காஞ்சிபுரம்

போரூர்:

நெற்குன்றம், செல்லியம்மன் நகர் கார்த்திகை தெருவில் வசித்து வருபவர் ஆதிகேசவன். ஆட்டோ டிரைவர். இவரது மகள் கவுசல்யா (வயது 17). மன வளர்ச்சி குன்றி இருந்தார். மகன் அஜித், கல்லூரியில் முதலாம் ஆண்டு படித்து வருகிறார்.

ஆதிகேசவனின் மனைவி கடந்த 10 ஆண்டுக்கு முன்பே பிரிந்து சென்று விட்டார். இதையடுத்து மகன், மகளை ஆதிகேவன் கவனித்து வந்தார்.

கவுசல்யாவுக்கு மன வளர்ச்சி குறித்த சிகிச்சை எடுத்தும் எந்த முன்னேற்றமும் இல்லை. இதனால் ஆதிகேசவன் மன வருத்தத்தில் இருந்தார்.

கடந்த சில நாட்களாக கவுசல்யா வீட்டில் ரகளை செய்து வந்தார். இதனால் அஜித், கடந்த 4 நாட்களாக கல்லூரிக்கு செல்லாமல் அவரை கவனித்தார்.

இது ஆதிகேசவனுக்கு மேலும் ஆத்திரத்தை ஏற்படுத்தியது. இதையடுத்து மனவளர்ச்சி குன்றிய மகளை கொலை செய்ய முடிவு செய்தார். இதற்காக இன்று காலை அவர், மகன் அஜித்தை கல்லூரிக்கு அனுப்பி விட்டார்.

பின்னர் வீட்டில் இருந்த நைலான் கயிற்றால் கவுசல்யாவின் கழுத்தை ஆதிகேசவன் நெரித்தார். இதில் சம்பவ இடத்திலேயே கவுசல்யா பரிதாபமாக இறந்தார்.

இதைத் தொடர்ந்து ஆதிகேசவன் கோயம்பேடு போலீஸ் நிலையத்தில் சரண் அடைந்தார். இன்ஸ்பெக்டர் ராஜேந்திரன் மற்றும் போலீசார் கவுசல்யாவின் உடலை கைப்பற்றி பிரேத பரிசோதனைக்காக கீழ்ப் பாக்கம் அரசு ஆஸ்பத்திரிக்கு அனுப்பிவைத்தனர்.

மனவளர்ச்சி குன்றிய மகளை தந்தையே கொலை செய்த சம்பவம் அப்பகுதியில் பரபரப்பை ஏற்படுத்தி உள்ளது.

போரூர்:

சென்னை வானகரத்தில் உள்ள தனியார் திருமண மண்டபம் அருகே நேற்று சாலையோரம் துணி மூட்டையில் வாலிபர் ஒருவர் கை, கால் கட்டிய நிலையில் பிணமாக கிடந்தார்.

அவரது உடலில் வெட்டு காயங்கள் இருந்தது. அவரை மர்ம நபர்கள் கொடூரமாக கொலை செய்து உடலை சாலையில் வீசி சென்றிருப்பது தெரிய வந்தது. அவரது உடலை மதுரவாயல் போலீசார் கைப்பற்றி விசாரணை நடத்தினர்.

இதில் கொலையுண்டது மதுரவாயல் நார்த்தமாதா 2-வது குறுக்கு தெருவை சேர்ந்த குணசீலன் (27) என்பதும் தெரியவந்தது. ரவுடியான இவர் 2016-ம் ஆண்டு அமைந்தகரையில் தீபக் ராஜ் என்பவர் கொலை செய்யப்பட்ட வழக்கில் குற்றவாளி ஆவார்.

அவரது கை, கால்களை கட்டி கொடூரமாக கொலை செய்யப்பட்டுள்ளதால் திட்டமிட்டு பழிக்கு பழியாக தீர்த்து கட்டப்பட்டு இருப்பது தெரியவந்தது.

இது குறித்து போலீசார் வழக்குபதிவு செய்து விசாரித்து வருகிறார்கள். குணசீலன் மீது எத்தகைய வழக்குகள் உள்ளன. யார்-யாருடன் மோதலில் ஈடுபட்டு உள்ளார் போன்ற விவரங்களை சேகரித்து வருகிறார்கள்.

கூடுவாஞ்சேரி:

வண்டலூரை சேர்ந்தவர் காளிகேஸ்வரன் (வயது 28). மறைமலைநகரில் உள்ள தனியார் நிறுவனத்தில் வேலை பார்த்து வந்தார். இன்று காலை அவர் உடன் வேலை பார்க்கும் அதே பகுதியை சேர்ந்த அழகர் கருப்புசாமியுடன் (32) மோட்டார் சைக்கிளில் பணிக்கு சென்றார்.

கூடுவாஞ்சேரி அருகே வந்த போது சரக்கு ஆட்டோ ஒன்று மோட்டார் சைக்கிள் மீது உரசியது. இதில் நிலை தடுமாறிய 2 பேரும் தவறி கீழே விழுந்தனர்.

அந்த நேரத்தில் பின்னால் தாம்பரத்திலிருந்து செங்கல்பட்டு நோக்கி சென்ற அரசு பஸ் அவர்கள் மீது ஏறி இறங்கியது. இதில் சம்பவ இடத்திலேயே காளிகேஸ்வரனும், அழகர் கருப்பு சாமியும் பரிதாபமாக இறந்தனர்.

கூடுவாஞ்சேரி போலீசார் பலியான 2 பேரின் உடல்களையும் மீட்டு பிரேத பரிசோதனைக்காக செங்கல்பட்டு அரசு ஆஸ்பத்திரிக்கு அனுப்பி வைத்தனர். இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது

இது குறித்து கூடுவாஞ்சேரி போலீசார் வழக்குபதிவு செய்து விசாரணை நடத்தி வருகிறார்கள்.

ஸ்ரீபெரும்புதூர்:

ஸ்ரீபெரும்புதூரை அடுத்த மண்ணூர் பகுதியை சேர்ந்தவர் பாஸ்கர். பா.ம.க. ஒன்றிய தொழிற் சங்க தலைவராக உள்ளார். நேற்று காலை அவர் குடும்பத்துடன் வீட்டில் இருந்தார். அப்போது 10-க்கும் மேற்பட்ட வாலிபர்கள் பயங்கர ஆயுதங்களுடன் 7 மோட்டார் சைக்கிளில் அங்கு வந்தனர்.

திடீரென அவர்கள் பாஸ்கரின் வீட்டு மீது கற்களை வீசி தாக்கினர். இதில் ஜன்னல் கண்ணாடிகள் நொறுங்கின. அதிர்ச்சி அடைந்த பாஸ்கர் வீட்டுக்கதவை உள்பக்கம் பூட்டி ஒரு அறையில் குடும்பத்துடன் தஞ்சம் அடைந்தார்.

ஆவேசம் அடைந்த மர்ம கும்பல் வீட்டுமுன்பு நிறுத்தப்பட்டு இருந்த காரின் கண்ணாடிகளை நொறுக்கினர். பின்னர் பாஸ்கருக்கு கொலை மிரட்டல் விடுத்து அங்கிருந்து தப்பி சென்று விட்டனர். இச்சம்பவத்தால் அப்பகுதியில் பெரும் பரபரப்பு ஏற்பட்டு உள்ளது.

கடந்த 3 நாட்களுக்கு முன்பு மண்ணூர் காட்டு கூட்டு ரோடு அருகே பா.ம.க. சார்பில் வைக்கப்பட்டு இருந்த பேனர் தீ வைத்து எரிக்கப்பட்டது. இதன் தொடர்ச்சியாக தாக்குதல் நடந்ததாக தெரிகிறது.

இது குறித்து ஸ்ரீபெரும்புதூர் போலீசில் புகார் செய்யப்பட்டது. இன்ஸ்பெக்டர் நடராஜன் வழக்குபதிவு செய்து விசாரணை நடத்தி வருகிறார்கள்.

பா.மக. பிரமுகர் வீடு சூறையாடப்பட்ட சம்பவம் கட்சியினரிடையே அதிர்ச்சியை ஏற்படுத்தி உள்ளது.

தாம்பரம்:

காஞ்சீபுரத்தை அடுத்த உத்திரமேரூரை சேர்ந்தவர் ராஜேந்திரன் (வயது 55). இவரது மனைவி மல்லிகா (50). இருவரும் நேற்று மாலை குரோம்பேட்டையில் உள்ள உறவினர் வீட்டுக்கு வந்தனர். பின்னர் இன்று அதிகாலை சொந்த ஊருக்கு செல்வதற்காக குரோம்பேட்டை அரசு ஆஸ்பத்திரி எதிரே உள்ள பஸ் நிறுத்தத்துக்கு நடந்து வந்தனர்.

அவர்கள் சாலையை கடக்க முயன்ற போது தாம்பரத்தில் இருந்து பல்லாவரம் நோக்கி சென்ற சரக்கு வேன் திடீரென மோதியது. இதில் சம்பவ இடத்திலேயே மல்லிகா பரிதாபமாக இறந்தார்.

ராஜேந்திரன் பலத்த காயத்துடன் உயிருக்கு போராடினார். அவரை அக்கம் பக்கத்தினர் மீட்டுசென்னை அரசு ஆஸ்பத்திரியில் சேர்த்தனர். அங்கு சிகிச்சை பலனின்றி பரிதாபமாக இறந்தார்.

இது குறித்து குரோம்பேட்டை போலீசார் வழக்குபதிவு செய்து சரக்கு வேன் டிரைவர் ஜான் விக்ரமை கைது செய்தனர். அவரிடம் விசாரணை நடந்து வருகிறது. இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது.

ஆலந்தூர்:

சென்னை விமான நிலையத்திற்கு நேற்று இரவு மஸ்கட்டில் இருந்து வந்த விமானத்தில் பயணிகளின் உடமைகளை அதிகாரிகள் சோதனை செய்தனர்.

சோதனை முடிந்த பிறகு விமான நிலைய ஒப்பந்த தற்காலிக ஊழியர் கரிகாலன் ஒரு பையை எடுத்துக் கொண்டு சென்றார்.

அதை பார்த்து சந்தேகம் அடைந்த மத்திய தொழில் பாதுகாப்பு படை வீரர், அவரிடம் விசாரித்தார். அப்போது கரிகாலன், விமானத்தில் வந்த தன் உறவினர் வயதானவர் என்பதால் அவரது பையை காரில் வைக்க எடுத்து செல்வதாக கூறினார்.

ஆனால் உறவினர் பெயர், எந்த விமானத்தில் வந்தார் என்பது குறித்து கேட்டதற்கு முன்பின் பதிலளித்தார்.

இதையடுத்து அந்த பையை சோதனை செய்த போது அதில் தலா 1 கிலோ எடையுள்ள 3 தங்க கட்டிகள் இருந்தது. இதன் மதிப்பு ரூ.1 கோடியாகும்.

இதையடுத்து கரிகாலனை சுங்க துறை அதிகாரிகளிடம் ஒப்படைத்தனர். அவர் விமானத்தில் கடத்தி வரப்பட்ட தங்க கட்டிகளை வெளியே எடுத்து செல்வதற்கு உடந்தையாக இருந்துள்ளார். அவர் யாரிடம் தங்க கட்டிகளை வாங்கினார் என்பது விசாரணை நடத்தப்பட்டு வருகிறது.

இன்று காலை கொழும்பு செல்ல இருந்த விமானத்தில் பயணிகளிடம் அதிகாரிகள் சோதனை செய்தனர். அப்போது சென்னையைச் சேர்ந்த முகமதுயூனிஸ், சம்சுதீன் ஆகியோரின் உடமைகளை ஸ்கேன் செய்த போது அதில் கட்டு கட்டாக பணம் இருப்பது தெரிய வந்தது.

உடமைகளை பிரித்து பார்த்தபோது ரூ.30 லட்சம் மதிப்புள்ள அமெரிக்க டாலர், யூரோ, சிங்கப்பூர் டாலர் ஆகிய வெளிநாட்டு பணம் இருந்தது. அதற்கான உரிய ஆவணங்கள் இல்லை. இதையடுத்து பணம் பறிமுதல் செய்யப்பட்டது.

தாம்பரம்:

நீட் தேர்வுக்கு ஆதரவு தெரிவித்தும், நீட்தேர்வுக்கு எதிராக செயல்படும் அரசியல் கட்சிகளை கண்டித்தும் பாரதீய ஜனதா கட்சி சார்பில் இன்று தமிழகம் முழுவதும் ஆர்ப்பாட்டம் நடைபெற்றது.

தாம்பரம் சண்முகம் சாலையில் காஞ்சீபுரம் வடக்கு மாவட்டம் சார்பில் நடந்த ஆர்ப்பாட்டத்துக்கு தமிழக பா.ஜனதா தலைவர் தமிழிசை சவுந்தரராஜன் தலைமை தாங்கினார்.

தி.மு.க. எந்த போராட்டம் நட்த்தினாலும் அதற்கு பதிலடி கொடுக்க தயாராக இருக்கிறோம். தமிழகத்தில் மாற்று சக்தியாக தி.மு.க. இருக்க முடியாது. நவோதயா பள்ளிகள் தொடங்க தமிழக மக்கள் ஆதரவு தெரிவித்து வருகிறார்கள். கலைஞர் உடல் நலத்துடன் அரசியலில் ஈடுபட்டு இருந்தால் மாணவர்களின் நலன் கருதி அவர் கண்டிப்பாக நீட் தேர்வை ஆதரித்து இருப்பார்.

இவ்வாறு அவர் பேசினார்.

ஆர்ப்பாட்டத்தில் மாவட்ட தலைவர் மோகன் ராஜா, தாம்பரம் தொகுதி பொறுப்பாளர் பொற்றாமரை சங்கரன்,மாநில இளைஞரணி துணைத்தலைவர் குமார், பிற மாநில பிரிவு செயலாளர் அசோக்ஜெயின், முத்துக்குமார், பாபு உள்பட பலர் கலந்து கொண்டனர்.

தண்டையார்பேட்டை மேம்பாலம் அருகே வட சென்னை மாவட்ட பா.ஜனதா சார்பில் ஆர்ப் பாட்டம் நடந்தது. மாவட்ட தலைவர் கிருஷ்ணகுமார், தேசிய செயற்குழு உறுப்பினர் வேதா. சுப்பிரமணியன், கோபிகிருஷ்ணன், மாவட்ட பொருளாளர் நடராஜன், வன்னியராஜன் உள்பட 200-க்கும் மேற்பட்டோர் பங்கேற்றனர்.

செங்குன்றத்தில் நடந்த ஆர்ப்பாட்டத்துக்கு திருவள்ளூர் கிழக்கு மாவட்ட பாரதீய ஜனதா தலைவர் பாஸ்கர் தலைமை தாங்கினார். பொதுச் செயலாளர் கே.டி.ராகவன், மாவட்ட செயலாளர்கள் சிவா, செந்தில்குமார், துணைத் தலைவர் சசிதரன் உள்பட 100-க்கும் மேற்பட்டோர் பங்கேற்றனர்.

ஆலந்தூர்:

பழவந்தாங்கல் அருகே மூவரசம்பட்டி போலீஸ் இன்ஸ்பெக்டரத்னவேல் பாண்டியன் மற்றும் போலீசார் ரோந்து சென்ற போது வாலிபர் ஒருவர் சந்தேகத்திற்கிடமாக நின்று கொண்டிருந்தார்.

அவரிடம் போலீசார் விசாரித்த போது, பழைய பல்லாவரத்தை சேர்ந்த ஜெயக்குமார் என்பதும், மூவரசம்பட்டி பகுதியில் பெண்களிடம் செயின் பறிப்பில் ஈடுபட்டதும் தெரிய வந்தது. இதையடுத்து அவரை கைது செய்து 10 பவுன் நகையை பறிமுதல் செய்தனர்.