்சம் ரொக்கம் மற்றும் லேப்-டாப் கொள்ளையடிக்கப்பட்டது.

கொல்கத்தாவை சேர்ந்தவர் சுந்தர் மான்டெல் (48). டாக்டராக இருக்கிறார்.இவர் தனது மகளை சென்னையில் உள்ள ஒரு மருத்துவ கல்லூரியில் சேர்க்க வந்திருந்தார்.

மகளை கல்லூரி விடுதியில் சேர்த்து விட்டு நேற்றுஇரவு கொல்கத்தாவுக்கு விமானம் மூலம் திரும்பினார். அதற்காக வாடகை கார் மூலம் விமான நிலையம் செல்லும் வழியில் குரோம்பேட்டையில் உள்ள ஒரு ஓட்டலில் டிரைவருடன் சாப்பிட சென்றார்.

அப்போது மர்ம நபர்கள் காரின் பின்புற கதவின் கண்ணாடியை உடைத்து உள்ளே பையில் வைத்திருந்த ரூ.1 லட்சம் ரொக்கப் பணத்தை கொள்டிளயடித்து சென்று விட்டனர்.

இதே போன்று குரோம்பேட்டையில் மற்றொரு கொள்ளை சம்பவம் நடந்துள்ளது. செங்கல்பட்டை சேர்ந்தவர் சுந்தரமாணிக்கம் (45). கட்டுமான தொழில் அதிபரான இவர் நேற்று தனது விலை உயர்ந்த காரில் குரோம்பேட்டை வந்து இருந்தார்.

அங்குள்ள ஒரு ‘ஷோரூம்’ முன்பு காரை நிறுத்திவிட்டு கைகடிகாரம் வாங்க சென்றார். அப்போது இவரது காரின் பின்புற கதவின் கண்ணாடியை உடைத்து உள்ளே இருந்த விலை உயர்ந்த லேப்டாப் மற்றும்அதில் வைத்திருந்த ரூ.2 லட்சம் கொள்ளையடிக்கப்பட்டது.

இது குறித்து குரோம்பேட்டை போலீசார் வழக்கு பதிவுசெய்து விசாரணை நடத்தினார்கள்.

சோழிங்கநல்லூர்:

சோழிங்கநல்லூரை அடுத்த செம்மஞ்சேரி எழில் நகரில் உள்ள குடியிருப்பில் வசித்து வருபவர் ஏழுமலை. இவரது மகன் அரங்கநாதன்.

குடிநீர் பிரச்சினை தொடர்பாக ஏழுமலை குடும்பத்தினருக்கு பக்கத்து வீட்டில் வசிப்பவர்களுக்கும் இடையே தகராறு ஏற்பட்டது.

இதுபற்றி அறிந்ததும் செம்மஞ்சேரி போலீசார் அங்கு விரைந்து வந்து விசாரணை நடத்தினர். அப்போது போலீசாரை அரங்கநாதன் தாக்க முயன்றதாக தெரிகிறது.

இதையடுத்து அரங்கநாதனை போலீசார் கைது செய்து எழில்நகரில் உள்ள போலீஸ் பூத்தில் வைத்து விசாரணை நடத்தினர். இதனால் ஆத்திரம் அடைந்த அரங்கநாதனின் தந்தை ஏழுமலை மற்றும் உறவினர் மற்றொரு ஏழுமலை ஆகியோர் போலீஸ் பூத் மீது கல்வீசி தாக்கினர். மேலும் அங்கிருந்த பொருட்களை அரங்கநாதன் சேதப்படுத்தினார்.

இதைத்தொடர்ந்து அரங்கநாதன், அவரது தந்தை ஏழுமலை, உறவினர் ஏழுமலை ஆகிய 3 பேரையும் போலீசார் கைது செய்தனர். அவர்களை ஆலந்தூர் கோர்ட்டில் ஆஜர்படுத்தி சிறையில் அடைத்தனர்.

கூடுவாஞ்சேரி:

வண்டலூரை அடுத்த கொளப்பாக்கம் அழகேசன் நகர் 1-வது தெருவை சேர்ந்தவர் ஜீவா (39). தொழில் அதிபர். இவர் தனக்கு சொந்தமான லாரி, வேன், கார் மற்றும் டிராக்டரை வாடகைக்கு விடும் தொழில் செய்து வந்தார். இவரது மனைவி தேவி. இவர்களுக்கு ஒரு மகனும், ஒரு மகளும் உள்ளனர்.

நேற்று இரவு கொளப்பாக்கம் சின்னம்மன் கோவில் தெருவில் 5 வாலிபர்கள் மதுகுடித்து கொண்டு இருந்தனர். இதனை அவ்வழியே வந்த ஜீவா மற்றும் அவரது உறவினர் சங்கர் ஆகியோர் கண்டித்தனர்.

இதில் அவர்களுக்கு இடையே மோதல் ஏற்பட்டது. ஆத்திரம் அடைந்த மது போதையில் இருந்த வாலிபர்கள் ஜீவாவை சரமாரியாக தாக்கி கழுத்தை நெரித்தனர். இதில் சம்பவ இடத்திலேயே அவர் பரிதாபமாக இறந்தார். சங்கருக்கு பலத்த காயம் ஏற்பட்டது.

சத்தம் கேட்டு அப்பகுதி மக்கள் திரண்டு வந்தனர். உடனே போதை வாலிபர்கள் அங்கிருந்து தப்பி ஓடி விட்டனர். இதுகுறித்து ஓட்டேரி போலீசில் புகார் செய்யப்பட்டது. போலீசார் வழக்கு பதிவு செய்து விசாரணை நடத்தி வருகிறார்கள்.

படுகாயம் அடைந்த சங்கருக்கு செங்கல்பட்டு அரசு ஆஸ்பத்திரியில் தீவிர சிகிச்சை அளிக்கப்பட்டு வருகிறது. கொலை தொடர்பாக அதே பகுதியை சேர்ந்த 5 பேரை போலீசார் பிடித்துள்ளனர். அவர்களிடம் விசாரணை நடந்து வருகிறது.

ஆலந்தூர்:

தி.மு.க. மகளிரணி செயலாளர் கனிமொழி எம்.பி. டெல்லியில் இருந்து நேற்றிரவு சென்னை வந்தார். அப்போது அவர் நிருபர்களிடம் கூறியதாவது:-

சென்னையில் போலீஸ் நிலையம் மீது பெட்ரோல் குண்டு வீசி இருக்கிறார்கள். குற்றவாளிகளை கண்டு பிடிக்க சி.சி.டி.வி. கேமராவில் அந்த நிகழ்வு பதிவு ஆகியிருக்கும் என்றால் அங்குள்ள கேமராக்களும் வேலை செய்யவில்லை.

ஆனால் காவல் துறை மானிய கோரிக்கையின் போது முதல்வர் மற்றும் அமைச்சர்கள் பேசும்போது தமிழகத்தில் குற்றங்கள் குறைந்து இருக்கிறது, சட்டம்- ஒழுங்கு சீராக இருக்கிறது என்று பேசுகின்றனர்.

தி.மு.க. செயல் தலைவர் மு.க.ஸ்டாலின் மக்கள் பிரச்சினைகள் பற்றி பேசுகிறார். தமிழகத்தில் பயங்கரவாதிகள் ஊடுருவல் இருப்பது பற்றி ஏன் பேச வில்லை என்று மத்திய மந்திரி பொன்.ராதாகிருஷ்ணன் கேட்கிறார்.

எதிர்க்கட்சியை விட மத்திய அரசுக்குதான் பயங்கரவாதம் பற்றி தெரிய வரும். மத்திய அரசின் கட்டுப்பாட்டில் பாதுகாப்பு துறை இருக்கிறது.

தமிழகத்தில் பயங்கரவாதிகள் ஊடுருவல் குறித்து மாநில அரசிடம் எடுத்துரைத்து அதற்கான நடவடிக்கையை மத்திய அரசு எடுக்க வேண்டும். அதை ஏன் செய்யவில்லை.

சென்னையில் குடிநீர் பிரச்சினை அதிகமாக உள்ளது. தமிழக அரசு எந்த செயல்பாடும் இல்லாமல் உள்ளது. குடிநீர் பிரச் சினை உள்ளிட்ட மக்கள் பிரச்சினையில் அரசு எவ்வித ஆர்வமும் காட்டவில்லை.

மு.க.ஸ்டாலின் நீர்நிலைகளை தூர்வாரி வருகிறார். அரசு எதுவும் செய்யவில்லை.

பெங்களூர் சிறையில் சசிகலாவிற்கு சலுகை விவகாரம் குறித்து கர்நாடக அரசின் நடவடிக்கையை பொறுத்து இருந்து பார்ப்போம்.

இவ்வாறு அவர் கூறினார்.