மதுரை
அவனியாபுரம், அருணகிரிநாதர் தெருவை சேர்ந்தவர் வேலு (28). நேற்று மாலை இவர் பிரசன்னா காலனியில் உள்ள டீக் கடைக்கு சென்றார். அப்போது பெருங்குடி, வடக்குத்தெரு, வழுக்கை அய்யனார் (29) என்பவர் வேலுவிடம் கத்தியை காட்டி மிரட்டி ரூ.1,500-ஐ பறித்து சென்றார்.
இது குறித்த புகாரின் பேரில் அவனியாபுரம் போலீசார் வழக்குப் பதிவு செய்து வழுக்கை அய்யனாரை கைது செய்தனர்.
செல்லூர் ஜீவா நகரைச் சேர்ந்தவர் பிரபாகரன் (37). இவர் நேற்று பைபாஸ் ரோடு டீக்கடை அருகே நடந்து சென்றார். அப்போது 3 பேர் கத்தியை காட்டி மிரட்டி ரூ.3,100-ஐ பறித்து சென்றது.
இதேபோல மாடக்குளம், வி.கே.பி. நகர், சந்தானம் (45) என்பவரிடம் மர்ம கும்பல் கத்தியை காட்டி மிரட்டி ரூ.2,200-ஐ பறித்து தப்பியது.
மேற்கண்ட 2 சம்பவங்கள் தொடர்பாக மாநகர போலீசில் புகார் செய்யப்பட்டது.போலீசார் அந்த பகுதியில் பொருத்தப்பட்டு உள்ள கண்காணிப்பு காமிரா பதிவுகளை கைப்பற்றி ஆய்வு செய்தனர். அப்போது 2 சம்பவங்களிலும் ஒரே கும்பல் ஈடுபட்டது தெரியவந்தது.
இதனைத் தொடர்ந்து போலீசார் சந்தேகத்தின் பேரில், 3 பேரை பிடித்து காவல் நிலையத்திற்கு அழைத்து வந்து விசாரணை நடத்தினர்.
அவர்கள் சிந்தாமணி, கீழத்தெரு கார்த்திகேயன் (25), அனுப்பானடி தாய் நகர் ஜெய்சங்கர் (26), ஆரப்பாளையம் கோபாலகிருஷ்ணன் (28) என்பது தெரியவந்தது. அவர்கள் குற்றத்தை ஒப்புக் கொண்டனர். 3 பேரையும் போலீசார் கைது செய்தனர்.
